ກົມເຕັກໂນໂລຊີດິຈິຕ໋ອນ, ກະຊວງເຕັກໂນໂລຊີ ແລະ ການສື່ສານ (ກຕສ) ຮ່ວມກັບ ມະຫາວິທະຍາໄລ ແຫ່ງຊາດ ໄດ້ຈັດກອງປະຊຸມສໍາມະນາ ບົດບາດ ແລະ ຄວາມສໍາຄັນຂອງການນໍາໃຊ້ເຕັກໂນໂລຊີດິຈິຕ໋ອນ ໃນຍຸກອຸດສາຫະກໍາ 4.0 ຂຶ້ນໃນວັນທີ 18 ກໍລະກົດ 2023 ຜ່ານມານີ້, ທີ່ສະໂມສອນຊັ້ນ 2 ຂອງ ມະຫາວິທະຍາໄລ ແຫ່ງຊາດ ໂດຍໃຫ້ກຽດເປັນປະທານຂອງ ທ່ານ ຮສ.ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລ ແຫ່ງຊາດ, ຊຶ່ງມີ ທ່ານ ອານຸສອນ ອັກຄະວົງ ຮອງຫົວໜ້າກົມເຕັກໂນໂລຊີດິຈິຕ໋ອນ, ກະຊວງເຕັກໂນໂລຊີ ແລະ ການສື່ສານ, ມີຫົວໜ້າຫ້ອງການ, ຫົວໜ້າພະແນກ, ບັນດາຄູ-ອາຈານ, ນັກສຶກສາ ຈາກ 08 ຄະນະ ຂອງ ມະຫາວິທະຍາໄລແຫ່ງຊາດ, ບັນດາວິທະຍາໄລ ແລະ ບັນດາສະຖາບັນການສຶກສາ ອ້ອມຂ້າງນະຄອນຫຼວງວຽງຈັນ ພ້ອມດ້ວຍຄະນະຮັບຜິດຊອບ ເຂົ້າຮ່ວມເກືອບ 200 ທ່ານ.

ຈຸດປະສົງໃນການຈັດກອງປະຊຸມສໍາມະນາ ແມ່ນເພື່ອເຜີຍແຜ່ວຽກງານການຫັນເປັນທັນສະໄໝ ແລະ ການນໍາໃຊ້ເຕັກໂນໂລຊີດິຈິຕ໋ອນ ໃນຍຸກອຸດສາຫະກໍາ 4.0 ເພື່ອຊຸກຍູ້ສົ່ງເສີມ ເຂົ້້າໃນຂະແໜງການສຶກສາ ທັງພາກລັດ ແລະ ເອກະຊົນ ພ້ອມທັງເປັນການພັດທະນາຊັບພະຍາກອນມະນຸດທາງດ້ານການນໍາໃຊ້ເຕັກໂນໂລຊີດິຈິຕ໋ອນ ໃນທົ່ວສັງຄົມ ເພື່ອຍົກສູງປະສິດທິພາບຂອງການຄຸ້ມຄອງບໍລິຫານລັດໃຫ້ມີຄວາມປອດໄພ ແລະ ເກີດຜົນປະໂຫຍດສູງສຸດ. ພ້ອມນັ້ນ, ກໍເພື່ອເປັນການຈັດຕັ້ງປະຕິບັດ ວິໄສທັດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕ໋ອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາເສດຖະກິດດິຈິຕ໋ອນແຫ່ງຊາດ ໄລຍະ 5 ປິ (2021-2025) ໃຫ້ປາກົດເປັນຈິງ.

ໃນກອງປະຊຸມສໍາມະນາຄັ້ງນີ້, ບັນດາຜູ້ເຂົ້າຮ່ວມໄດ້ຮັບຟັງການນໍາສະເໜີກ່ຽວກັບ ນະໂຍບາຍການຫັນເປັນດີຈິຕ໋ອນ, ເສດຖະກິດດິຈິຕ໋ອນ, ເຕັກໂນໂລຊີກຸ່ມຂໍ້ມູນຜູກພັນ (Blockchain), ວຽກງານການສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ ຫຼື Start Up, ວຽກງານການຄຸ້ມຄອງເຕັກໂນໂລຊີດິຈິຕ໋ອນ ແລະ ທຸລະກໍາທາງເອເລັກໂຕຣນິກ. ພາຍຫຼັງຮັບຟັງການນໍາສະເໜີ, ຜູ້ເຂົ້າຮ່ວມທັງໝົດຍັງໄດ້ພ້ອມກັນຄົ້ນຄວ້າ, ສົນທະນາແລກປ່ຽນຄໍາຄິດຄໍາເຫັນທີ່ຫຼາກຫຼາຍ ໂດຍສະເພາະແມ່ນການຊອກຫາວິທີທາງແກ້ໄຂບັນຫາປາກົດການຫຍໍ້ທໍ້ໃນການນໍາໃຊ້ສື່ສັງຄົມອອນລາຍຂອງໄວໜຸ່ມຮ່ວມກັນ. ພ້ອມດຽວກັນນັ້ນ, ບັນດາຄູ-ອາຈານ ແລະ ນັກສຶກສາ ກໍໄດ້ໃຫ້ຄວາມສົນໃຈແລກປ່ຽນບົດຮຽນ ໂດຍສະເພາະແມ່ນເຕັກໂນໂລຊີໃໝ່ ເຊັ່ນ: ເຕັກໂນໂລຊີກຸ່ມຂໍ້ມູນພູກພັນເປັນຕົ້ນ. 

ຕອນທ້າຍຂອງການສໍາມະນາ, ທ່ານ ຮສ.ປອ. ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ ຍັງໄດ້ມີຄໍາເຫັນສະຫຼຸບ ແລະ ຕີລາຄາ ຜົນສໍາເລັດຂອງການສໍາມະນາດັ່ງກ່າວ ພ້ອມທັງສະເໜີໃຫ້ມີການຈັດສໍາມະນາທີ່ເປັນປະໂຫຍດເພື່ອໃຫ້ຄວາມຮູ້ໃນລັກສະນະແບບນີ້ໃຫ້ຫຼາຍຂຶ້ນຕື່ມໃນອະນາຄົດ.