ໃນຕອນເຊົ້າວັນທີ 03 ກໍລະກົດ 2024 ນີ້, ທີ່ ກະຊວງເຕັກໂນໂລຊີ ແລະ ການສື່ສານ (ກຕສ), ສະຫາຍ ປອ. ສັນຕິສຸກ ສິມມາລາວົງ, ຮອງເລຂາຄະນະພັກກະຊວງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ ໄດ້ຕ້ອນຮັບການເຂົ້າພົບປະຂອງ ສະຫາຍ ວິໄລ ວົງຂະເສີມ, ຄະນະພັກ, ຮອງປະທານຄະນະບໍລິຫານງານ ສູນກາງສະຫະພັນກໍາມະບານລາວ ພ້ອມດ້ວຍຄະນະ ເພື່ອແຈ້ງຈຸດປະສົງເນື່ອງໃນໂອກາດລົງເຄື່ອນໄຫວຊຸກຍູ້ວຽກງານກໍາມະບານ ຢູ່ ກະຊວງເຕັກໂນໂລຊີ ແລະ ການສື່ສານ. ພາຍຫຼັງການເຂົ້າພົບປະ ສະຫາຍ ຮອງປະທານຄະນະບໍລິຫານງານ ສູນກາງກໍາມະບານລາວ ກໍໄດ້ສືບຕໍ່ເຮັດວຽກຮ່ວມກັບ ສະຫະພັນກໍາມະບານ ກະຊວງເຕັກໂນໂລຊີ ແລະ ການສື່ສານ, ໂດຍການຕ້ອນຮັບຂອງ ສະຫາຍ ສຸດໃຈ ພິມມະສີ, ປະທານສະຫະພັນກໍາມະບານ ກຕສ ພ້ອມດ້ວຍຄະນະ.

        ໂອກາດດັ່ງກ່າວ, ສະຫາຍ ສຸດໃຈ ພິມມະສີ, ປະທານສະຫະພັນກໍາມະການ ກຕສ ກໍໄດ້ລາຍງານຕໍ່ ສະຫາຍ ຮອງປະທານຄະນະບໍລິຫານງານ ສູນກາງກໍາມະບານລາວ ຊາບກ່ຽວກັບ ສະພາບການເຄື່ອນໄຫວວຽກງານກໍາມະບານຮອບດ້ານໃນໄລຍະຜ່ານມາ; ການກະກຽມດໍາເນີນກອງປະຊຸມໃຫຍ່ ຂອງ ສະຫະພັນກໍາມະບານຂັ້ນລຸ່ມຖັດຕົນ ແລະ ຂັ້ນຕົນ; ການປັບປຸງ, ຍົກຍ້າຍ, ສັບຊ້ອນບຸກຄະລາກອນຂອງ ຄະນະບໍລິຫານງານສະຫະພັນກໍາມະບານ ແລະ ແຜນຄາດຄະເນເປົ້າໝາຍຄະນະບໍລິຫານງານສະຫະພັນກໍາມະບານກະຊວງ ຊຸດໃໝ່.

ຕອນທ້າຍຂອງກອງປະຊຸມ, ຍັງໄດ້ເປັນກຽດຮັບຟັງການມີຄໍາເຫັນໂອ້ລົມຂອງ ສະຫາຍ ວິໄລ ວົງຂະເສີມ, ຄະນະພັກ, ຮອງປະທານຄະນະບໍລິຫານງານ ສູນກາງກໍາມະບານລາວ ຊຶ່ງເຕັມໄປດ້ວຍຄວາມໝາຍຄໍາສໍາຄັນຢ່າງຍິ່ງ. ສະຫາຍຍັງໄດ້ຊີ້ນໍາໃຫ້ສະຫະພັນກໍາມະບານກະຊວງ ເອົາໃຈໃສ່ຕິດຕາມກໍາມະບານຮາກຖານທີ່ຂຶ້ນກັບ, ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ, ແລະ ການປົກປ້ອງສິດຜົນປະໂຫຍດອັນຊອບທໍາຂອງສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ. ພ້ອມນັ້ນ, ກໍໃຫ້ເອົາໃຈໃສ່ໃນການກະກຽມດໍາເນີນຂອງປະຊຸມໃຫຍ່ກໍາມະບານແຕ່ລະຂັ້ນຂອງຕົນໃຫ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.