ໃນວັນທີ 21 ພະຈິກ 2023 ນີ້, ສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ໄດ້ລົງຢ້ຽມຢາມແລກປ່ຽນບົດຮຽນການນໍາໃຊ້ເຕັກໂນໂລຊີທັນສະໄໝ ຢູ່ເຂດເສດຖະກິດພິເສດ ກວມລວມໄຊເສດຖາ ນະຄອນຫຼວງວຽງຈັນ, ຊຶ່ງນຳພາໂດຍ ສະຫາຍ ນາງ ເກສອນ ສຸລິວົງ ຄະນະພັກກະຊວງ, ປະທານສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ, ຫົວໜ້າສູນສົ່ງເສີມ ແລະ ຖ່າຍຖອດເຕັກໂນໂລຊີ, ມີຄະນະບໍລິຫານງານສະຫະພັນແມ່ຍິງ ພ້ອມດ້ວຍຄະນະຮາກຖານ, ຄະນະໜ່ວຍ ແລະ ສະມາຊິກເຂົ້າຮ່ວມທັງໝົດຈຳນວນ 60 ສະຫາຍ .

ຈຸດປະສົງແມ່ນເພື່ອເປັນການແລກປ່ຽນຖອດຖອນບົດຮຽນ ວິທີການໝູນໃຊ້ເຕັກໂນໂລຊີດິຈິຕອນທີ່ທັນສະໄໝ ປະກອບສ່ວນເຂົ້າໃນວຽກງານດ້ານຕ່າງໆພາຍໃນ ເຂດເສດຖະກິດພິເສດ ກວມລວມໄຊເສດຖາ ຊຶ່ງເປັນວຽກງານໜຶ່ງທີ່ຕິດພັນກັບແຜນພັດທະນາເສດຖະກິດດິຈິຕອນ ແຫ່ງຊາດ ໄລຍະ 05 ປີ (2021-2025) ແລະ ຍັງເປັນການສ້າງຂະບວນການເພື່ອຂໍ່ານັບຮັບຕ້ອນ ວັນສໍາຄັນຕ່າງໆຂອງຊາດ-ຂອງພັກ ກໍຄື ກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ ທີ່ຈະມາເຖິງ.

ການລົງແລກປ່ຽນໃນຄັ້ງນີ້ ເອື້ອຍນ້ອງແມ່ຍິງໄດ້ຮັບຊົມຮັບຟັງການນຳສະເໜີພາບລວມການບໍລິຫານ, ການເຕີບໃຫຍ່ຂະຫຍາຍຕົວທາງດ້ານການດຳເນີນທຸລະກິດ ໂດຍສະເພາະແມ່ນການນຳໃຊ້ເຕັກໂນໂລຊີເຂົ້າຊ່ວຍໃນການຈັດຕັ້ງປະຕິບັດໜ້າວຽກຕ່າງໆ. ນອກນັ້ນ, ຍັງໄດ້ຢ້ຽມຊົມ ພື້ນທີ່ພາຍໃນ ເຂດເສດຖະກິດພິເສດ ກວມລວມໄຊເສດຖາ ຊຶ່ງເປັນຂໍ້ມູຸນ ແລະ ບົດຮຽນຫຼາຍຢ່າງໃຫ້ແກ່ເອື້ອຍນ້ອງແມ່ຍິງ ບໍ່ວ່າຈະເປັນທາງດ້ານການນໍາໃຊ້ເຕັກໂນໂລຊີດິຈິຕອນ ຫຼື ການສ້າງໂອກາດໃນການສ້າງລາຍໄດ້ເສີມ.

ຂ່າວ: ສະຫະພັນແມ່ຍິງ ກຕສ