ກົມຄວາມປອດໄພທາງໄຊເບີ, ກະຊວງເຕັກໂນໂລຊີ ແລະ ການສື່ສານ ຮ່ວມກັບ ອົງການ Cyber4Dev Program ຈາກສະຫະພັນເອຮົບ (EU)  ໃນລະຫວ່າງວັນທີ 12-13 ກັນຍາ 2023 ທີ່ ໂຮງແຮມ ແລນມາກ, ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມເປັນປະທານກ່າວເປີດຂອງ ທ່ານ ແກ້ວວິສຸກ ໂສລະພົມ, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ຊຶ່ງມີຜູ້ເຂົ້າຮ່ວມຈາກກົມ/ທຽບເທົ່າ ພາຍໃນ ກຕສ, ພະແນກເຕັກໂນໂລຊີ ແລະ ການສື່ສານ (ພຕສ) ແລະ ຜູ້ຊ່ຽວຊານ ເຂົ້າຮ່ວມລວມທັງໝົດ ຈໍານວນ 35 ກວ່າທ່ານ.

ຈຸດປະສົງກອງປະຊຸມສຳມະນາຄັ້ງນີ້ແມ່ນເພື່ອສ້າງຄວາມເຂັ້ມແຂງວຽກງານດ້ານຄວາມປອດໄພໄຊເບີ ແລະ  ເປັນການສົ່ງເສີມຄວາມຮັບຮູ້ ແລະ ຄວາມເຂົ້າໃຈ ກ່ຽວກັບ ການປະສານງານ ແລະ ຈັດການຕໍ່ເຫດສຸກເສີນທາງໄຊເບີ ຂອງໜ່ວຍງານຕອບໂຕ້ເຫດສຸກເສີນທາງລະບົບຄອມພິວເຕີຂອງພາກລັດ ແລະ ໜ່ວຍງານຜູ້ໃຫ້ບໍລິການທາງອິນເຕີເນັດ-ໂທລະຄົມ ເພື່ອໃຫ້ເຮັດວຽກຮ່ວມກັນຢ່າງມີປະສິທິພາບ ໃນການຫຼຸດຜ່ອນຜົນກະທົົບ ແລະ ຄວາມເສຍຫາຍຕໍ່ລະບົບພື້ນຖານໂຄງລ່າງຂໍ້ມູນຂ່າວສານທີ່ສຳຄັນ ໂດຍສະເພາະແມ່ນ ລະບົບທີີ່ໃຫ້ບໍລິການ, ການນໍາໃຊ້ເຄື່ອງມືເຝົ້າລະວັງ, ຕິດຕາມ ແລະ ແຈ້ງເຕືອນ, ການແລກປ່ຽນຂໍ້ມູນຂ່າວສານ, ການປະສານງານພາຍໃນ ພາກພື້ນ ແລະ ສາກົນ, ຊຶ່ງວຽກງານດັ່ງກ່າວຜູ້ໃຫ້ບໍລິການທາງອິນເຕີເນັດ-ໂທລະຄົມ ແລະ ຂະແໜງການຕ່າງໆທີ່ກ່ຽວຂ້ອງຈຳເປັນຕ້ອງໄດ້ມີທີມງານເພື່ອມາເຮັດໜ້າທີ່ປົກປ້ອງລະບົບພື້ນຖານໂຄງລ່າງຂອງຕົນໃຫ້ປອດໄພຈາກການໂຈມຕີທາງໄຊເບີ.

ໂອກາດດັ່ງກ່າວ, ທ່ານ ຮອງລັດຖະມົນຕີ ໄດ້ມີຄຳເຫັນວ່າ: ໃນປັດຈຸບັນ, ການນໍາໃຊ້ເຕັກໂນໂລຊີ ໄດ້ມີການຂະຫຍາຍຕົວຢ່າງກວ້າງຂວາງ ແລະ ທັນສະໄໝຫຼາຍ ທັງການແລກປ່ຽນ ຫຼື ສົ່ງຕໍໍ່ຂໍ້ມູນ, ການເກັບກໍາຂໍ້ມູນ ແລະ ການຮັກສາລະບົບຂໍ້ມູນຂ່າວສານຕ່າງໆ ລ້ວນແລ້ວແຕ່ນໍາໃຊ້ອິນເຕີເນັດ, ຊຶ່ງຂໍ້ມູນຕ່າງໆເຫຼົ່ານັ້ນລ້ວນແຕ່ເປັນຂໍ້ມູນສໍາຄັນ ຫຼື ຂໍ້ມູນທີ່ເປັນຄວາມລັບຂອງອົງກອນ ແຕ່ຈະເຮັດແນວໃດເພື່ອຈະໃຫ້ການປ້ອງກັນຂໍ້ມູນໃຫ້ມີຄວາມປອດໄພຈາກໄພຄຸມຄາມຕ່າງໆຈາກພາຍນອກ ຫຼື ກຸ່ມຄົນບໍ່ຫວັງດີ ທີ່ຫວັງຈະເຈາະລະບົບເຄືອຂ່າຍ ເພື່ອລັກ ຫຼື ໂຈລະກໍາເອົາຂໍ້ມູນ. ສະນັ້ນ, ການຈັດສຳມະນາຄັ້ງນີ້ຈະຊ່ວຍໃຫ້ຜູ້ເຂົ້າຮ່ວມໄດ້ຮັບຄວາມຮູ້ ແລະ ບົດຮຽນ ທີ່ກົມຄວາມປອດໄພໄຊເບີ ແລະ ອົງ ການ Cyber4Dev Program ນຳມາສະເໜີ ເພື່ອເອົາໄປໝູນໃຊ້ເຂົ້າໃນການປະຕິບັດວຽກງານຕົວຈິງ ໃຫ້ມີປະສິດທິພາບຫຼາຍຂຶ້ນ.

          ຂ່າວ ກົມຄວາມປອດໄພທາງໄຊເບີ