ໃນຕອນເຊົ້າຂອງວັນທີ 26 ມິຖຸນາ 2024 ທີ່ຜ່ານມາ, ທີ່ຫ້ອງປະຊຸມ ກະຊວງ ເຕັກໂນໂລຊີ ແລະ ການສື່ສານ (ກຕສ), ທ່ານ ສຸລິຍາ ຄຳບູຣາວົງ, ຫົວໜ້າກົມໄປສະນີ, ກະຊວງເຕັກໂນໂລຊີ ແລະ ການສື່ສານ ໄດ້ໃຫ້ກຽດຕ້ອນຮັບຄະນະຜູ້ແທນຈາກສະຫະພາບໄປສະນີ ອາຊີ-ປາຊີຟິກ ນຳໂດຍ ທ່ານ ວິນາຢາ ປຣາກາດສ໌ ຊິງ (Vinaya Prakash Singh), ເລຂາທິການໃຫຍ່ ສະຫະພາບໄປສະນີ ອາຊີ-ປາຊີຟິກ ພ້ອມດ້ວຍຄະນະ ເນື່ອງໃນໂອກາດທີ່ມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 25-27 ມິຖຸນາ 2024.

ໃນໂອກາດດັ່ງກ່າວ, ທ່ານ ສຸລິຍາ ຄຳບູຣາວົງ ໄດ້ກ່າວສະແດງຄວາມຍິນດີຕ້ອນຮັບການມາຢ້ຽມຢາມ ຂອງ ທ່ານເລຂາທິການໃຫຍ່ ສະຫະພັນໄປສະນີ ອາຊີ-ປາຊີຟິກ ຊຶ່ງເປັນນິມິດໝາຍອັນສຳຄັນທີ່ສະແດງເຖິງຄວາມເອົາໃຈໃສ່, ຄວາມເປັນຫ່ວງເປັນໃຍຂອງທ່ານຕໍວຽກງານໄປສະນີ ຂອງ ສປປ ລາວ ແລະ ທ່ານຍັງໄດ້ສະແດງຄວາມຍ້ອງຍໍຊົມເຊີຍຕໍ່ ທ່ານ ວິນາຢາ ປຣາກາດສ໌ ຊິງ ທີ່ໄດ້ຮັບເລືອກຕັ້ງເປັນເລຂາທິການໃຫຍ່ ສະຫະພາບໄປສະນີ ອາຊີ-ປາຊີຟິກ ໃນກອງປະຊຸມໃຫຍ່ ຄັ້ງທີ 13 ທີ່ຜ່ານມາ. ພ້ອມທັງໄດ້ສະແດງຄວາມເຊື່ອໝັ້ນຕໍ່ການຊີ້ນຳຂອງທ່ານເລຂາທິການໃຫຍ່ ຈະຊ່ວຍໃຫ້ຂະແໜງການໄປສະນີ ບັນດາປະເທດໃນຂົງເຂດອາຊີ-ປາຊີຟິກ ໂດຍສະເພາະວຽກງານໄປສະນີຂອງ ສປປ ລາວ ຈະນັບມື້ນັບມີຄວາມເຂັ້ມແຂງຂຶ້ນໄປເລື່ອຍໆ. ພ້ອມດຽວນີ້, ທ່ານ ສຸລິຍາ ຄຳບູຣາວົງ ຍັງໄດ້ລາຍງານໃຫ້ຊາບກ່ຽວກັບ ສະພາບການພັດທະນາໄປສະນີຂອງ ສປປ ລາວ, ການຮ່ວມມື ລະຫວ່າງ ໄປສະນີລາວ ແລະ ສະຫະພາບໄປສະນີ ອາຊີ-ປາຊີຟິກ ໃນໄລຍະຜ່ານມາ ແລະ ແຜນການຮ່ວມມືໃນຕໍ່ໜ້າ. ຫຼັງຈາກນັ້ນ, ທ່ານເລຂາທິການໃຫຍ່ ກໍໄດ້ລາຍງານກ່ຽວກັບການພັດທະນາຊັບພະຍາກອນມະນຸດດ້ານໄປສະນີ ໂດຍສະເພາະ ແມ່ນການໃຫ້ທຶນຝຶກອົບຮົມໃນຫົວຂ້ໍຕ່າງໆແກ່ຂະແໜງການໄປສະນີລາວໃນແຕ່ລະປີຕໍ່ທ່ານຫົວໜ້າກົມ. ທັງສອງຝ່າຍ ຍັງໄດ້ແລກປ່ຽນຄໍາຄິດເຫັນຮ່ວມກັນໃນຫຼາຍບັນຫາ ແລະ ໄດ້ສະແດງເຈດຈໍານົງໃນການຂະຫຍາຍການຮ່ວມມື ເຊິ່ງກັນ ແລະ ກັນ ໃນອະນາຄົດໃຫ້ຫຼາຍຂຶ້ນຕື່ມ.

ໃນຕອນທ້າຍ, ທ່ານເລຂາທິການໃຫຍ່ ສະຫະພາບໄປສະນີ ອາຊີ-ປາຊີຟິກ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານຫົວໜ້າກົມໄປສະນີ ພ້ອມທັງຈະສືບຕໍ່ໃຫ້ການຮ່ວມມື ແລະ ຊ່ວຍເຫຼືອ ສປປ ລາວ ໃນການພັດທະນາວຽກງານໄປສະນີໃຫ້ນັບມື້ນັບມີຄວາມເຂັ້ມແຂງ ແລະ ສືບຕໍ່ຊ່ວຍເຫຼືອໃຫ້ທຶນຝຶກອົບຮົມໃຫ້ແກ່ພະນັກງານກົມໄປສະນີ ແລະ ບໍລິສັດໄປສະນີລາວ ໃນນັ້ນ, ຈະພິຈາລະນາ ເພີ່ມທຶນຝຶກອົບຮົມ 02 ທຶນ ຕໍ່ຫຼັກສູດ ເພື່ອໃຫ້ສາມາດພັດທະນາການບໍລິການໄປສະນີລາວ ໄດ້ຢ່າງມີປະສິດທິພາບ ເພື່ອຫັນວຽກງານໄປສະນີດ້ວຍລະບົບດິຈິຕອນເທື່ອລະກ້າວ.

ຂ່າວ: ກົມໄປສະນີ