ກະຊວງເຕັກໂນໂລຊີ ແລະ ການສື່ສານ ຮ່ວມກັບ ກະຊວງເສດຖະກິດ ແລະ ການເງິນ ສ.ເກົາຫຼີ ຈັດສຳມະນາທ້າຍໂຄງການ ທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ (2023/24 Knowledge Sharing Program (KSP) Project: Final Reporting Seminar on Consultation for improvement of Lao National Certificate Authority) ໂດຍການເປັນປະທານຮ່ວມຂອງ ທ່ານ ແກ້ວວິສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ທ່ານ ດຣ. ເຊ ຊູຮອນ (Soohyun Choi), ທີ່ປຶກສາອາວຸໂສ ຈາກ ສະຖາບັນການພັດທະນາເກົາຫຼີ (KDI) ແລະ ທ່ານ ຈອງ ຢອງຊູ, ເອກອັກຄະລັດຖະທູດ ສ.ເກົາຫຼີ ປະຈຳ ສປປ ລາວ, ຊຶ່ງຜູ້ເຂົ້າຮ່ວມມີຊ່ຽວຊານຈາກ ສ.ເກົາຫຼີ ບໍລິສັດ IGB & Company, ສູນຮັບຮອງຂໍ້ມູນຂ່າວສານ ສ.ເກົາຫຼີ (KICA), ມີຕາງໜ້າຈາກບັນດາກົມ ພາຍໃນກະຊວງເຕັກໂນໂລຊີ ແລະ ການສື່ສານ, ຕາງໜ້າຈາກກະຊວງອ້ອມຂ້າງ ແລະ ພາກສ່ວນທີ່ກ່ຽວຂ້ອງ ຫຼາຍກວ່າ 30 ທ່ານເຂົ້າຮ່ວມ, ສຳມະນາດັ່ງກ່າວ ແມ່ນໄດ້ຈັດຂຶ້ນໃນຕອນບ່າຍຂອງວັນ​ທີ 20 ມິຖຸນາ 2024 ຜ່ານມາ, ທີ່ ໂຮງແຮມຄຣາວພລາຊາ, ນະຄອນຫຼວງວຽງຈັນ.

ຈຸດປະສົງໃນການຈັດສຳມະນາໃນຄັ້ງນີ້ ແມ່ນເພື່ອສຳມະນາທ້າຍໂຄງການ ທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ, ປຶກສາຫາລື ຮ່ວມກັນ ແລະ ສະຫຼຸບການຈັດຕັ້ງປະຕິບັດໂຄງການໃນໄລຍະ 01 ປີ (2023-2024) ທີ່ຜ່ານມາ, ພ້ອມທັງເປີດກວ້າງໃຫ້ ບັນດາທ່ານຜູ້ຕາງໜ້າຈາກບັນດາກົມ ພາຍໃນກະຊວງເຕັກໂນໂລຊີ ແລະ ການສື່ສານ, ຕາງໜ້າຈາກກະຊວງອ້ອມຂ້າງ ແລະ ພາກສ່ວນທີ່ກ່ຽວຂ້ອງ ໄດ້ມີໂອກາດປະກອບຄຳຄິດຄຳເຫັນໃສ່ໃນບົດລາຍງານສຸດທ້າຍນີ້ ມີຄວາມຄົບຖ້ວນສົມບູນ, ສາມາດນຳໄປເປັນແບບແຜນ-ແນວທາງໃນການຍົກລະດັບລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ ໃຫ້ມີປະສິດທິພາບທຽບເທົ່າກັບສາກົນ. 

ໂອກາດດັ່ງກ່າວ, ຄະນະປະທານ ໄດ້ມີຄຳເຫັນຕໍ່ກັບສຳມະນາ ຊຶ່ງເຮັດໃຫ້ຜູ້ເຂົ້າຮ່ວມໄດ້ຮັບຮູ້ເຖິງສາຍພົວພັນອັນດີງາມ ລະຫວ່າງ ສອງຊາດ ສປປ ລາວ ແລະ ສ.ເກົາຫຼີ ທີ່ມີມາຍາວນານ, ປັດຈຸບັນແມ່ນ ກຳລັງຈະຄົບຮອບ 30 ປີ. ໃນໄລຍະຜ່ານມາ ສ.ເກົາຫຼີ ໄດ້ຮ່ວມມືທາງດ້ານການຊ່ວຍເຫຼືອຫຼ້າ ເພື່ອການພັດທະນາ (ODA) ໃຫ້ແກ່ ສປປ ລາວ ໃນຫຼາຍດ້ານ ເປັນຕົ້ນແມ່ນ ດ້ານການຄ້າ, ດ້ານການລົງທຶນ, ດ້ານການສຶກສາ, ດ້ານສາທາລະນະສຸກ, ດ້ານດິຈິຕອນ ແລະ ດ້ານອື່ນໆ. ໃນນັ້ນ ດ້ານດິຈິຕອນ ສ.ເກົາຫຼີ ກໍໄດ້ໃຫ້ການຊ່ວຍເຫຼືອຫຼ້າແກ່ໂຄງການ ຂອງ ກະຊວງເຕັກໂນໂລຊີ ແລະ ການສື່ສານ ເພື່ອການຫັນເປັນລັດຖະບານດິຈິຕອນ ຂອງ ສປປ ລາວ. ໂຄງການທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ ນີ້ ເປັນອີກໂຄງການໜຶ່ງທີ່ໄດຮັບການຊ່ວຍເຫຼືອຫຼ້າ (ODA) ຈາກ ສ.ເກົາຫຼີ. ຊຶ່ງໂຄງການດັ່ງກ່າວ ປຽບເໝືອນເປັນຕົວຊີ້ວັດ, ຕົວປະເມີນຄືນຄວາມອາດສາມາດຂອງລະບົບລາຍເຊັນເອເລັກໂຕຣນິກ ຂອງ ສປປ ລາວ ທີ່ມີຢູ່ໃນປັດຈຸບັນ, ວິເຄາະຫາຄວາມຕ້ອງການໃນການປັບປຸງຍົກລະດັບລະບົບເກົ່າ, ແຜນການຂະຫຍາຍ ແລະ ສ້າງລະບົບໃຫມ່ ເພື່ອໃຫ້ຮອງຮັບການຫັນເປັນດິຈິຕອນຂອງ ສປປ ລາວ, ວຽກງານການອອກໃບຮັບຮອງລາຍເຊັນເອເລັກໂຕຣນິກ ກໍເປັນອີກວຽກງານໜຶ່ງທີ່ຕິດພັນ ແລະ ນອນຢູ່ໃນແຜນການຫັນເປັນດິຈິຕອນ ທີ່ຈະສົ່ງເສີມໃຫ້ສັງຄົມລາວມີຄວາມຮັບຮູ້ກ່ຽວກັບໜ້າທີ່ ແລະ ຄວາມສຳຄັນ ຂອງລາຍເຊັນດິຈິຕອນ ໃນຍຸກເສດຖະກິດດິຈິຕອນ, ການນຳໃຊ້ການຢັ້ງຢືນຕົວຕົນທາງເອເລັກໂຕຣນິກ ເຂົ້າໃນການເຮັດທຸລະກຳທາງເອເລັກໂຕຣນິກ ໃນຂົງເຂດຕ່າງໆປີ່ນອ້ອມ ລວມໄປເຖິງຮັບຮູ້ເຖິງຄວາມສຳຄັນ ແລະ ຄວາມປອດໄພຂອງການຢັ້ງຢືນຂໍ້ມູນຜ່ານອິນເຕີເນັດ. ພ້ອມດຽວກັນນັ້ນ, ຍັງໄດ້ຮັບຟັງການສະຫຼຸບການຈັດຕັ້ງປະຕິບັດໂຄງການໃນໄລຍະ 01 ປີ (2023-2024) ທີ່ຜ່ານມາ ຈາກຊ່ຽວຊານ ສ.ເກົາຫຼີ.

ໂຄງການທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ ນີ້ ຈຶ່ງປຽບສະເໝືອນເປັນຕົວຊ່ວຍໃນການວິເຄາະຫາຂີດຈຳກັດຂອງລະບົບທີ່ມີຢູ່ໃນປັດຈຸບັນ, ສ້າງເປັນແຜນ ແລະ ເປັນແນວທາງໃນການຍົກລະດັບ ເພື່ອເພີ່ມຂີດຄວາມອາດສາມາດ ທັງໃນດ້ານ ນິຕິກຳ ແລະ ນະໂຍບາຍ, ດ້ານໂຄງຮ່າງການຈັດຕັ້ງ, ດ້ານໂຄງລ່າງພື້ນຖານ ແລະ ການບໍລິການ ແລະ ດ້ານການສ້າງບຸກຄະລາກອນ, ພ້ອມທັງເປັນບ່ອນອີງໃນການສຶກສາ ຄົ້ນຄວ້າ ໃຫ້ ສູນອິນເຕີເນັດແຫ່ງຊາດ ສປປ ລາວ ແລະ ຊ່ຽວຊານ ສ.ເກົາຫຼີ ໄດ້ຮ່ວມກັນສ້າງບົດໂຄງການ Project Concept Paper (PCP) ເພື່ອສະເໜີການຊ່ວຍເຫຼືອ ຈາກອົງການ KOICA ສ.ເກົາຫຼີ ເພື່ອຍົກລະດັບ ສູນຮັບຮອງລາຍເຊັນເອເລັກໂຕຣນິກ ແຫ່ງຊາດ ຂອງ ສປປ ລາວ ໃຫ້ສາມາດຮອງຮັບການຫັນເປັນດິຈິຕອນໄດ້ໃນທຸກຮູບແບບ ເພື່ອຮັບປະກັນການບໍລິການຮັບໃຊ້ແກ່ສັງຄົມ.

ພາບ ແລະ ຂ່າວ: ສູນອິນເຕີເນັດ ແຫ່ງຊາດ