ໃນຕອນບ່າຍຂອງວັນທີ 04 ມິຖຸນາ 2024, ທີ່ຫ້ອງປະຊຸມໃຫຍ່ ສູນເຕັກໂນໂລຊີການສື່ສານຂໍ້ມູນຂ່າວສານ, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ ໄດ້ມີພິທີມອບທຶນການສຶກສາ ໃຫ້ແກ່ນັກສຶກສາ ສາຂາ ວິສະວະກໍາເຕັກໂນໂລຊີການສື່ສານຂໍ້ມູນຂ່າວສານ ພາຍໃຕ້ການສະໜັບສະໜູນທຶນຈາກ ບໍລິສັດ ຫົວເຫວີຍ ເຕັກໂນໂລຊີ (ລາວ) ຈໍາກັດຜູ້ດຽວ ໂດຍພາຍໃຕ້ການຮ່ວມມືສອງຝ່າຍ ລະຫວ່າງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ບໍລິສັດ ຫົວເຫວີຍ ເຕັກໂນໂລຊີ (ລາວ) ຈໍາກັດຜູ້ດຽວ. ໃຫ້ກຽດເຂົ້າຮ່ວມໃນພິທີດັ່ງກ່າວໂດຍ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຫົວໜ້າ/ຄະນະ ຫ້ອງການ, ກົມ/ທຽບເທົ່າ ອ້ອມຂ້າງກະຊວງ ພ້ອມດ້ວຍພະນັກງານທີ່ກ່ຽວຂ້ອງ ແລະ ນັກສຶກສາພາຍໃນສະຖາບັນດັ່ງກ່າວເຂົ້າຮ່ວມຢ່າງພ້ອມພຽງ.

ໃນພິທີຄັ້ງນີ້, ທ່ານ ປອ. ປະດັບໄຊ ໄຊຍະໂຄດ, ຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ ​ໄດ້ລາຍ​ງານ​ວ່າ: ຕະຫຼອດໄລຍະຜ່ານມາ, ບໍລິສັດ ຫົວເຫວີຍ ເຕັກໂນໂລຊີ (ລາວ) ຈໍາກັດຜູ້ດຽວ ໄດ້ເອົາໃຈໃສ່ໃຫ້ການສະໜັບສະໜູນ ສະຖາບັນເຕັັກໂນໂລຊີການສື່ສານຂໍ້ມູນຂ່າວສານ ມາໂດຍຕະຫຼອດ ບໍ່ວ່າຈະເປັນວຽກງານການຮ່ວມມືສົ່ງເສີມດ້ານການພັດທະນາຫຼັກສູດ Huawei ICT Academy, ການຮ່ວມກັນໃນການສ້າງຫຼັກສູດ ການຮຽນທາງດ້ານໄອຊີທີ, ການຝຶກອົບຮົມໃຫ້ແກ່ບັນດານັກສຶກສາ, ການຢັ້ງຢືນມາດຕະຖານຂອງຄູສອນ, ການສະໜັບສະໜູນການຝຶກງານ, ການຈັດສຳມະນາ, ການນຳໃຊ້ platforms online, ການເຂົ້າຮ່ວມການແຂ່ງຂັນທາງດ້ານໄອຊີທີ, ການມອບທຶນການສຶກສາ, ຮ່ວມມືກັນຄົ້ນຄວ້າທາງດ້ານວິຊາການ, ການຝຶກອົບຮົມໃຫ້ແກ່ ພະນັກງານພາກລັດ ທີ່ຮັບຜິດຊອບທາງດ້ານວຽກງານບໍລິການການສຶກສາ ແລະ ສົ່ງເສີມພັດທະນາພະນັກງານທ້ອງຖິ່ນທີ່ມີພອນສະຫວັນທາງດ້ານໄອຊີທີ, ຊຶ່ງເປັນບັນດາວຽກທີ່ນອນຢູ່ໃນບົດບັນທຶກຄວາມເຂົ້າໃຈຂອງທັງສອງຝ່າຍ.

ພ້ອມດຽວກັນ, ທ່ານ ຫວງ ຢິງ (HUANG YING), ປະທານບໍລິສັດ ຫົວເຫວີຍ ເຕັກໂນໂລຊີ (ລາວ) ຈໍາກັດຜູ້ດຽວ ໄດ້ກ່າວວ່າ: ທຶນການສຶກສາທີ່ມອບໃນຄັ້ງນີ້ມີຈໍານວນ 05 ທຶນ ຊຶ່ງມອບໃຫ້ແກ່ນັກສຶກສາ ປະລິນຍາຕີ ຮຸ່ນທີ 42 ທີ່ສອບເສັງເຂົ້າໄດ້ເປັນອັນດັບສູງສຸດ 05 ອັນດັບ ສາຂາວິຊາ ວິສະວະກໍາ ເຕັກໂນໂລຊີການສື່ສານຂໍ້ມູນຂ່າວສານ, ທຶນການສຶກສາດັ່ງກ່າວຈະຊ່ວຍໃຫ້ນ້ອງນັກສຶກສາທັງ 05 ຄົນ ຮຽນຈົນຈົບການສຶກສາ ຕະຫຼອດໄລຍະ 04 ປີ. ສະນັ້ນ, ການມອບທຶນການສຶກສາໃນຄັ້ງນີ້ຈຶ່ງມີຄວາມໝາຍ-ຄວາມສໍາຄັນຢ່າງຍິ່ງໃນການພັດທະນາຊັບພະຍາກອນມະນຸດ ແລະ ເພື່ອປະກອບສ່ວນເສີມຂະຫຍາຍການຮ່ວມມືດ້ານ ໄອຊີທີ ແກ່ນັກສຶກສາລາວໃຫ້ມີຄວາມເຂັ້ມແຂງ. ພາຍຫຼັງມີຄໍາເຫັນກໍໄດ້ຂຶ້ນມອບທຶນໃຫ້ແກ່ ນັກສຶກສາ ຈໍານວນ 05 ທຶນ ຄື: ນາງ ພອນປະທິບ ດວງດາລາ, ທ້າວ ສັກດາ ມະລີຈັນສີ, ທ້າວ ຄໍາມາ ມິ່ງອາຄົມ, ນາງ ຈັນ ໄຊຍະພອນ ແລະ ນາງ ດານຸພອນ ສຸນະລາດ.

ຕອນທ້າຍ, ທ່ານ ຮອງລັດຖະມົນຕີ ກຕສ ຍັງໄດ້ກ່າວສະແດງຄວາມຂອບໃຈ ແລະ ມອບໃບກຽດຕິຄຸນ  ໃຫ້ແກ່ ບໍລິສັດ ຫົວເຫວີຍ ເຕັກໂນໂລຊີ (ລາວ) ຈໍາກັດຜູ້ດຽວ ທີ່ໄດ້ມອບທຶນການສຶກສາດັ່ງກ່າວ ພ້ອມທັງມີຄໍາເຫັນໂອວາດໃຫ້ແກ່ນັກສຶກສາທີ່ໄດ້ຮັບທຶນໃນຄັ້ງນີ້ອີກດ້ວຍ.

ພາບ ແລະ ຂ່າວ: ພຸດດາວອນ ພາສຸວັນ