ໃນຕອນເຊົ້າຂອງວັນທີ 20 ມິຖຸນາ 2024 ຜ່ານມາ, ທີ່ຫ້ອງປະຊຸມໃຫຍ່ ຂອງ ກະຊວງເຕັກໂນໂລຊີ ແລະ ການສື່ສານ (ກຕສ), ສູນບໍລິຫານລັດດິຈິຕອນ (ສລດ) ໄດ້ເປີດຊຸດຝຶກອົບຮົມການນຳໃຊ້ລະບົບຈັດເກັບ ແລະ ນຳໃຊ້ເອກະສານຮ່ວມກັນຂອງພາກລັດ (G-Share/G-Drive) ໃຫ້ບັນດາກະຊວງ ແລະ ອົງການຈັດຕັ້ງພັກ-ລັດ ຈຳນວນ 12 ພາກສ່ວນ. ໂດຍການເປັນປະທານ ຂອງ ທ່ານ ຄໍາຜາຍ ອິນທະຣາ, ຮອງຫົວໜ້າສູນບໍລິຫານລັດດິຈິຕອນ (ສລດ), ກະຊວງເຕັກໂນໂລຊີ ແລະ ການສື່ສານ, ຊຶ່ງມີຜູ້ຕາງໜ້າຈາກບັນດາກະຊວງຕ່າງໆເຂົ້າຮ່ວມທັງໝົດ ຈຳນວນ 55 ທ່ານ, ຍິງ 18 ທ່ານ.

ການຝຶກອົບຮົມໃນຄັ້ງນີ້ ເພື່ອຍົກລະດັບຄວາມຮູ້ຄວາມສາມາດໃນການນຳໃຊ້ລະບົບຈັດເກັບ ແລະ ນໍາໃຊ້ເອກະສານຮ່ວມກັນ (G-Share/G-Drive) ໃນການຈັດການບັນດາຂໍ້ມູນດ້ານຕ່າງໆ ທີ່ໃຊ້ເຂົ້າໃນວຽກງານ ໂດຍສະເພາະແມ່ນເອກະສານ ຜ່ານລະບົບ Cloud ຍົກສູງຄວາມສາມາດໃນການໝູນໃຊ້ລະບົບ G-Share/G-Drive ເຂົ້າໃນການປະຕິບັດວຽກງານຢ່າງມີປະສິດທິພາບ, ຫຼຸດຜ່ອນຂັ້ນຕອນການດໍາເນີນການ, ປະຢັດເວລາ ແລະ ແກ້ບັນຫາເອກະສານຊໍ້າຊ້ອນໃຫ້ໄດ້ຮັບໝາກຜົນສູງສຸດ. ຊຶ່ງໃນການຝຶກອົບຮົມ ແມ່ນໄດ້ແນະນຳກ່ຽວກັບການສ້າງ, ເອົາຂໍ້ມູນເຂົ້າລະບົບ (Upload), ຈັດການຟາຍ (File), ການແກ້ໄຂເອກະສານຮ່ວມກັນ ແລະ ການແບ່ງປັນເອກະສານໃຫ້ກັບບຸກຄົນອື່ນດ້ວຍຮູບແບບຕ່າງໆ ເຊັ່ນ: Word, Excel ແລະ Power point. ນອກນັ້ນ, ຍັງໄດ້ຍົກຕົວຢ່າງການນໍາໃຊ້ເຂົ້າໃນວຽກງານຕົວຈິງ ເພື່ອເປັນແນວທາງໃນການນໍາໄປວາງແຜນ ຊຶ່ງສາມາດປັບເຂົ້າໃນລະບົບການເຮັດວຽກຂອງແຕ່ລະພາກສ່ວນ ເພື່ອການຫັນເປັນທັນສະໄໝໃຫ້ແກ່ບັນດານັກສຳມະນາກອນ ກໍຄືການຫັນເປັນລັດຖະບານດິຈິຕອນ.

ໃນຕອນທ້າຍຂອງການຝຶກອົບຮົມ ຍັງໄດ້ເປີດໂອກາດໃຫ້ຜູ້ເຂົ້າຮ່ວມໄດ້ສົນທະນາ ແລະ ແລກປ່ຽນຄໍາຄິດຄໍາເຫັນ ພ້ອມທັງມີຂໍ້ສະເໜີແນະຕ່າງໆໃນການນຳໃຊ້ລະບົບບໍລິຫານລັດທີ່ໜ້າສົນໃຈ ແລະ ເປັນປະໂຫຍດໃນການພັດທະນາ, ປັບປຸງລະບົບ ໃຫ້ສາມາດນຳໃຊ້ເຂົ້າໃນວຽກງານຕົວຈິງໃຫ້ມີຄວາມປອດໄພ ແລະ ມີປະສິດຕິພາບສູງ. ການຝຶກອົບຮົມໄດ້ສິ້ນສຸດລົງໃນ ເວລາ 16:00 ໂມງຂອງວັນດຽວກັນ.

ຂ່າວໂດຍ: ຊ່ອງດາວ ພົມມະຈັນ