ກອງປະຊຸມທາບທາມບຸກຄະລາກອນ ອອກຮັບສະໝັກເລືອກຕັ້ງ ຄະນະບໍລິຫານງານສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ (ກຕສ) ສະໄໝທີ III  ຮອບທີ 1 (ຮອບເປີດກວ້າງ) ໄດ້ໄຂຂຶ້້ນຢ່າງເປັນທາງການ ໃນຕອນເຊົ້າຂອງວັນທີ 28 ມີຖຸນາ 2024 ຜ່ານມານີ້, ທີ່ຫ້ອງປະຊຸມໃຫຍ່ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ. ພາຍໃຕ້ການເປັນປະທານຂອງ ສະຫາຍ ປອ. ສັນຕິສຸກ ສິມມາລາວົງ, ຮອງເລຂາຄະນະປະຈຳພັກ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຜູ້ຊີ້ນໍາວຽກສາມອົງການຈັດຕັ້ງມະຫາຊົນ, ມີ ສະຫາຍ ນາງ ເກສອນ ສຸລິວົງ, ຄະນະພັກກະຊວງ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງ ກຕສ, ມີຄະນະບໍລິຫານງານສະຫະພັນແມ່ຍິງກະຊວງ, ບັນດາຜູ້ແທນສົມບູນ, ຜູ້ແທນສໍາຮອງ ແລະ ຄະນະຕິດຕາມກອງປະຊຸມ ລວມທັງໝົດ 350 ສະຫາຍ.

ໃນກອງປະຊຸມ, ບັນດາຜູ້ແທນໄດ້ຮັບຟັງ ແລະ ປະກອບຄໍາເຫັນໃສ່ ຮ່າງບົດລາຍງານການເມືອງ, ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ສະໄໝທີ II ແລະ ຮ່າງບົດສະຫຼຸບຕີລາຄາ ການຈັດຕັ້ງປະຕິບັດແຜນພັດທະນາແມ່ຍິງຂອງ ສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ແລະ ການປະກອບສ່ວນການຈັດຕັ້ງປະຕິບັດວາລະແຫ່ງຊາດ. ຊຶ່ງເນື້ອໃນໄດ້ຍົກໃຫ້ເຫັນວ່າ ຕະຫຼອດໄລຍະທີ່ຜ່ານມາ ຄະນະພັກ-ຄະນະນຳກະຊວງ ໄດ້ເອົາໃຈໃສ່ຊີ້ນຳວຽກງານຢ່າງຮອບດ້ານ ເຮັດໃຫ້ອົງການຈັດຕັ້ງສະຫະພັນແມ່ຍິງ ມີຄວາມເຂັ້ມແຂງຂຶ້ນຫຼາຍດ້ານ ເປັນຕົ້ນແມ່ນ ດ້ານການປະກອບສ່ວນວຽກງານວິຊາສະເພາະ ກໍຄື ການເຄື່ອນໄຫວວຽກງານຂອງສະຫະພັນແມ່ຍິງ ທີ່ມີຜົນງານພົ້ນເດັ່ນ ໂດຍສະເພາະການຫັນເປັນແມ່ຍິງດິຈິຕອນ.

ໂອກາດດຽວກັນ, ກອງປະຊຸມໄດ້ເປັນກຽດຮັບຟັງຄຳເຫັນໂອ້ລົມຈາກ ສະຫາຍປະທານກອງປະຊຸມ  ຊຶ່ງສະຫາຍໄດ້ສະແດງຄວາມຊົມເຊີຍຕໍ່ຜົນງານຂອງຄະນະສະຫະພັນແມ່ຍິງ ກຕສ ຍາດມາໄດ້ຫຼາຍວຽກງານທີ່ພົ້ນເດັ່ນໃນໄລຍະ 5 ປີຜ່ານມາ. ພ້ອມນີ້, ຍັງໄດ້ເນັ້ນໜັກໃຫ້ເອື້ອຍນ້ອງແມ່ຍິງ ກຕສ ຈົ່ງພ້ອມກັນໃຊ້ສິດປະຊາທິປະໄຕຂອງຕົນ ເຂົ້າໃນການຄັດເລືອກເອົາບຸກຄະລາກອນຜູ້ທີ່ມີມາດຖານເງື່ອນໄຂຄົບຖ້ວນ ເພື່ອເປັນຕົວແທນໃຫ້ແກ່ເອື້ອຍນ້ອງແມ່ຍິງອອ້ມຂ້າງກະຊວງ ອອກຮັບສະໝັກເປັນຄະນະບໍລິຫານງານສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ສະໄໝທີ III ໃຫ້ໄປຕາມມາດຖານເງື່ອນໄຂທີ່ ສູນກາງສະຫະພັນແມ່ຍິງລາວ ໄດ້ກໍານົດໄວ້. ໂດຍໃຫ້ມີການຄົ້ນຄວ້າຢ່າງລະອຽດເລິກເຊິ່ງເຖິງຄຸນທາດການເມືອງ, ຄຸນສົມບັດສິນທຳປະຕິວັດ, ມີແບບແຜນການດຳລົງຊີວິດທີ່ປອດໃສ, ມີປະຫວັດຈະແຈ້ງ, ມີຜົນງານການເຄື່ອນໄຫວທີ່ພົ້ນເດັ່ນຂອງບຸກຄະລາກອນຜູ້ອອກຮັບສະໝັກເລືອກຕັ້ງໃນຮອບທີ 1 (ຮອບເປີດກວ້າງ) ເພື່ອມາສືບຕໍ່ນຳພາ-ຊີ້ນຳ ວຽກງານສະຫະພັນແມ່ຍິງຂອງຂະແໜງເຕັກໂນໂລຊີ ແລະ ການສື່ສານ ໃນຕໍ່ໜ້າ ໃຫ້ຮັບປະກັນໄດ້ທັງຄຸນນະພາບ ແລະ ປະລິມານ. ພ້ອມນີ້, ເອື້ອຍນ້ອງແມ່ຍິງ ໄດ້ໃຊ້ສິດປະຊາທິປະໄຕຂອງຕົນໃນການປ່ອນບັດຄັດເລືອກເອົາ ຄະນະບໍລິຫານງານສະຫະພັນແມ່ຍິງ ກະຊວງເຕັກໂນໂລຊີ ແລະ ການສື່ສານ ສະໄໝທີ III ຊຶ່ງກອງປະຊຸມໄດ້ດໍາເນີນໄປເປັນເວລາເຄິ່ງວັນຈຶ່ງສໍາເລັດ.

ຂ່າວ: ຄະນະບໍລິຫານງານສະຫະພັນແມ່ຍິງ ກຕສ.