ໃນຕອນບ່າຍຂອງວັນທີ 26 ກັນຍາ 2024, ທີ່ຫ້ອງປະຊຸມຊັ້ນ 2 ຂອງ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ໄດ້ມີກອງປະຊຸມສ່ອງແສງເຄື່ອນທີ່ ປະຈຳໄຕມາດ III ປະຈຳປີ 2024 ຂອງ ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ກະຊວງ, ອົງການ, ນະຄອນຫຼວງວຽງຈັນ ແລະ ບັນດາກົມອ້ອມຂ້າງ ສູນກາງຊາວໜຸ່ມ ປະຊາຊົນ ປະຕິວັດລາວ (ສຊປລ), ໂດຍການເປັນປະທານຂອງ ສະຫາຍ ນວນທອງ ສຸວັນວິໄຊ, ຮອງເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ ແລະ ໃຫ້ກຽດເຂົ້າຮ່ວມເປັນຄະນະປະທານ ຂອງ ສະຫາຍ ໄຊລືຊາ ອິນສີຊຽງໄໝ່, ຄະນະປະຈຳພັກ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີສະຫາຍ ພວງປະເສີດ ແກ້ວສຸວັນ, ກຳມະການສູນກາງ ຊປລ, ເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ກະຊວງເຕັກໂນໂລຊີ ແລະ ການສື່ສານ (ຄຊປປລ ກຕສ), ມີບັນດາສະຫາຍ ເລຂາ ຄຊປປລ ກະຊວງ, ອົງການ, ນະຄອນຫຼວງວຽງຈັນ, ບັນດາສະຫາຍ ຫົວໜ້າກົມ, ຫົວໜ້າຫ້ອງການ ອ້ອມຂ້າງ ສຊປລ, ສະຫາຍ ປະທານ ສະມາຄົມນັກທຸລະກິດໜຸ່ມແຫ່ງຊາດລາວ, ສະຫາຍ ປະທານຄະນະທີ່ປຶກສາທາງດ້ານເສດຖະກິດຊາວໜຸ່ມລາວຂອງຄະນະເລຂາທິການ ສຊປລ ເຂົ້າຮ່ວມທັງຫມົດ 50 ສະຫາຍ.

ຈຸດປະສົງຂອງກອງປະຊຸມຄັ້ງນີ້ ແມ່ນປະຕິບັດຕາມແຜນການຈັດກອງປະຊຸມສ່ອງແສງເຄື່ອນທີ່ ປະຈໍາໄຕມາດ III ປີ 2024 ຂອງ ຄຊປປລ ກະຊວງ, ອົງການ, ນະຄອນຫລວງວຽງຈັນ ແລະ ບັນດາກົມອ້ອມຂ້າງ ສຊປລ ເພື່ອເປັນການສະຫຼຸບວຽກງານ 3 ເດືອນຜ່ານມາ, ພ້ອມທັງເປັນການທົບທວນ ແລະ ວາງທິດທາງແຜນການ 3 ເດືອນທ້າຍປີ 2024 ຊຶ່ງໃນຄັ້ງນີ້ ແມ່ນຈັດຂຶ້ນທີ່ ກະຊວງເຕັກໂນໂລຊີ ແລະ ການສື່ສານ. ກອງປະຊຸມ ໄດ້ດໍາເນີນຕາມວາລະ ຢ່າງມີຜົນສຳເລັດອັນຈົບງາມ ເຊັັ່ນ: 1) ມອບໃບຍ້ອງຍໍໃຫ້ຄະນະຊາວໜຸ່ມກະຊວງເຕັກໂນໂລຊີ ແລະ ການສື່ສານ ທີ່ໄດ້ປະກອບເປັນເຈົ້າພາບສະຖານທີ່; 2) ຮັບຟັງການລາຍງານສະຫຼຸບການຈັດຕັ້ງວຽກງານ 3 ເດືອນຜ່ານມາ ແລະ ທິດທາງແຜນການ ໃນ 3 ເດືອນທ້າຍປີ 2024 ທີ່ສະເຫນີໂດຍຫ້ອງການ ສຊປລ, ຮັບຟັງການລາຍງານສະພາບໂດຍຫຍໍ້ຈາກພາກສ່ວນຕ່າງໆ ກ່ຽວກັບບັນຫາການແກ້ໄຂຢາເສບຕິດ ແລະ ສະພາບປາກົດການຫຍໍ້ທໍ້, ການປະລະການຮຽນ, ການແຕ່ງດອງກ່ອນໄວຮຽນ, ການເຄື່ອນຍ້າຍຂອງແຮງງານໜຸ່ມ, ການຊ່ວຍເຫຼືອໄພພິບັດ. ນອກຈາກນັ້ນ, ກອງປະຊຸມ ກໍຍັງໄດ້ຮັບຟັງການປະກອບຄຳເຫັນເປີດກວ້າງຈາກບັນດາສະຫາຍເລຂາ ຄຊປປລ ກະຊວງ, ອົງການ, ນະຄອນຫຼວງວຽງຈັນ ແລະ ບັນດາກົມອ້ອມຂ້າງ ສຊປລ ເພື່ອແລກປ່ຽນບົດຮຽນ ໃນການຈັດຕັ້ງປະຕິບັດວຽກງານຊາວໜຸ່ມໃນຕໍ່ໜ້າໃຫ້ມີຜົນສໍາເລັດທີ່ດີຂຶ້ນກວ່າເກົ່າ.

ໃນຕອນທ້າຍ, ສະຫາຍ ປະທານກອງປະຊຸມ ໄດ້ມີຄຳເຫັນສະແດງຄວາມຂອບໃຈ ຄຊປປລ ກຕສ ທີ່ເອື້ອເຟື້ອສະຖານທີ່ໃນການຈັດກອງປະຊຸມໃນຄັ້ງນີ້ ແລະ ໄດ້ສະຫຼຸບຜົນຂອງກອງປະຊຸມດັ່ງກ່າວ ຊຶ່ງເຫັນໄດ້ວ່າເປັນຂີດໝາຍທີ່ສຳຄັນຢ່າງຍິ່ງ ໃນການຈັດຕັ້ງປະຕິບັດວຽກງານຂອງ ຄະນະບໍຫານງານຊາວໜຸ່ມສູນກາງ ໃຫ້ມີຄວາມເຂັ້ມແຂງຂຶ້ນກວ່າເກົ່າໃນຕໍ່ໜ້າ. ພ້ອມກັນນັ້ນ, ຍັງໄດ້ເນັ້ນໜັກໃຫ້ກະຊວງ, ອົງການ, ນະຄອນຫຼວງວຽງຈັນ ແລະ ບັນດາກົມອ້ອມຂ້າງ ສຊປລ ຈົ່ງເພີ່ມທະວີຄວາມເອົາໃຈໃສ່ໃນການນໍາພາ-ຊີ້ນໍາ ວຽກງານຊາວໜຸ່ມໃນຂັ້ນຂອງຕົນດ້ວຍຄວາມຮັບຜິດຊອບສູງ ໂດຍສະເພາະການຕ້ານ ສະກັດກັ້ນປາກົດການຫຍໍ້ທໍ້ໃນຂົງເຂດຊາວໜຸ່ມ ແລະ ກະກຽມກຳລັງຊ່ວຍໄພພິບັດຕ່າງໆ.

ພາຍຫລັງສຳເລັດກອງປະຊຸມ ຜູ້ເຂົ້າຮ່ວມກອງປະຊຸມທຸກສະຫາຍ ກໍໄດ້ໄປທັດສະນະຢ້ຽມຊົມ ສູນຂໍ້ມູນແຫ່ງຊາດ ແລະ ຫ້ອງປະຕິບັດການຄວາມປອດໄພໄຊເບີ ຂອງກະຊວງເຕັກໂນໂລຊີ ແລະ ການສື່ສານ ຕື່ມອີກ.

ພາບ ແລະ ຂ່າວ: ກອງເລຂາ ຄຊປປລ ກຕສ