ໃນຕອນເຊົ້າຂອງວັນທີ 31 ພຶດສະພາ 2024, ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ, ກະຊວງເຕັກໂນໂລຊີ ແລະ ການສື່ສານ ໄດ້ຈັດກິດຈະກໍາສະເຫຼີມສະຫຼອງວັນເດັກສາກົນ ຄົບຮອບ 100 ປີ (01 ມິຖຸນາ 1924-01 ມິຖຸນາ 2024) ແລະ ວັນປູກຕົ້ນໄມ້ແຫ່ງຊາດ ຄົບຮອບ 44 ປີ (01 ມິຖຸນາ 1980-01 ມິຖຸນາ 2024) ພາຍໃຕ້ຄໍາຂວັນ: “ສ້າງອະນາຄົດທີ່ຍືນຍົງ ຄືການສ້າງຄວາມເຂັ້ມແຂງໃຫ້ແກ່ເດັກ”, ໂດຍໃຫ້ກຽດເຂົ້າຮ່ວມຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ມີບັນດາຮອງລັດຖະມົນຕີ, ບັນດາຄະນະກົມ/ທຽບເທົ່າ ອ້ອມຂ້າງກະຊວງ ພ້ອມດ້ວຍພະນັກງານ ແລະ ລູກຫຼານຂອງພະນັກງານເຂົ້າຮ່ວມຢ່າງພ້ອມພຽງ.

ໃນວາລະດໍາເນີນພິທີສະເຫຼີມສະຫຼອງຄັ້ງນີ້ ໄດ້ມີກິດຈະກໍາປູກຕົ້ນໄມ້ ຢູ່ອ້ອມຂ້າງບັນດາສໍານັກງານແຕ່ລະຈຸດຂອງກະຊວງເຕັກໂນໂລຊີ ແລະ ການສື່ສານ ຊຶ່ງປະກອບມີຕົ້ນໄມ້ປະດັບ ແລະ ຕົ້ນໄມ້ໃຫ້ໝາກຈໍານວນໜຶ່ງ. ພ້ອມນັ້ນ, ຍັງໄດ້ເປັນກຽດຮັບຟັງວີດີໂອສານອວຍພອນຂອງພະນະທ່ານນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດວັນເດັກສາກົນໃນປີນີ້ ແລະ ຮັບຟັງຄໍາເຫັນຂອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ຊຶ່ງສະແດງໃຫ້ເຫັນເຖິງຄວາມໝາຍຄວາມສໍາຄັນ ແລະ ຄວາມເອົາໃຈໃສ່ຕໍ່ເດັກ ຊຶ່ງຈະກາຍເປັນຜູ້ທີ່ສືບທອດພາລະກິດໃນການປົກປັກຮັກສາ ແລະ ພັດທະນາປະເທດຊາດ ທັງເປັນການປູກຈິດສໍານຶກໃຫ້ແກ່ເດັກໃຫ້ມີຄວາມມັກຮັກໃນການຮຽນຮູ້ທາງດ້ານເຕັກໂນໂລຊີ ແລະ ການສື່ສານ, ປົກປັກຮັກສາຕົ້ນໄມ້-ປ່າໄມ້ສີຂຽວໃຫ້ຍືນຍົງ. ນອກຈາກນັ້ນ ກໍໄດ້ມີການສ້າງກິດຈະກໍາຮ່ວມກັບຫຼານນ້ອຍຫຼາຍກິດຈະກໍາ ເຊັ່ນ: ການຖາມ-ຕອບ, ຮຽນຮູ້ກ່ຽວກັບອຸປະກອນໄອຊີທີ (ICT), ການແຕ້ມຮູບ-ລະບາຍສີ, ການເຕັ້ນ ແລະ ກິດຈະກໍາອື່ນໆ ເພື່ອຮັບຂອງຂວັນຂອງລາງວັນ ຊຶ່ງເຕັມໄປດ້ວຍບັນຍາກາດຄຶກຄື້ນມ່ວນຊື່ນ.