ໃນລະຫວ່າງວັນທີ 3-5 ກໍລະກົດ 2024  ທີ່ຜ່ານມານີ້, ກົມເຕັກໂນໂລຊີດິຈິຕອນ, ກະຊວງເຕັກໂນໂລຊີ ແລະ ການສື່ສານ ໄດ້ເປີດຊຸດຝຶກອົບຮົມລະບົບທັນສະໄໝ ຂອງ ກະຊວງເຕັກໂນໂລຊີ ແລະ ການສື່ສານ ໃຫ້ແກ່ພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ ແລະ ຫ້ອງວ່າການ ເມືອງສີສັດຕະນາກ ທີ່ຫ້ອງປະຊຸມຊັ້ນ 2 ຂອງກົມ, ໂດຍການເປັນປະທານຂອງ ທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕອນ, ມີບັນຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ, ພະນັກງານ-ວິຊາການພາຍໃນກົມ ແລະ ບັນດານັກສຳມະນາກອນເຂົ້າຮ່ວມຈຳນວນ 25 ທ່ານ.

ຈຸດປະສົງຂອງການຝຶກອົບຮົມໃນຄັ້ງນີ້ ກໍ​ເພື່ອ​ເພີ່ມຄວາມຮູ້, ທັກສະ ແລະ ເຕັກນິກຕ່າງໆດ້ານໄອທີ ໃຫ້ແກ່ພະນັກງານຂັ້ນສູນກາງ ແລະ ທ້ອງຖິ່ນໃຫ້​ສາມາດປະຕິບັດໜ້າ​ທີ່​ການ​ເມືອງຂອງ​ຕົນໃຫ້​ມີ​ປະສິດທິພາບ ແລະ​ ປະສິດທິ​ຜົນ​ສູງ​ ທັງເປັນການສ້າງຄວາມເຂັ້ມແຂງທາງດ້ານວິຊາສະເພາະໃຫ້ແກ່ພະນັກງານທາງດ້ານໄອທີ ເພື່ອພັດທະນາຄວາມສາມາດສູງຂຶ້ນ ໂດຍສະເພາະແມ່ນການນຳໃຊ້ລະບົບຄຸ້ມຄອງຫ້ອງການແບບທັນສະໄໝ ເຂົ້າຊ່ວຍ ປະຕິບັດວຽກງານໃຫ້ມີຄວາມວ່ອງໄວ ແລະ ທັນສະໄໝ. ການຝຶກອົບຮົມຄັ້ງນີ້ ນັກສຳມະນາກອນໄດ້ຮຽນຮູ້ການນໍາໃຊ້ຫຼາຍລະບົບທີ່ທັນສະໄໝ ເປັນຕົ້ນແມ່ນ ລະບົບຄຸ້ມຄອງເອກະສານ (e-Office), ລະບົບໂປຼແກຼມນັບຄະແນນສຽງເລືອກຕັ້ງ (e-Voting), ລະບົບໂປຼແກຼມຄຸ້ມຄອງພະນັກງານ (e-Personal) ແລະ ລະບົບໂປຼແກຼມຄຸ້ມຄອງຊັບສິນ (e-Inventory). ພາຍຫຼັງສຳເລັດການຝຶກອົບຮົມເຫັນວ່າ ນັກສໍາມະນາກອນໄດ້ຮັບຄວາມຮູ້ທີ່ໄດ້ສາມາດນຳໃຊ້ໃນວຽກງານໂຕຈິງ ໄດ້ຮຽນຮູ້ການຕິດຕັ້ງໂປຼແກຼມ, ມີຄວາມເຂົ້າໃຈໃໝ່ກ່ຽວກັບລະບົບຖານຂໍ້ມູນ ແລະ ບັນດາໂປຼແກຼມທີ່ຮຽນແມ່ນແທດເໝາະກັບໜ້າວຽກງານ ແລະ ສາມາດຈັດຕັ້ງປະຕິບັດວຽກງານຕົວຈິງຂອງແຕ່ລະຂະແໜງການ.

ພາບ ແລະ ຂ່າວ: ກົມເຕັກໂນໂລຊີດິຈິຕອນ