ສູນບໍລິຫານລັດດິຈິຕອນ (ສລດ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດກອງປະຊຸມສໍາມະນາ “ການສ້າງແຜນພັດທະນາການບໍລິຫານ ແລະ ບໍລິການລັດແບບດິຈິຕອນ ໃນ ສປປ ລາວ” ໃນຕອນບ່າຍຂອງວັນທີ 20 ມິຖຸນາ 2024 ຜ່ານມາ, ທີ່ ຫ້ອງປະຊຸມຊັ້ນ 4 ຂອງ ກະຊວງເຕັກໂນໂລຊີ ແລະ ການສື່ສານ (ເຂດ ຫສນຍ), ໂດຍໃຫ້ກຽດເປັນປະທານກອງປະຊຸມຂອງ ທ່ານ ນາງ ວັນນະພາ ພົມມະທັນສີ, ຮອງຫົວໜ້າສຸນບໍລິຫານລັດດິຈິຕອນ, ມີຄະນະສູນ, ຄະນະພະແນກ ແລະ ວິຊາການຈາກບັນດາກະຊວງ ພ້ອມດ້ວຍຄະນະຮັບຜິດຊອບຈາກ ສລດ ເຂົ້າຮ່ວມທັງໝົດ ຈຳນວນ 20 ກວ່າທ່ານ. 

ຈຸດປະສົງກອງປະຊຸມສໍາມະນາໃນຄັ້ງນີ້ ແມ່ນເພື່ອໃຫ້ຮູ້ເຖິງຄວາມສໍາຄັນ ແລະ ຈໍາເປັນ ໃນການສ້າງແຜນພັດທະນາການບໍລິຫານ ແລະ ບໍລິການລັດແບບດິຈິຕອນ ໃນໄລຍະສັ້ນ ແລະ ໄລຍະຍາວ ໂດຍສອດຄ່ອງກັບແຜນພັດທະນາເສດຖະກິດ-ສັງຄົມ ແຫ່ງຊາດ, ຍຸດທະສາດ ແລະ ເອກະສານກ່ຽວຂ້ອງກັບການຫັນເປັນດິຈິຕອນ ຂອງ ສປປ ລາວ. ຊຶ່ງໃນໂອກາດກ່າວເປີດກອງປະຊຸມ, ທ່ານ ນາງ ວັນນະພາ ພົມມະທັນສີ, ຮອງຫົວໜ້າສູນບໍລິຫານລັດດິຈິຕອນ ໄດ້ຍົກໃຫ້ເຫັນຄວາມສຳຄັນຂອງວຽກງານ ການຫັນເປັນດິຈິຕອນ ໂດຍສະເພາະການຫັນເປັນລັດຖະບານດິຈິຕອນ ທີ່ທຸກພາກສ່ວນຕ້ອງໄດ້ຮ່ວມກັນຈັດຕັ້ງປະຕິບັດໄປທິດທາງດຽວກັນ ເພື່ອໃຫ້ການລົງທຶນຂອງລັດມີປະສິດທິພາບ ແລະ ປະສິດທິຜົນສູງສຸດ ແນ່ໃສ່ໃຫ້ປະຊາຊົນ ແລະ ພາກທຸລະກິດ ໄດ້ຮັບຜົນປະໂຫຍດຈາກການຫັນເປັນດິຈິຕອນ ດ້ວຍການບໍລິການຂອງລັດທີ່ວ່ອງໄວ, ໂປງໃສ ແລະ ເຊື່ອຖືໄດ້. ນອກຈາກນັ້ນ, ຍັງໄດ້ເນັ້ນໃຫ້ບັນດາຜູ້ເຂົ້າຮ່ວມ ໃຫ້ຄວາມສຳຄັນໃນການສ້າງແຜນພັດທະນາການຫັນເປັນດິຈິຕອນຂະແໜງການຕົນ ໂດຍຖືເອົາບົດຄົ້ນຄວ້າແຜນພັດທະນາການບໍລິການລັດຖະບານດິຈິຕອນ 10 ປີ  ເປັນບ່ອນອີງໜຶ່ງໃນການຄົ້ນຄວ້າ. 

​ກອງປະຊຸມສຳມະນາ ໄດ້ຮັບຟັງການນໍາສະເໜີບົດຈາກນັກວິທະຍາກອນ ຂອງ ສູນບໍລິຫານລັດດິຈິຕອນ ຊຶ່ງປະກອບມີ 3 ຫົວຂໍ້ຫຼັກ ຄື: 1) ພາລະບົດບາດ ແລະ ລະບົບການບໍລິການຂອງ ສູນບໍລິຫານລັດດິຈິຕອນ ນໍາສະເໜີໂດຍ ທ່ານ ນາງ ກິດຕິສັກ ປະສົມສຸກ, ຮອງຫົວໜ້າ ພະແນກຄຸ້ມຄອງ ແລະ ປະສານງານ; 2) ດໍາລັດວ່າດ້ວຍການບໍລິຫານ ແລະ ບໍລິການແບບດິຈິຕອນ ແລະ 3) ຜົນການສືກສາ ແລະ ຄົ້ນຄວ້າແຜນການພັດທະນາບໍລິການລັດຖະບານດິຈິຕອນ ໄລຍະ 10 ປີ (Digital Government Roadmap 10 Years) ນໍາສະເໜີໂດຍ ທ່ານ ອໍາພອນສັກ ເທບພູມີ, ຫົວໜ້າພະແນກ ນະໂຍບາຍ ແລະ ມາດຕະຖານ. ຫຼັງຈາກນັ້ນ, ກອງປະຊຸມໄດ້ເປີດກວ້າງ ໃຫ້ບັນດາຜູ້ເຂົ້າຮ່ວມລາຍງານຄວາມຄືບໜ້າຂອງຂະແໜງການຕົນກ່ຽວກັບວຽກງານຫັນເປັນດິຈິຕອນ ແລະ ໄດ້ປຶກສາຫາລື, ແລກປ່ຽນຄໍາຄິດເຫັນຮ່ວມກັນ ເພື່ອເຮັດໃຫ້ການສ້າງແຜນພັດທະນາການຫັນເປັນດິຈິຕອນ ຂອງ ສປປ ລາວ ສອດຄ່ອງ ແລະ ໄປລວງດຽວກັນ. ກອງປະຊຸມໄດ້ດຳເນີນໄປເປັນເວລາເຄິ່ງວັນ ແລະ ປິດລົງດ້ວຍຜົນສໍາເລັດຢ່າງຈົບງາມ.

ຂ່າວ ແລະ ພາບ: ສູນບໍລິຫານລັດດິຈິຕອນ