ໃນຕອນເຊົ້າຂອງວັນທີ 16 ມີນາ 2023 ຜ່ານມາ, ກົມແຜນການ ແລະ ການເງິນ (ກຜງ), ກະຊວງເຕັກໂນໂລຊີ ແລະ ການສື່ສານ (ກຕສ), ໄດ້ເປີດຊຸດຝຶກອົບຮົມວຽກງານການເງິນຂັ້ນ II ຂຶ້ນທີ່ຫ້ອງປະຊຸມໃຫຍ່ຂອງ ກຕສ (ເຂດສີສະເກດ). ໂດຍການເປັນປະທານຂອງ ທ່ານ ສຸດໃຈ ພິມມະສີ ຫົວໜ້າກົມແຜນການ ແລະ ການເງິນ, ມີບັນດາຄະນະກົມ/ທຽບເທົ່າ, ຄະນະພະແນກ/ຮອງພະແນກ ພ້ອມດ້ວຍພະນັກງານວິຊາການພາຍໃນ ກຕສ ເຂົ້າຮ່ວມທັງໝົດ 70 ກວ່າທ່ານ.

ໃນໂອກາດນີ້, ທ່ານ ຫົວໜ້າກົມແຜນການ ແລະ ການເງິນ ໄດ້ກ່າວວ່າ: ການຝຶກອົບຮົມໃນຄັ້ງນີ້ ໄດ້ຈັດຂຶ້ນໃນທ່າມກາງບັນຍາກາດ ທີ່ບັນດາກົມ/ທຽບເທົ່າ ພາຍໃນ ກຕສ ພວມຕັ້ງໜ້າສູ້ຊົນ ແລະ ອອກແຮງສຸມໃສ່ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ ກໍຄືແຜນງົບປະມານ ປະຈໍາປີ 2023 ຢ່າງແຂ່ງຂັນ ແລະ ຈົດຈໍ່ ເພື່ອສາມາດປະຕິບັດບັນດາຄາດໝາຍສູ້ຊົນຕ່າງໆທີ່ໄດ້ກໍານົດໄວ້ໃນແຜນງົບປະມານປະຈໍາປີ ໃຫ້ບັນລຸຕາມເປົ້າໝາຍທີ່ວາງໄວ້. ພ້ອມນີ້, ການຝຶກອົບຮົມ ຍັງຈະຊ່ວຍໃຫ້ບັນດາກົມ/ທຽບເທົ່າ ຂຶ້ນແຜນການໃຊ້ຈ່າຍງົບປະມານເປັນໄປຕາມແຜນການ, ງົບປະມານທີ່ໄດ້ອະນຸມັດ ແລະ ການສະຫຼຸບລາຍງານ ແຕ່ລະໄລຍະຖືກຕ້ອງຕາມລະບຽບຫຼັກການ. ສະນັ້ນ, ເພື່ອຮັບປະກັນ ແຜນລາຍຈ່າຍຫົວໜ່ວຍງົບປະມານຂັ້ນ II ໃຫ້ບັນລຸແນ່ນອນມັນຕ້ອງໄດ້ປະກອບມີ 03 ແຜນຄື: ແຜນວຽກ, ແຜນຄົນ ແລະ ແຜນເງິນ ຊຶ່ງບໍ່ສາມາດຂາດອັນໃດອັນໜຶ່ງໄດ້ ເວົ້າລວມ, ເວົ້າສະເພາະ ​ກໍ​ເພື່ອ​ເຮັດ​ໃຫ້ການ​ຈັດ​ຕັ້ງປະຕິບັດ​ຂອງ​ຫົວໜ່ວຍ​ງົບປະມານ​ຂັ້ນ II ຖືກຕ້ອງ​ຕາມ​ລະບຽບ​ການ ​ຂອງ​ກະຊວງ​ການ​ເງິນ​ໄດ້ກຳນົດ​ໄວ້, ພ້ອມທັງເປັນການຍົກ​ສູງ​ຄວາມ​ຮັບຜິດຊອບ, ​ເປັນ​ເຈົ້າ​ການ​ໃນ​ການຈັດ​ຕັ້ງ​ປະບັດ​ໃຫ້​ເກີດ​ມີ​ປະສິດ​ທິ​ພາບ ​ແລະ ປະສິດ​ທິ​ຜົນ​ສູງ​ສຸດ ​ເຮັດ​ໃຫ້ຂອດການຈັດ​ຕັ້ງ​ປະຕິບັດ​ຕົວ​ຈິງ ສາມາດສະຫຼຸບ ​ແລະ ລາຍ​ງານ​ໃຫ້​ຖືກຕ້ອງ​ຕາມ​ຫຼັກການ​ຂອງ​ວຽກ​ງານ​ການ​ເງິນ ​ແລະ ບັນຊີ.

ໃນການຝຶກອົບຮົມຄັ້ງນີ້, ທ່ານ ນາງ ດາວອນ ສາມາວົງ ຮອງຫົວໜ້າກົມແຜນການ ແລະ ການເງິນ ໄດ້ຂຶ້ນນໍາສະເໜີ ກ່ຽວກັບພາລະບົດບາດ, ໜ້າທີ່ ແລະ ຂອບເຂດສິດ ຂອງຫົວໜ່ວຍງົບປະມານຂັ້ນ II ແລະ ຄໍາແນະນໍາກ່ຽວກັບການຈັດຕັ້ງປະຕິບັດ ລາຍຈ່າຍຫົວໜ່ວຍງົບປະມານຂັ້ນ II ຂອງ ກຕສ. ພ້ອມນີ້, ຍັງໄດ້ຮັບຟັງການນໍາສະເໜີຂອງຄະນະພະແນກພາຍໃນ ກຜງ ໃນຫຼາຍຫົວຂໍ້ ເປັນຕົ້ນແມ່ນ: ຄວາມຮູ້ພື້ນຖານກ່ຽວກັບວຽກງານງົບປະມານ, ການຂຶ້ນແຜນ ແລະ ການປະກອບເອກະສານລາຍຈ່າຍຂອງຫົວໜ່ວຍງົບປະມານຂັ້ນ II, ການຄິດໄລ່ແຜນງົບປະມານ, ການສະຫຼຸບສັງລວມ ແລະ ຕິດຕາມການຈັດຕັ້ງປະຕິບັດ ຂອງບັນດາກົມ/ທຽບເທົ່າ ເພື່ອໃຫ້ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈ ກ່ຽວກັບວຽກງານການເງິນ ແລະ ນໍາເອົາໄປໝູນໃຊ້ເຂົ້າໃນໜ້າທີ່ວຽກງານ ທີ່ຕົນຮັບຜິດຊອບໃຫ້ຖືກຕາມລະບຽບການ. ຊຸດຝຶກອົບຮົມ ໄດ້ດໍາເນີນໄປເປັນເວລາ 02 ວັນ ຈຶ່ງໄດ້ສໍາເລັດລົງ.