ໃນຕອນເຊົ້າຂອງວັນທີ 08 ກໍລະກົດ 2024, ທີ່ໂຮງແຮມ ລາວພລາຊາ, ນະຄອນຫຼວງວຽງຈັນ. ສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ ຮ່ວມກັບ ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ - ປາຊີຟິກ ໄດ້ເປີດຝຶກອົບຮົມ “ຄວາມນຳໜ້າທາງດ້ານເຕັກໂນໂລຊີຂໍ້ມູນຂ່າວສານ (Frontier ICTs)”, ໂດຍໃຫ້ກຽດເປັນປະທານຮ່ວມໂດຍ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ໂຄ ຄີຢອງ, ຜູ້ອໍານວຍການໃຫຍ່ ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ - ປາຊີຟິກ, ຊຶ່ງມີຄະນະກົມ/ທຽບເທົ່າ ພາຍໃນກະຊວງເຕັກໂນໂລຊີ ແລະ ການສື່ສານ ພ້ອມທັງຜູ້ເຂົ້າຮ່ວມຈາກຂະແໜງເຕັກໂນໂລຊີ ແລະ ການສື່ສານ, ຂະແໜງການອ້ອມຂ້າງກະຊວງ ແລະ ອົງການຈັດຕັ້ງສາກົນ ຈໍານວນ 50 ກວ່າທ່ານ.

 ຈຸດປະສົງຂອງການຈັດຝຶກອົບຮົມໃນຄັ້ງນີ້ແມ່ນ ເພື່ອໃຫ້ຜູ້ເຂົ້າຮ່ວມຝຶກເຂົ້າໃຈເລິກເຊິ່ງກ່ຽວກັບແນວຄິດພື້ນຖານຄວາມນຳໜ້າທາງດ້ານເຕັກໂນໂລຊີສື່ສານ, ຂໍ້ມູນຂ່າວສານ ຊຶ່ງໃນຍຸກປັດຈຸບັນ  ເຕັກໂນໂລຊີດັ່ງກ່າວມັນໄດ້ເປັນເຄື່ອງມືອັນສໍາຄັນສຳລັບການບັນລຸເປົ້າໝາຍຂອງການພັດທະນາແບບຍືນຍົງ, ບໍ່ວ່າຈະເປັນນະວັດຕະກຳຂອງປັນຍາປະດິດ (Artificial Intelligence), ກຸ່ມຂໍ້ມູນຜູກພັນ (Blockchain) ແລະ ອິນເຕີເນັດສັບພະສິ່ງ (Internet of Things), ຮັບຮູ້ກ່ຽວກັບບັນດານະໂຍບາຍໃນສາກົນທີ່ກ່ຽວຂ້ອງໃນຂົງເຂດພາກລັດ, ສຶກສາບັນຫາສິ່ງທ້າທາຍ ແລະ ຄວາມສ່ຽງຂອງການໜູນໃຊ້ເຕັກໂນໂລຊີ ພ້ອມທັງວິທີການແກ້ໄຂບັນຫາ ເພື່ອການພັດທະນາແບບຍືນຍົງ, ກຳນົດທິດທາງນະໂຍບາຍ ແລະ ມາດຕະການເພື່ອພິຈາລະນາ, ໝູນໃຊ້ ແລະ ນຳໃຊ້ ເພື່ອການພັດທະນາ ຄວາມນຳໜ້າທາງດ້ານເຕັກໂນໂລຊີຂໍ້ມູນຂ່າວສານ ແບບຍືນຍົງ. ນອກນັ້ນ, ຈຸດປະສົງຂອງການຈັດຝຶກອົບຮົມນີ້ຍັງເປັນການເສີມສ້າງເພີ່ມທະວີການພົວພັນຮ່ວມມືກັບສາກົນ ກໍຄື ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ - ປາຊີຟິກ ຊ່ວຍສົ່ງເສີມໃນການຫັນເປັນດິຈິຕອນຂອງ ສປປ ລາວ ອີກດ້ວຍ.

ຊຸດຝຶກອົບຮົມດັ່ງກ່າວຈະໄດ້ດຳເນີນໄປເປັນເວລາ 02 ວັນ ຊຶ່ງຜູ້ເຂົ້າຮ່ວມຈະໄດ້ຮັບຟັງການນໍາສະ ເໜີກ່ຽວກັບພາບລວມຂອງຄວາມນຳໜ້າ ທາງດ້ານເຕັກໂນໂລຊີສື່ສານ ຂໍ້ມູນຂ່າວສານ, ຄວາມຮູ້ພື້ນຖານ, ຂອບເຂດ ແລະ ຄຸນລັກສະນະຂອງ ເຕັກໂນໂລຊີປັນຍາປະດິດ (Artificial Intelligence (AI), ການໝູນໃຊ້ ເຕັກໂນໂລຊີດັງກ່າວເຂົ້າໃນການພັດທະນາເສດຖະກິດ, ພ້ອມທັງຂໍ້​ສະ​ເໜີແນະ​ທາງດ້ານນະ​ໂຍ​ບາຍ ​ແລະ​ ຍຸດ​ທະ​ສາດ​ການ​ຮ່ວມ​ມື​ສາ​ກົນ. ນອກນັ້ນ, ຍັງມີວາລະການສົນທະນາແລກປ່ຽນຄຳຄິດເຫັນ ປະສົບການນຳໃຊ້ ແລະ ບັນຫາທີ່ຕ້ອງກັງວົນໃນການນຳໃຊ້ເຕັກໂນໂລຊີດັ່ງກ່າວ.

ບົດຂ່າວ: ສູນສົ່ງເສີມ ແລະ ຖ່າຍທອດເຕັກໂນໂລຊີ