ໃນຕອນເຊົ້າຂອງວັນທີ 08 ພຶດສະພາ 2024 ນີ້, ທີ່ຫ້ອງປະຊຸມໃຫຍ່ ກະຊວງເຕັກໂນໂລຊີ ແລະ ການສື່ສານ (ກຕສ) ເຂດສີສະເກດ ໄດ້ມີກອງປະຊຸມປະເມີນຜົນການຈັດຕັ້ງຜັນຂະຫຍາຍບັນດາແຜນວຽກບູລິມະສິດ 03 ແຜນດໍາເນີນງານແຫ່ງຊາດ ຂອງ ວຽກສົ່ງເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກ ຊຶ່ງຈັດໂດຍ ຄະນະກໍາມາທິການ ເພື່ອຄວາມກ້າວໜ້າຂອງຂອງແມ່ຍິງ, ແມ່ ແລະ ເດັກ ກະຊວງເຕັກໂນໂລຊີ ແລະ ການສື່ສານ (ຄກມດ ກຕສ), ໂດຍໃຫ້ກຽດເຂົ້າຮ່ວມເປັນປະທານ ແລະ ດໍາເນີນກອງປະຊຸມ ຂອງ ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີ, ປະທານ ຄກມດ ກຕສ, ຊຶ່ງມີຮອງປະທານ ພ້ອມດ້ວຍຄະນະ ແລະ ພະນັກງານຊ່ວຍວຽກ ຄກມດ ຈາກບັນດາກົມ/ທຽບເທົ່າ ແລະ ບໍລິສັດດ້ານໂທລະຄົມ, ໄປສະນີ ອ້ອມຂ້າງ ກຕສ ເຂົ້າຮ່ວມຈໍານວນ 90 ກວ່າທ່ານ.

ຈຸດປະສົງຂອງກອງປະຊຸມໃນຄັ້ງນີ້ ກໍເພື່ອເປັນການທົບທວນຄືນຜົນຂອງການຈັດຕັ້ງປະຕິບັດແຜນວຽກບູລິມະສິດ 03 ແຜນດຳເນີນງານແຫ່ງຊາດ ຂອງ ວຽກງານສົ່ງເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກ ຂອງບັນດາກົມ/ທຽບເທົ່າ, ບໍລິສັດດ້ານໂທລະຄົມ, ໄປສະນີ ອ້ອມຂ້າງ ກະຊວງເຕັກໂນໂລຊີ ແລະ ການສື່ສານ ໄລຍະຜ່ານມາ ແລະ ວາງທິດທາງແຜນການໃນຕໍ່ໜ້າ.

           ກອງປະຊຸມໄດ້ດໍາເນີນໄປດ້ວຍບັນຍາກາດເຄັ່ງຮ້ອນແບບສ້າງສັນ, ບັນດາຜູ້ເຂົ້າຮ່ວມໃນກອງປະຊຸມໄດ້ເອົາໃຈໃສ່ຄົ້ນຄວ້າ ແລະ ປະກອບຄຳຄິດເຫັນຮ່ວມກັນໃນຫຼາຍໆວຽກງານ ເຊັ່ນ: ຮັບຟັງການລາຍງານຄືນບົດສະຫຼຸບການຈັດຕັ້ງປະຕິບັດວຽກງານຄວາມກ້າວໜ້າຂອງແມ່ຍິງ, ແມ່ ແລະ ເດັກ ປີ 2023 ແລະ ທິດທາງແຜນການ ປີ 2024, ປະເມີນການຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດແຜນດໍາເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ 05 ປີ ຄັ້ງທີ IV (2021-2025), ແຜນດຳເນິນງານແຫ່ງຊາດເພື່ອແມ່ ແລະ ເດັກ 05 ປີ ຄັ້ງທີ III (2021-2025), ແຜນດຳເນິນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ 05 ປີ ຄັ້ງທີ II (2021-2025). ພ້ອມກັນນີ້ ຍັງໄດ້ປຶກສາຫາລືຄົ້ນຄວ້າຄືນກ່ຽວກັບການປັບປຸງກົງຈັກການຈັດຕັ້ງ ແລະ ການເຄື່ອນໄຫວຂອງ ຄກມດ ກຕສ ແລະ ວຽກງານອື່ນໆ ເພື່ອແນໃສ່ເຮັດໃຫ້ຜູ້ເຂົ້າຮ່ວມມີຄວາມເຂົ້າໃຈຢ່າງເລິກເຊິ່ງເຖິງຖອງ, ສາມາດຈັດຕັ້ງປະຕິບັດບັນດາແຜນວຽກບູລິມະສິດຂອງ 03ແຜນດຳເນີນງານແຫ່ງຊາດ ເຂົ້າໃນແຜນການ, ແຜນງານ ໄດ້ຢ່າງມີປິສິດທິພາບ ແລະ ປະສິດທິຜົນ ເພື່ອໃຫ້ບັນລຸຕາມແຜນທີ່ກຳນົດໄວ້.

ຂ່າວ: ພະແນກ ຄກມດ

ພາບ: ພຸດດາວອນ ພາສຸວັນ