ໃນວັນທີ 17 ມີນາ 2023 ນີ້, ກະຊວງເຕັກໂນໂລຊີ ແລະ ການສື່ສານ(ກຕສ) ໄດ້ຈັດກອງປະຊຸມເຜີຍແຜ່ມະຕິກອງປະຊຸມຄົບຄະນະບໍລິຫານງານພັກຄັ້ງທີ 5 ສະໄໝ XI, ມະຕິວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດ ໃນໄລຍະໃໝ່ ແລະ ມະຕິກອງປະຊຸມວຽກງານການເມືອງ-ແນວຄິດທົ່ວປະເທດຄັ້ງທີ 5 ໂດຍໃຫ້ກຽດເຂົ້າຮ່ວມເປັນປະທານ ແລະ ເຜີຍແຜ່ເອກະສານຂອງ ສະຫາຍ ບັນດິດ ສຈ. ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກຕສ, ມີບັນດາຮອງລັດຖະມົນຕີ, ຄະນະປະຈຳພັກກະຊວງ, ຄະນະພັກກະຊວງ, ເລຂາ, ຮອງເລຂາໜ່ວຍພັກ ແລະ ສະມາຊິກພັກ ທີ່ຂຶ້ນກັບອົງຄະນະພັກກະຊວງເຂົ້າຮ່ວມ.

ໂອກາດດັ່ງກ່າວ, ສະຫາຍ ບັນດິດ ສຈ. ບໍ່ວຽງຄຳ ວົງດາລາ ໄດ້ຍົກໃຫ້ເຫັນມະຕິຂອງກອງປະຊຸມຄົບຄະນະ ຄັ້ງທີ 5 ຂອງຄະນະບໍລິຫານງານສູນກາງພັກ ສະໄໝ XI ຊຶ່ງມະຕິກອງປະຊຸມໄດ້ຍົກສູງຄວາມຮັບຜິດຊອບທາງດ້ານການເມືອງ, ສຸມສະຕິປັນຍາ, ປຶກສາຫາລື ແລະ ໃຫ້ທິດຊີ້ນຳຕໍ່ບັນຫາສຳຄັນ ເປັນຕົ້ນແມ່ນ ແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາໄລຍະ 9 ເດືອນ, ວຽກງານຈຸດສຸມທ້າຍປີ 2022 ແລະ ທິດທາງແຜນການປີ 2023 ຕິດພັນກັບ 2 ວາລະແຫ່ງຊາດ. ຊຶ່ງໃນທິດທາງຕໍ່ໜ້າ 2023 ຕ້ອງສູ້ຊົນຍູ້ແຮງການພັດທະນາເສດຖະກິດ-ສັງຄົມ ໃຫ້ໄປຕາມທິດຂະຫຍາຍຕົວຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ມີຄວາມຍືນຍົງ, ຄາດຄະເນຜົນກະທົບພາຍນອກຕໍ່ປະເທດລາວ ບົນພື້ນຖານນັ້ນກຳນົດມາດຕະການຕົວຈິງເພື່ອແກ້ໄຂບັນຫາ ແລະ ນໍາສະເໜີຕໍ່ສະພາແຫ່ງຊາດເພື່ອພິຈາລະນາຮັບຮອງເອົາ ເປັນຕົ້ນແມ່ນ ອັດຕາເຕີບໂຕທາງເສດຖະກິດໃນລະດັບ GDP 4,5% ຂຶ້ນໄປ ຊຶ່ງຄາດໝາຍທີ່ມີຄຸນລັກສະນະບຸກບືນສູ້ຊົນສູງສົມຄວນໃນເງື່ອນໄຂສະພາບແວດລ້ອມຫຼາຍດ້ານບໍ່ເອື້ອອຳນວຍ, ສ້າງລາຍຮັບເຂົ້າງົບປະມານໃຫ້ໄດ້ 17% ຂອງ GDP ຂຶ້ນໄປ, ສຶກສາຄົ້ນຄວ້າລະອຽດກ່ຽວກັບການປັບຂຶ້ນອັດຕາດັດສະນີເງິນເດືອນຂອງພະນັກງານ-ລັດຖະກອນ, ທະຫານ, ຕຳຫຼວດ. ພ້ອມນັ້ນ, ຄະນະບໍລິຫານງານສູນກາງພັກໄດ້ຮຽກຮ້ອງໃຫ້ຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍຕ້ອງທຸ່ມເທສະຕິປັນຍາ, ເຫື່ອແຮງ ແລະ ຍົກສູງຄວາມຮັບຜິດຊອບທາງດ້ານການເມືອງເພື່ອນຳພາຊີ້ນຳການຜັນຂະຫຍາຍ ແລະ ຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມຄັ້ງນີ້ຕິດພັນກັບການຍູ້ແຮງຂະບວນການ “ແຂ່ງຂັນຮັກຊາດ ແລະ ພັດທະນາ”, ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກໍຄືການແກ້ໄຂບັນຫາຕົວຈິງທີ່ເກີດຂຶ້ນຢູ່ແຕ່ລະຂົງເຂດວຽກງານໃຫ້ເປັນລະບົບຕໍ່ເນື່ອງ ແລະ ມີປະສິດທິພາບ.