ກົມແຜນການ ແລະ ການເງິນ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມສະຫຼບວຽກງານ 06 ເດືອນຕົ້ນປີ, ທິດທາງແຜນການ 06 ເດືອນທ້າຍປີ ແລະ ກອງປະຊຸມວິຊາການແນະນຳຂຶ້ນແຜນງົບປະມານປະຈຳປີ 2026 ລວມເຖິງບັນດາກິດຈະກຳຂອງກົມແຜນການ ແລະ ການເງິນ ຂຶ້ນໃນວັນທີ 07 ສິງຫາ 2025 ທີ່ຜ່ານມາ, ທີ່ຫ້ອງປະຊຸມສະຖາບັນເຕັກໂນໂລຊີການສື່ສານຂໍ້ມູນຂ່າວສານ. ໃຫ້ກຽດເປັນປະທານໂດຍ ທ່ານ ແກ້ວວິສຸກ ໂສລະພົມ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ຊຶ່ງມີບັນດາຄະນະກົມ, ຄະນະພະແນກ ແລະ ວິຊາການ ຈາກກົມ/ທຽບເທົ່າ ອ້ອມຂ້າງກະຊວງເຂົ້າຮ່ວມຢ່າງພ້ອມພຽງ.

ກອງປະຊຸມດັ່ງກ່າວໄດ້ແບ່ງເປັນສອງພາກຄື: ພາກເຊົ້າແມ່ນກອງປະຊຸມວິຊາການແນະນຳຂຶ້ນແຜນງົບປະມານ ປະຈຳປີ 2026 ລວມເຖິງບັນດາກິດຈະກຳຂອງກົມແຜນການ ແລະ ການເງິນ ໂດຍບັນດາພະແນກພາຍໃນກົມແຜນການ ແລະ ການເງິນ ຂຶ້ນແນະນຳບັນດາໜ້າວຽກທີ່ກ່ຽວຂ້ອງຂອງຕົນ ເຊັ່ນ: ການຂຶ້ນແຜນງົບປະມານປະຈຳປີ 2026, ການຄຸ້ມຄອງໂຄງການລົງທຶນຂອງລັດ, ການຄຸ້ມຄອງ ແລະ ການນຳໃຊ້ຊັບສິນຂອງລັດ ແລະ ຫົວຂໍ້ອື່ນໆ. ພາກບ່າຍແມ່ນກອງປະຊຸມສະຫຼຸບວຽກງານ 06 ເດືອນຕົ້ນປີ ແລະ ແຜນການທິດທາງ 06 ເດືອນທ້າຍປີ 2025, ຊຶ່ງໄດ້ຕີລາຄາດ້ານການເມືອງ-ແນວຄິດ, ການຈັດຕັ້ງປະຕິບັດດ້ານວິຊາສະເພາະ ລວມເຖິງການຖອດຖອນບົດຮຽນດ້ານດີ, ຂໍ້ຄົງຄ້າງ, ທິດທາງ ແລະ ຄາດໝາຍສູ້ຊົນໃນ 06 ເດືອນທ້າຍປີ 2025.

ໂອກາດດັ່ງກ່າວ, ທ່ານ ຮອງລັດຖະມົນຕີ ໄດ້ກ່າວວ່າ: ກົມແຜນການ ແລະ ການເງິນ ເປັນກົມໜຶ່ງທີ່ສຳຄັນ ມີໜ້າທີ່ເປັນເສນາທິການໃຫ້ແກ່ຄະນະນຳກະຊວງ ເປັນກົມທີ່ຊ່ວຍຂັບເຄື່ອນວຽກງານຕ່າງໆພາຍໃນກະຊວງ ພ້ອມທັງໄດ້ຊີ້ນຳບັນດາກົມພາຍໃນກະຊວງໃຫ້ກຽມສຸມໃສ່ແຜນພັດທະນາເສດຖະກິດ ຄັ້ງທີ X ຊຶ່ງມີກົມແຜນການ ແລະ ການເງິນ ເປັນໃຈກາງ, ໃຫ້ປຶກສາຫາລື, ປະສານລະອຽດໃນການເຮັດວຽກຮ່ວມກັນ ແລະ ປະກອບເອກະສານຕ່າງໆໃຫ້ຖືກຕ້ອງຕາມລະບຽບຫຼັກການ.

ຂ່າວ: ກົມແຜນການ ແລະ ການເງິນ

ຮູບພາບ: ພຸດດາວອນ ພາສຸວັນ