ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ (ກຕສ), ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ (07/10/1994 - 07/10/2023) ຄົບຮອບ 29 ປີ ຂຶ້ນໃນວັນທີ 05 ຕຸລາ 2023, ທີ່ຫ້ອງປະຊຸມ ຊັ້ນ 1 (ຕຶກ F) ຂອງສະຖາບັນເຕັກໂນໂລຊີການສື່ສານຂໍ້ມູນຂ່າວສານ. ໂດຍການເປັນປະທານຂອງ ທ່ານ ປອ. ສັນ​ຕິ​ສຸກ ສິມ​ມາ​ລາ​ວົງ ​ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີບັນດາຕາງໜ້າຈາກກົມ, ສູນ, ສະຖາບັນ, ບໍລິສັດ, ພະນັກງານຄູ-ອາຈານ, ອະດີດນັກສຶກສາ ແລະ ນັກສຶກສາ ເຂົ້າຮ່ວມຢ່າງພ້ອມພຽງ.

ຈຸດປະສົງຂອງການຈັດພິທີໃນຄັ້ງນີ້ ກໍເພື່ອສະແດງໃຫ້ຮູ້ເຖິງຄວາມສຳຄັນຂອງຄຳວ່າ “ຄູ” ໝາຍເຖິງ ຄົນທີ່ມີຄວາມຮູ້ ແລະ ປະສົບການ ຊຶ່ງສາມາດນໍາໄປຖ່າຍທອດຄວາມຮູ້ ແລະ ປະສົບການນັ້ນໄປສູ່ຜູ້ອື່ນໆ. ຮູບການຖ່າຍທອດຄວາມຮູ້ ຈາກຜູ້ຮູ້ໄປສູ່ຜູ້ບໍ່ຮູ້ ເອີ້ນວ່າ: “ການສອນ-ການຮຽນ” ການສອນ-ການຮຽນ ເປັນປັດໄຈສໍາຄັັນໜຶ່ງ ໃນການຕັດສິນຄຸນນະພາບຂອງການສຶກສາ ກໍຄື ການພັດທະນາມະນຸດທຸກຄົນມີຄວາມຮູ້ໂດຍຜ່ານການສອນຂອງຄູ ແລະ ທຸກຄົນລ້ວນແຕ່ມີຄູສອນຕົນເອງ; “ ຄູ ” ເປັນບຸກຄົນທີ່ສໍາຄັນ ແລະ ມີຄວາມຈໍາເປັນທີ່ສຸດໃນການພັດທະນາເສດຖະກິດ-ສັງຄົມ ເພາະຄູເປັນຜູ້ສ້າງຄົນ ການຄັດເລືອກ “ຄູ” ກໍຄື ຜູ້ທີ່ໄດ້ຮຽນໃນຂະແໜງການສຶກສາ ແລະ ແມ່ນບຸກຄົນທີ່ມີຄວາມຮູ້, ຄວາມສາມາດ, ມີຄຸນສົມບັດສິນທໍາປະຕິວັດຢ່າງແທ້ຈິງ. ການສອນໜັງສືເປັນເລື່ອງທີ່ງ່າຍ ແຕ່ການທີ່ຈະສອນຄົນ ຫຼື ສອນນັກຮຽນ, ນັກສຶກສາ ໃຫ້ກາຍເປັນຄົນດີ ຄົນເກັັ່ງແບບມີວິໄນ, ກະຕັນຍູ, ແມ່ນຍາກ ໂດຍສະເພາະແມ່ນໃນຍຸກປັດຈຸບັນ ຍຸກເຕັກໂນໂລຊີຂໍ້ມູນຂ່າວສານມີການປ່ຽນແປງຢ່າງວ່ອງໄວ; ຜູ້ທີ່ຖືກເລືອກໃຫ້ເປັນ “ຄູ” ເປັນຄົນຮຽນເກັ່ງ-ສອນເກັ່ງ ເພື່ອສາມາດສອນນັກສຶກສາໃຫ້ໄດ້ຄຸນນະພາບ ກາຍເປັນຄົນທີ່ມີປະສິດທິພາບແກ່ປະເທດຊາດໃນອະນາຄົດ ດັ່ງຄໍາເວົ້າຂອງ ທ່ານ ປະທານ ສຸພານຸວົງ ທີ່ວ່າ: “ປະເທດຊາດບໍ່ອາດຝາກຝັງຄວາມຫວັງໃຫ້ກັບຄົນທີ່ມີຄວາມຮູ້ ຄວາມສາມາດ ແຕ່ຂາດຄຸນສົມບັດສິນທໍາປະຕິວັດ”; “ຄູ” ແມ່ນພໍ່ແມ່ຜູ້ທີສອງຂອງນັກຮຽນ ນັກສຶກສາ ເປັນຜູ້ສິດສອນ ການຮຽນ, ການເປັນຄົນ, ການດໍາລົງຊີວິດຢູ່ຮ່ວມກັນໃນສັງຄົມ, ຄູດີ ນັກຮຽນຈະຊຶມຊັບຮັັບຮູ້ ຮຽນແຕ່ສິ່ງດີໆ ປະພຶດຕົນ ແລະ ປະຕິບັດແຕ່ແນວທີ່ດີມີປະໂຫຍດຕໍ່ສັງຄົມ. ພ້ອມກັນນັ້ນ, “ຄູ” ຕ້ອງເປັນຄົນມີບຸກຄະລິກດີ, ເວົ້າຈາມ່ວນ, ເປັນແບບຢ່າງທີ່ດີ ແລະ ເປັນຄົນພ້ອມເສຍສະຫຼະເພື່ອສ່ວນລວມ.

ໃນພິທີທີ່ມີຄວາມໝາຍຄວາມສຳຄັນໃນຄັ້ງນີ້, ທ່ານ ຮອງລັດຖະມົນຕີ ກຕສ ຍັງໄດ້ໂອ້ລົມຕໍ່ພະນັກງານລັດຖະກອນຄູ ເພື່ອເປັນທິດໃນການສືບຕໍ່ປະຕິບັດວຽກງານ ການຮຽນ-ການສອນ ໃນສົກສຶກສາ 2023-2024 ຊຶ່ງມີເນື້ອໃນວ່າ: ຄູ-ອາຈາ​ນ ​​ຕ້ອງ​​ເອົາ​ໃຈ​ໃສ່​ໃນ​ການ​ຄົ້ນຄວ້າ​ຮໍ່າຮຽນ ​ວິຊາ​ສະ​ເພາະ​ຂອງ​ຕົນໃຫ້​ຫຼາຍ​ຂຶ້ນ​ຕື່ມ ​ເພື່ອ​​ເພີ່ມ​ທັກ​ສະ​ຄວາມ​ສາມາດ​ໃນ​ດ້ານ​ເຕັກ​ໂນ​ໂລ​ຊີ​ໃຫ້ຫຼາຍ ​ແລະ ນໍາ​ໃຊ້​ເຕັກ​ໂນ​ໂລ​ຊີ ICT ​ເຂົ້າ​ໃນ​ວຽກ​ງານ​ການ​ຮຽນ-​ການ​ສອນ ​ນັບ​ມື້​ສູງ​ຂຶ້ນ​​ເລື້ອຍໆ; ຄູ-ອາຈານ ຕ້ອງມີ​ຄວາມ​ມັກ-ຮັກໃນອາຊີບຄູ ແລະ ຖື​ເອົາອາຊີບຄູ ເປັນອາຊີບທີ່ມີກຽດອັນສູງສົ່ງ ​ເພາະວ່າຄູເປັນແມ່ພິມຂອງຊາດໃນການສ້າງບຸກຄະລາກອນໃຫ້ມີອາຊີບອອກ​ໄປພັດທະນາສັງຄົມ ກໍຄື ປະເທດຊາດ; ຜູ້ທີ່ເປັນຄູຕ້ອງມີ​ຈັນ​ຍາ​ບັນ​ຕໍ່ອາຊີບຄູ, ມີ​ຄວາມ​ຮັບຜິດຊອບ​ສູງ​ຕໍ່ໜ້າ​ທີ່ ​ແລະ ບໍ່ສວຍ​​​ໃຊ້ໜ້າ​ທີ່​ຄວາມ​ເປັນ ​ຄູ ເພື່ອສະແຫວງຫາຜົນປະໂຫຍດສ່ວນ​ຕົວຈາກ​ຜູ້​ອື່ນ; ຄູ-ອາຈານ ຕ້ອງເອົາໃຈໃສ່ເປັນແບບຢ່າງໃນການປະຕິບັດລະບຽບການຕ່າງໆ ແລະ ປະຕິບັດໂມງເວລາຂຶ້ນ​ຫ້ອງສິດສອນຢ່າງເຂັ້ມງວດ; ຄູ-ອາຈານ ຕ້ອງເພີ່ມຄວາມເອົາໃຈໃສ່ຍົກລະດັບຄວາມຮູ້-ຄວາມສາມາດຕົນເອງ ແຕ່ລະດ້ານຢ່າງຕໍ່ເນື່ອງ, ຫ້າວຫັນປະຕິບັດໜ້າທີ່​ມອບ​ໝາຍ ແລະ ຕັ້ງໜ້າຄົ້ນຄວ້າວິ​ໄຈຂະ​ແໜງ​ການ ​ໄອ​ຊີ​ທີ, ນໍາໃຊ້ອຸປະກອນ​ໄອ​ຊີ​ທີ ແລະ ສື່ການສອນທີ່​ທັນ​ສະ​ໄໝ​ເຂົ້າ​ໃນກິດຈະກຳ ການຮຽນ​-ການສອນ; ຄະນະ​ນໍາ​ ຂອງສະ​ຖາ​ບັນ ຕ້ອງຕິດຕາມ, ກວດກາ ການ​ຮຽນ​-ການ​ສອນ​ ໃຫ້ເປັນປົກກະຕິຕໍ່​ເນື່ອງ ​ແລະ ແກ້ໄຂບັນຫາ​ໃຫ້ທັນເວລາ ​ເມື່ອ​ພົບ​ເຫັນ​ປະກົດ​ການ​ຫຍໍ້​ທໍ້​ ຊຶ່ງວຽກ​ດັ່ງກ່າວແມ່ນຄວາມຮັບຜິດຊອບໂດຍກົງ ຂອງຄະນະນຳແຕ່ລະຂັ້ນ; ສົ່​ງ​ເສີມໃຫ້ພະນັກງານ ຄູ-ອາຈານ ສາມາດເຄື່ອນໄຫວຕາມພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບ ຂອງຕົນໃຫ້ມີປະສິດທິຜົນ, ຕ້ານ ແລະ ແກ້ໄຂທັດສະນະແນວຄິດຖືເບົາຕໍ່ໜ້າ​ທີ່ວຽກງານການສິດສອນ.

ໃນພິທີດັ່ງກ່າວຍັງໄດ້ມີການມອບໃບຍ້ອງຍໍຄູສອນດີ ເພື່ອສະແດງໃຫ້ເຫັນເຖິງຜົນງານການສິດສອນໃນໄລຍະຜ່ານມາ. ຈາກນັ້້ນ, ຜູ້ເຂົ້າຮ່ວມຍັງຮັບຊົມການສະແດງສິລະປະຈາກນ້ອງນັກສຶກສາພາຍໃນສະຖາບັນ, ຮັບຊົມວິດີໂອປະຫວັດການ ເຄື່ອນໄຫວຂອງສະຖາບັນ ໃນໄລຍະຜ່ານມາ ແລະ ວິດີໂອເລົ່າມູນເຊື້ອຂອງນາຍຄູຄໍາ, ນັກສຶກສາ ຂຶ້ນອ່ານກາບກອນອວຍພອນ ແລະ ມອບຕ່າຂອງຂວັນອວຍພອນບັນດາຄູ-ອາຈານອີກດ້ວຍ.