ໃນຕອນບ່າຍຂອງວັນທີ 21 ມີຖຸນາ 2024 ທີ່ຜ່ານມາ, ທີ່ຫ້ອງຮັບແຂກຂອງກະຊວງເຕັກໂນໂລຊີ ແລະ ການສື່ສານ,   ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ດຣ. ເຊເວ ຊູຮອນ, ທີ່ປຶກສາອາວຸໂສ ຈາກສະຖາບັນພັດທະນາເກົາຫຼີ (KDDI) ພ້ອມດ້ວຍຄະນະ ເນື່ອງໃນໂອກາດເຄື່ອນໄຫວເຮັດວຽກ ຢູ່ ສປປ ລາວ.

ໂອກາດດັ່ງກ່າວນີ້, ທ່ານ ດຣ. ເຊເວ ຊູຮອນ ໄດ້ກ່າວສະແດງຄວາມຂອບໃຈຕໍ່ ທ່ານລັດຖະມົນຕີ ທີ່ໄດ້ໃຫ້ການຕ້ອນຮັບທ່ານ ແລະ ຄະນະໃນຄັ້ງນີ້, ພ້ອມທັງລາຍງານໃຫ້ຊາບຜົນສໍາເລັດການສະຫຼຸບໂຄງການທີ່ໄດ້ມີການຮ່ວມມືປະສານງານກັບ ສູນອິນເຕີເນັດແຫ່ງຊາດ ຂອງ ກະຊວງເຕັກໂນໂລຊີ ແລະ ການສື່ສານ ສປປ ລາວ. ທ່ານຍັງກ່າວຄວາມຍິນດີທີ່ຈະໃຫ້ການຮ່ວມມື ແລະ ຊ່ວຍເຫຼືອ ທາງດ້ານນະໂຍບາຍ, ແລກປ່ຽນທາງດ້ານເຕັກໂນໂລຊີ ຮ່ວມກັບ ສປປ ລາວ ໂດຍສະເພາະແມ່ນ ກະຊວງເຕັກໂນໂລຊີ ແລະ ການສື່ສານ ໃນອະນາຄົດ.

ພ້ອມດຽວກັນ, ທ່ານ ລັດຖະມົນຕີ ກໍໄດ້ກ່າວສະແດງຄວາມຍິນດີຕ້ອນຮັບ ແລະ ຂອບໃຈຕໍ່ການ ທ່ານ ດຣ. ເຊເວ ຊູຮອນ ພ້ອມດ້ວຍຄະນະ ທີ່ໄດ້ເອົາໃຈໃສ່ໃຫ້ການຮ່ວມມືຊ່ວຍເຫຼືອແກ່ ສປປ ລາວ ໂດຍສະເພາະແມ່ນໂຄງການ KSP ຊຶ່ງໄດ້ຊ່ວຍໃນການສ້າງຄວາມເຂັ້ມແຂງໃຫ້ແກ່ບຸກຄະລາກອນຂອງກະຊວງເປັນຢ່າງຍິ່ງ. ປັດຈຸບັນ, ລັດຖະບານ ສປປ ລາວ ໄດ້ໃຫ້ຄວາມສໍາຄັນຫຼາຍໃນການຫັນປະເທດເປັນດິຈິຕອນ ຊຶ່ງໄດ້ວ່າງນະໂຍບາຍອອກເປັນ 03 ຂົງເຂດ ຄື: ສ້າງການບໍລິຫານລັດດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນ. ສະນັ້ນ, ບັນຫາທີ່ສໍາຄັນອີກບັນຫາໜຶ່ງກໍແມ່ນລາຍເຊັນເອເລັກໂຕຣນິກທີ່ຈະຢັ້ງຢືນຕົວຕົນ. ສປປ ລາວ ຍັງຂາດບົດຮຽນກ່ຽວກັບການຫັນເປັນດິຈິຕອນໃນຂົງເຂດຕ່າງໆ ນັບທັງຂົງເຂດວຽກງານການເງິນ, ສຶກສາ, ສາທາລະນະສຸກ ແລະ ຂົງເຂດອື່ນໆ ຈຶ່ງຫວັງວ່າໃນອະນາຄົດ ສະຖາບັນພັດທະນາເກົາຫຼີ ກໍຄື ລັດຖະບານ ສ.ເກົາຫຼີ ຈະໃຫ້ການສະໜັບສະໜູນຊ່ວຍເຫຼືອການສ້າງບຸກຄະລາກອນ, ແພຼັດຟອມ, ແອັບພລິເຄເຊິນຕ່າງໆໃຫ້ແກ່ ສປປ ລາວ ຕື່ມອີກ.

ພາບ ແລະ ຂ່າວ: ພຸດດາວອນ ພາສຸວັນ