01/07/2024
ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ກອງປະຊຸມເຜີຍແຜ່ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ແລະ ມະຕິ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ຂຶ້ນໃນຕອນເຊົ້າຂອງວັນທີ 27 ມິຖຸນາ 2024, ທີ່ຫ້ອງປະຊຸມໃຫຍ່ ຂອງ ກຕສ (ເຂດສີສະເກດ), ໂດຍພາຍໃຕ້ການເປັນປະທານຂອງ ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກຕສ, ມີຄະນະປະຈຳ-ຄະນະບໍລິຫານງານພັກກະຊວງ, ເລຂາຮາກຖານ/ໜ່ວຍພັກ, ສະມາຊິກພັກສົມບູນ ແລະ ພະນັກງານຫຼັກແຫຼ່ງທົ່ວອົງຄະນະພັກ ກຕສ ເຂົ້າຮ່ວມຈຳນວນ 250 ກວ່າສະຫາຍ.
ຈຸດປະສົງຂອງການເຜີຍແຜ່ເອກະສານໃນຄັ້ງນີ້ ແມ່ນເພື່ອໃຫ້ສະມາຊິກພັກ-ພະນັກງານ ພາຍໃນ ກຕສ ຮັບຮູ້, ເຊື່ອມຊຶມ ແລະ ກໍາແໜ້ນຢ່າງເລິກເຊິ່ງກ່ຽວກັບ ມະຕິ ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ແລະ ມະຕິ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ເພື່ອສ້າງບາດກ້າວບຸກທະລຸໃນການພັດທະນາ ຮັບປະກັນໃຫ້ແກ່ການເຕີບໃຫຍ່ຂະຫຍາຍໂຕທາງດ້ານເສດຖະກິດ. ຊຶ່ງໃນກອງປະຊຸມ, ສະຫາຍ ປອ. ສັນຕິສຸກ ສິມມາລາວົງ, ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ໃຫ້ກຽດຂຶ້ນເຜີຍແຜ່ ມະຕິ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ໃນໄລຍະໃໝ່ ໂດຍໄດ້ຍົກໃຫ້ເຫັນເຖິງການສ້າງເສດຖະກິດເອກະລາດເປັນເຈົ້າຕົນເອງ ແມ່ນສ່ວນສຳຄັນຂອງຄວາມເປັນເອກະລາດ ແລະ ເນື້ອແທ້ແມ່ນຍົກສູງສະຕິຊາດ. ນອກຈາກການເປັນເຈົ້າການພັດທະນາຊັບພະຍາກອນມະນຸດແລ້ວຍັງຕ້ອງມີການພັດທະນາພື້ນຖານການຜະລິດ, ການບໍລິການ, ສ້າງໃຫ້ມີຜະລິດຕະພັນທີ່ຫຼາກຫຼາຍ, ພັດທະນາລະບົບເງິນ-ເງິນຕາ ໃຫ້ເຂັ້ມແຂງ ແລະ ເປັນເຈົ້າການໃນການເຊື່ອມໂຍງເຂົ້າກັບສາກົນ, ຕ້ອງສະແດງອອກຢ່າງເປັນຮູບປະທໍາ ທາງດ້ານເສດຖະກິດ ຮ່ວມມືດ້ານເສດຖະກິດກັບພາຍນອກ ທັງເປັນການສ້າງເງື່ອນໄຂຊ່ວຍເຫຼືອຈາກເພື່ອນມິດສາກົນໃຫ້ກາຍເປັນແຫຼ່ງທຶນຮອນເພື່ອພັດທະນາ ຫຼື ນຳໃຊ້ຢ່າງມີປະສິດທິຜົນ, ເປົ້າໝາຍທີ່ຕ້ອງບັນລຸການສ້າງເສດຖະກິດ ແມ່ນເຮັດໃຫ້ຄົນລາວ, ສັງຄົມລາວ ຍົກລະດັບວິຖີຊີວິດ ແລະ ວິທີການທຳມາຫາກິນແບບໃໝ່ ສາມາດເສີມຂະຫຍາຍຫົວຄິດປະດິດສ້າງ, ເປັນຜູ້ປະກອບການເປັນເຈົ້າຕົ້ນເອງ, ແກ້ໄຂຄວາມຫຍຸ້ງຍາກເສດຖະກິດ-ການເງິນ ໄປພ້ອມກັບການປະສານຢ່າງກົມກຽວ ລະຫວ່າງ ການຍູ້ແຮງງານພາກການຜະລິດ, ການບໍລິການ ເພື່ອຕອບສະໜອງຄວາມຕ້ອງການຊົມໃຊ້ພາຍໃນ, ປັບປຸງໂຄງສ້າງດ້ານງົບປະມານແຫ່ງລັດ ແລະ ຄຸ້ມຄອງໜີ້ສາທາລະນະ.
ໂອກາດດຽວກັນນີ້, ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ປະທານກອງປະຊຸມ ກໍໄດ້ໃຫ້ກຽດຂຶ້ນກ່າວເຜີຍແຜ່ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ຊຶ່ງໄດ້ຍົກໃຫ້ເຫັນ ຜົນຂອງການຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ບັນຫາອື່ນໆທີ່ພົ້ນເດັ່ນ. ພ້ອມນັ້ນ, ສະຫາຍປະທານກອງປະຊຸມຍັງໄດ້ຮຽກຮ້ອງໃຫ້ຄະນະພັກ-ຄະນະນໍາກະຊວງ, ສະມາຊິກພັກ-ພະນັກງານ ທົ່ວກະຊວງ ຈົ່ງພ້ອມກັນເພີ່ມທະວີຄວາມສາມັກຄີເປັນປຶກແຜ່ນແໜ້ນໜາ, ຍົກສູງຄວາມຮັບຜິດຊອບການເມືອງ ເພື່ອຈັດຕັ້ງການເຊື່ອມຊຶມ, ກໍາແໜ້ນ ແລະ ຜັນຂະຫຍາຍ ຈັດຕັ້ງປະຕິບັດເນື້ອໃນມະຕິດັ່ງກ່າວ ເຂົ້າສູ່ຂະບວນການວຽກງານຕົວຈິງ ແລະ ຢ່າງມີປະສິດທິຜົນ.
ພາບ ແລະ ຂ່າວ: ພຸດດາວອນ ພາສຸວັນ
