ພິທີ ມອບ-ຮັບໃບຢັ້ງຢືນ 4 ບຸກ ປະຈຳປີ 2020 ແລະ ທຸງໄຊນຳໜ້າ 4 ບຸກ ຂອງ ໜ່ວຍຊາວໜຸ່ມ ອົງການດັດສົມໂທລະຄົມມະນາຄົມ (ອດທ) ທີ່ຂຶ້ນກັບ ຄະນະບໍລິຫານງານຊາວໜຸ່ມປະຊາຊົນປະຕິບັດລາວ (ຄຊປປລ), ກະຊວງເຕັັກໂນໂລຊີ ແລະ ການສື່ສານ (ກຕສ) ໄດ້ຈັດຂຶ້ນໃນວັນທີ 20 ມັງກອນ 2023, ທີ່ ຫ້ອງປະຊຸມ ຂອງ ສະຖາບັນເຕັກໂນໂລຊີສື່ສານຂໍ້ມູນຂ່າວສານ. ໃຫ້ກຽດເຂົ້າຮ່ວມເປັນປະທານຮ່ວມຂອງ ສະຫາຍ ສຸດໃຈ ລໍລອນສີ ຄະນະພັກກະຊວງ, ເລຂາໜ່ວຍພັກ ອດທ, ສະຫາຍ ພວງປະເສີດ ແກ້ວສຸວັນ ຄະນະພັກກະຊວງ, ກຳມະການ ຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ເລຂາ ຄຊປປລ ກຕສ ແລະ ສະຫາຍ ບຸນສັກດາ ພົມສະຫວັນ ເລຂາໜ່ວຍຊາວໜຸ່ມ ອດທ ຊຶ່ງມີສະມາຊິກຊາວໜຸ່ມພາຍໃນໜ່ວຍ ແລະ ແຂກຖືກເຊີນ ເຂົ້າຮ່ວມທັງໝົດ 36 ສະຫາຍ, ຍິງ 11 ສະຫາຍ.

           ໃນພິທີ ໄດ້ຮັບຟັງການສະຫຼຸບລາຍງານ ກ່ຽວກັບການຈັດຕັ້ງປະຕິບັດວຽກງານຊາວໜຸ່ມໃນໄລຍະຜ່ານມາ ຕາມເນື້ອໃນຂໍ້ແຂ່ງຂັນ 4 ບຸກ ແລະ ທິດທາງແຜນການໃນຕໍ່ໜ້າ. ຊຶ່ງໄດ້ຍົກໃຫ້ເຫັນດ້ານດີ ຜົນງານທີ່ຍາດມາໄດ້ ທີ່ໄດ້ສະແດງອອກ ເປັນຕົ້ນແມ່ນ: ໄດ້ຮັບການຢັ້ງຢືນ ແລະ ຮັບຮອງ ເປັນໜ່ວຍຊາວໜຸ່ມນໍາໜ້າໃນການຈັດຕັ້ງປະຕິບັດ ຂໍ້ແຂ່ງຂັນ 4 ບຸກ, ໄດ້ຮັບການຍ້ອງຍໍເປັນໜ່ວຍ ແລະ ສະມາຊິກຊາວໜຸ່ມປະຊາຊົນປະຕິວັດລາວ ທີ່ມີຜົນງານດີເດັ່ນ ປະຈໍາປີ,  ຄຽງຄູ່ກັນນັ້ນ ກໍຍັງມີດ້ານອ່ອນ ຂໍ້ຄົງຄ້າງ ທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ. ໜ່ວຍຊາວໜຸ່ມ ອດທ ມີສະມາຊິກ ທັງໝົດ 30 ສະຫາຍ, ຍິງ 11 ສະຫາຍ.  ຄະນະໜ່ວຍຊາວໜຸ່ມໄດ້ສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພາຍໃນໜ່ວຍຢ່າງເປັນປົກກະຕິ, ສະມາຊິກແຕ່ລະສະຫາຍແມ່ນມີຄວາມຫ້າວຫັນ ໃນການຈັດຕັ້ງປະຕິບັດວຽກງານ, ປະຕິບັດກົດລະບຽບຂອງໜ່ວຍຊາວໜຸ່ມໄດ້ດີ, ມີຄວາມສາມັກຄີເປັນເອກະພາບພາຍໃນໜ່ວຍ, ຊ່ວຍເຫຼືອເຊິ່ງກັນ ແລະ ກັນ. ຊຶ່ງຜ່ານການປະເມີນຜົນງານໃນໄລຍະ 01 ປີຜ່ານມາ ສາມາດຄັດເລືອກສະມາຊິກຊາວໜຸ່ມໄດ້ປະເພດແຂງ 30 ສະຫາຍ, ຍິງ 11 ສະຫາຍ ແລະ ໄດ້ຮັບການຢັ້ງຢືນຮັບຮອງເປັນໜ່ວຍຊາວໜຸ່ມ 4 ບຸກ ປະຈໍາປີ 2020. ພ້ອມນັ້ນ, ຍັງໄດ້ວາງທິດທາງແຜນການໃນຕໍ່ໜ້າ ໂດຍສະເພາະແມ່ນຈະໄດ້ສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິບັດລາວ ແລະ ຄະນະບໍລິຫານງານຊາວໜຸ່ມຂອງກະຊວງ ໃຫ້ປາກົດຜົນເປັນຈິງ ພ້ອມທັງຜັນຂະຫຍາຍເນື້ອໃນ ຂໍ້ແຂ່ງຂັນ 4 ບຸກ ໃຫ້ເປັນຂະບວນຟົດຟື້ນ ແລະ ຕິດພັນກັບວຽກງານວິຊາສະເພາະ ໃຫ້ມີຄວາມເຕີບໃຫຍ່ທາງດ້ານປະລິມານ ແລະ ຄຸນນະພາບ ໃຫ້ນັບມື້ດີຂຶ້ນກວ່າເກົ່າ.

           ໃນຕອນທ້າຍ ສະຫາຍ ພວງປະເສີດ ແກ້ວສຸວັນ ກໍໄດ້ໃຫ້ກຽດໂອ້ລົມຕໍ່ພິທີ ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານຂອງໜ່ວຍຊາວໜຸ່ມ ກໍຄືສະມາຊິກແຕ່ລະສະຫາຍ ທີ່ຍາດມາໄດ້ໃນໄລຍະຜ່ານມາ ແລະ ເນັ້ນໜັກໃຫ້ສະມາຊິກຊາວໜຸ່ມທຸກສະຫາຍ ຈົ່ງມີສະຕິຕໍ່ການຈັດຕັ້ງ, ເຊື່ອໝັ້ນຕໍ່ການຊີ້ນຳ-ນຳພາຂອງພັກ, ຍົກສູງດ້ານຄວາມຮູ້, ຄວາມສາມາດ, ຝຶກຝົນຫຼໍ່ຫຼອມຕົນເອງ, ປັບປຸງແບບແຜນວິທີເຮັດວຽກໃຫ້ດີຂຶ້ນ ແລະ ເປັນແບບຢ່າງນຳໜ້າໃຫ້ແກ່ໜ່ວຍຊາວໜຸ່ມອື່ນ ພ້ອມທັງປະຕິບັດກົດໝາຍຂອງຊາວໜຸ່ມຢ່າງເຂັ້ມງວດ.