ການນໍາໃຊ້ເຕັກໂນໂລຊີທັນສະໄໝ ເຂົ້າໃນການສຶກສາອົບຮົມການເມືອງ-ແນວຄິດ ເປັນບັນຫາທີ່ສໍາຄັນ ແລະ ມີຄວາມຈໍາເປັນອັນຮີບດ່ວນຂອງພັກ ແລະ ລັດ

24/11/2022

ການນໍາໃຊ້ເຕັກໂນໂລຊີທັນສະໄໝ ເຂົ້າໃນການສຶກສາອົບຮົມການເມືອງ-ແນວຄິດ ເປັນບັນຫາທີ່ສໍາຄັນ ແລະ ມີຄວາມຈໍາເປັນອັນຮີບດ່ວນຂອງພັກ ແລະ ລັດ

        ກອງປະຊຸມວຽກງານການເມືອງ-ແນວຄິດທົ່ວປະເທດ ຄັ້ງທີ V ເປີດຂຶ້ນຢ່າງເປັນທາງການໃນວັນທີ 17 ພະຈິກນີ້ ທີ່ຫ້ອງປະຊຸມຫ້ອງວ່າການສູນກາງພັກ, ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ, ມີສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ຫົວໜ້າຄະນະຊີ້ນຳກະກຽມກອງປະຊຸມວຽກງານການເມືອງ-ແນວຄິດທົ່ວປະເທດ ຄັ້ງທີ V, ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ຜູ້ປະຈຳການຄະນະຊີ້ນຳກະກຽມກອງປະຊຸມວຽກງານການເມືອງ-ແນວຄິດທົ່ວປະເທດ ຄັ້ງທີ V, ມີບັນດາສະຫາຍກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ກຳມະການສູນກາງພັກ, ບັນດາສະຫາຍຄະນະບໍລິຫານງານພັກແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.

         ໃນກອງປະຊຸມຄັ້ງນີ້, ສະຫາຍ ບໍ່ວຽງຄຳ ວົງດາລາ, ກໍາມະການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ກໍໄດ້ປະກອບຄໍາເຫັນຕໍ່ກອງປະຊຸມ ຊຶ່ງສະຫາຍໄດ້ກ່າວວ່າ: ການນໍາໃຊ້ເຕັກໂນໂລຊີທັນສະໄໝ ເຂົ້າໃນການສຶກສາອົບຮົມການເມືອງ-ແນວຄິດ ເປັນບັນຫາທີ່ສໍາຄັນ ແລະ ມີຄວາມຈໍາເປັນອັນຮີບດ່ວນຂອງພັກ ແລະ ລັດ ເນື່ອງຈາກປັດຈຸບັນນີ້ ໂລກກໍາລັງກ້າວເຂົ້າສູ່ຍຸກສະໄໝແຫ່ງການປະຕິວັດອຸດສາຫະກໍາ ຄັ້ງທີ 4 ຫຼື ຍຸກ 4.0 ໂດຍນໍາໃຊ້ເຕັກໂນໂລຊີທັນສະໄໝ ເຂົ້າໃນທຸກຂົງເຂດວຽກງານຂອງສັງຄົມ.

          ສະຫາຍຍັງກ່າວຕື່ມວ່າ: ໄລຍະຜ່ານການສຶກສາອົບຮົມແນວຄິດການເມືອງມີຫຼາຍຮູບແບບ ແລະ ຫຼາຍວິທີການ ເປັນຕົ້ນການສຶກສາຮ່ຳຮຽນຢູ່ໃນໂຮງຮຽນ, ມະຫາວິທະຍາໄລ ຫຼື ສະຖາບັນການສຶກສາຕ່າງໆ, ການຝຶກອົບຮົມໄລຍະສັ້ນ ແລະ ໄລຍະຍາວ, ການຈັດສໍາມະນາ, ປະຖະກະຖາ ແລະ ໂຄສະນາເຜີຍແຜ່ຜ່ານສື່ສິ່ງພິມ, ໜັງສືພິມ ຫຼື ຜ່ານສື່ສັງ ຄົມອອນລາຍຕ່າງໆທັງໝົດນັ້ນ ລ້ວນແຕ່ຕ້ອງນໍາໃຊ້ເຕັກໂນໂລຊີການຈັດພິມຈໍາໜ່າຍ, ເຕັກໂນໂລຊີການສື່ສານທາງວິທະຍຸ, ໂທລະພາບຕ່າງໆທີ່ເປັນມູນເຊື້ອມາໃນຍຸກ 3.0 ແຕ່ປັດຈຸບັນນີ້ ໃນຍຸກ 4.0 ເກີດມີເຕັກໂນໂລຊີການສື່ສານແບບໃໝ່ທີ່ວ່ອງໄວ, ກວ້າງຂວາງ ແລະ ຄຸ້ມຄອງໄດ້ຍາກ ໂດຍສະເພາະສື່ສັງຄົມອອນລາຍ ພວມມີທ່າອ່ຽງທີ່ໄດ້ຮັບຄວາມນິຍົມເພີ່ມຂຶ້ນຫຼາຍໃນບັນດາປະເທດຕ່າງໆໃນພາກພື້ນ ແລະ ທົ່ວໂລກ. ຕາມສະຖິຕິປີ 2022 ສື່ສັງຄົມອອນລາຍທີ່ຖືກນໍາໃຊ້ຫຼາຍກວ່າໝູ່ແມ່ນ Facebook, ມີປະມານ 2.936 ລ້ານບັນຊີ, ອັນດັບຮອງລົງມາ ແມ່ນ YouTube 2.476 ລ້ານບັນຊີ, Whats App 2.000 ລ້ານບັນຊີ, Instagram 1.440 ລ້ານບັນຊີ; Wechat 1.288 ລ້ານບັນຊີ ແລະ TikTok 1.023 ລ້ານບັນຊີ. ສໍາລັບຢູ່ ສປປ ລາວ ໄດ້ນໍາໃຊ້ສື່ສັງຄົມອອນລາຍຫຼາຍປະເພດ, ແຕ່ທີ່ໃຊ້ຫຼາຍກວ່າໝູ່ ກໍແມ່ນ Facebook ແລະ WhatsApp. ຈາກສະຖິຕິປີ 2022 ການນໍາໃຊ້ ສື່ສັງຄົມອອນລາຍ ໃນ ສປປ ລາວ ແມ່ນມີເຖິງ 3,8 ລ້ານບັນຊີ ຫຼື 51,1% ຂອງພົນລະເມືອງລາວ, ຊຶ່ງເພິ່ມຂຶ້ນຈາກປີຜ່ານມາ 5,6%. ໂດຍສະເພາະ Facebook ແມ່ນມີຜູ້ໃຊ້ເຖິງ 3,5 ລ້ານບັນຊີ ຫຼື 47,1% ຂອງປະຊາກອນລາວທັງໝົດ, ໃນນັ້ນ 99.5% ແມ່ນນຳໃຊ້ຜ່ານໂທລະສັບມືຖື Smart Phone.

           ສະນັ້ນ, ເພື່ອນໍາໃຊ້ເຕັກໂນໂລຊີ ທີ່ທັນສະໄໝເຂົ້າໃນການສຶກສາອົບຮົມການເມືອງ-ແນວຄິດຂອງປະເທດເຮົາ ໂດຍຕິດພັນກັບການແກ້ໄຂຜົນກະທົບຈາກສື່ສັງຄົມອອນລາຍໃນປັດຈຸບັນນີ້ ແລະ ໃນອະນາຄົດ ເຫັນວ່າຈະຕ້ອງເອົາໃຈໃສ່ນໍາໃຊ້ເຕັກໂນໂລຊີສື່ສານທັນສະໄໝ ຕ່າງໆ ເຊັ່ນ: ວິທະຍຸ, ໂທລະພາບ, ສື່ສິ່ງພິມ, ວາລະສານ, ໜັງສືພິມເອເລັກໂຕຼນິກ, ອິນເຕີເນັດ ແລະ ສັງຄົມອອນລາຍ ໂຄສະນາເຜີຍແຜ່ແນວທາງການເມືອງ ແລະ ນະໂຍບາຍຂອງພັກ-ລັດ ໃຫ້ກວ້າງຂວາງໃນທົ່ວສັງຄົມ ດ້ວຍຫຼາຍຮູບ, ຫຼາຍສີ, ຫຼາຍວິທີການເພື່ອເຂົ້າເຖິງທຸກໆຄົນ, ໃນທົ່ວສັງຄົມຢ່າງວ່ອງໄວທັນການ ເພື່ອໃຫ້ສັງຄົມໄດ້ຮັບຮູ້ຂໍ້ມູນຄວາມຈິງ ແລະ ຕອບໂຕ້ຂໍ້ມູນປອມໂຄສະນາຊວນເຊື່ອຂອງພວກບໍ່ຫວັງດີ. ສ້າງຫຼັກໝັ້ນການເມືອງອັນໜັກແໜ້ນໃຫ້ແກ່ສະມາຊິກພັກ, ພະນັກງານ, ກໍາລັງປະກອບອາວຸດ, ປກສ-ປກຊ, ຊາວໜຸ່ມ ໄວລຸ້ນ ແລະ ປະຊາຊົນໃນທົ່ວສັງຄົມເພື່ອເປັນ “ພູມຄຸ້ມກັນ” ທີ່ເຂັ້ມແຂງຕ້ານກັບສົງຄາມຈິດຕະສາດ ຫັນປ່ຽນໂດຍສັນຕິ ຂອງພວກບໍ່ຫວັງດີ, ສ້າງ, ປັບປຸງ ແລະ ເຜີຍແຜ່ກົດໝາຍ, ດໍາລັດ ກ່ຽວຂ້ອງກັບການຄຸ້ມຄອງເຕັກໂນໂລຊີການສື່ສານຂໍ້ມູນຂ່າວສານ, ເຕັກໂນໂລຊີດິຈິຕ໋ອນ, ການຄຸ້ມຄອງ, ການບໍລິຫານ, ການບໍລິການລັດຖະບານດິຈິຕ໋ອນ, ການຄຸ້ມຄອງຂໍ້ມູນຂ່າວສານຜ່ານອິນເຕີເນັດ, ວຽກງານຄວາມປອດໄພທາງໄຊເບີ ແລະ ການຄຸ້ມຄອງ, ຕິດຕາມກວດກາ ແລະ ຕອບຕ້ານຫາງສຽງທາງສື່ສັງຄົມອອນລາຍ; ຄົ້ນຄວ້າສ້າງຍຸດທະສາດການຄຸ້ມຄອງ ແລະ ພັດທະນາອິນເຕີເນັດ; ສ້າງນິຕິກໍາໃນການຄຸ້ມຄອງ, ພັດທະນາ ແລະ ນໍາໃຊ້ໂຄງລ່າງພື້ນຖານໂທລະຄົມມະນາຄົມ ແລະ ເຕັກໂນໂລຊີດິຈິຕ໋ອນຮ່ວມກັນ ເພື່ອຮັບປະກັນນະໂຍບາຍປະຢັດ ຂອງລັດຖະບານ ຫຼີກເວັ້ນການລົງທຶນຊໍ້າຊ້ອນ; ສ້າງນິຕິກໍາໃນການຄຸ້ມຄ້ອງ ແລະ ສະໜອງຈຸດເຊື່ອມຕໍ່ ຮັບປະກັບວຽກງານ ປກຊ-ປກສ; ສືບຕໍ່ສ້າງນິຕິກໍາຄຸ້ມຄອງການນໍາໃຊ້ລະບົບຕິດຕາມການສື່ສານຜ່ານໂທລະສັບ ວຽກງານຮ່ວມ ປກຊ-ປກສ; ສ້າງ, ປັບປຸງ, ຜັນຂະຫຍາຍນິຕິກໍາທີ່ຍັງບໍ່ພຽງພໍໃຫ້ແທດເໝາະກັບການປ່ຽນແປງໃນແຕ່ລະໄລຍະ; ເລັ່ງສ້າງບັນດານິຕິກໍາທີ່ກ່ຽວຂ້ອງ ເພື່ອຄຸ້ມຄອງ ແລະ ການພັດທະນາວຽກງານການຫັນເປັນດິຈິຕ໋ອນຂອງທຸກຂະແໜງ ການ, ເອົາໃຈໃສ່ເປີດກວ້າງການຮ່ວມມື ກັບຕ່າງປະເທດ ແລະ ສາມກົນ ຕາມແນວທາງການຕ່າງປະເທດຂອງພັກ-ລັດເຮົາ, ເປັນຕົ້ນຕົ້ນແມ່ນຮ່ວມມືກັບບັນດາປະເທດເພື່ອນມິດຍຸດທະສາດເຊັ່ນ: ສສ ຫວຽດນາມ, ສປ ຈີນ ເພື່ອຖອດຖອນບົດຮຽນການຄຸ້ມຄອງສື່ສັງຄົມອອນລາຍ ແລະ ດຶງດູດການຊ່ວຍເຫຼືອທາງດ້ານເຕັກໂນໂລຊີຊອບແວຣ໌, ຮາດແວຣ໌ ແລະ ພັດທະນາຊັບພະຍາກອນມະນຸດ. ພ້ອມກັນນັ້ນກໍຮ່ວມກັບບັນດາປະເທດໃນກອບອາຊຽນຊຶ່ງມີ ໂຄງການຮັກສາຄວາມປອດໄພດ້ານໄຊເບີອາຊຽນ ແລະ ຮ່ວມມືກັບບັນດາປະເທດທີ່ມີເຕັກໂນໂລຊີທັນສະໄໝ ເປັນເປັນມິດທີ່ດີກັບ ສປປ ລາວ, ເອົາໃຈໃສ່ປະສານສົມທົບກັບບັນດາບໍລິສັດ ສື່ສັງຄົມອອນລາຍຂ້າມທະວີບຕ່າງໆ ເຊັ່ນ: ເຟສບຸກ, ຢູທູບ ແລະ ອື່ນໆ ເພື່ອໃຫ້ຄວາມຮ່ວມມືໃນການສະກັດກັ້ນ ອາດສະຍາກໍາໄຊເບີ ແລະ ການເຄື່ອນໄຫວສື່ສັງຄົມອອນລາຍທີ່ລະເມີດກົດໝາຍ ແລະ ປັ່ນປ່ວນທຳລາຍຄວາມໝັ້ນຄົງຂອງລາວ.

 

 

ສະຖິຕິຂະແໜງ ເຕັກໂນໂລຊີ ແລະ ການສື່ສານ ປີ2021
ວິໃສທັດ,ແຜນຍຸດທະສາດ ແລະ ແຜນການ 5 ປີ ຄັ້ງທີ III (2021-2025)
ວາ​ລະ​ສານ ໄອ​ຊີ​ທີ 17
ລະ​ບົບ​ຂື້ນ​ທະ​ບຽນ​ປະ​ຊຸມ