ກົມເຕັກໂນໂລຊີດິຈິຕອນ, ກະຊວງເຕັກໂນໂລຊີ ແລະ ການສື່ສານ ຮ່ວມກັບ ບໍລິສັດ ສະມາດເທັກໂນໂລຢີ ຈຳກັດ ລົງນາມເຊັນບົດບັນທຶກຄວາມເຂົ້າໃຈ ເພື່ອສຶກສາຄວາມເປັນໄປໄດ້ໃນການພັດທະນາລະບົບໂຄສະນາເຜີຍແຜ່ວຽກງານດ້ານເຕັກໂນໂລຊີດິຈິຕອນ ຊຶ່ງການຮ່ວມມືໃນຄັ້ງນີ້ ກໍແມ່ນການຜັນຂະຫຍາຍຕາມສິດ ແລະ ພາລະບົດບາດ ຂອງກົມເຕັກໂນໂລຊີດິຈິຕອນ ໂດຍສະເພາະແມ່ນເຜີຍແຜ່ໂຄສະນາປະຊາສໍາພັນວຽກງານການພັດທະນາເຕັກໂນໂລຊີດິຈິຕອນ ແລະ ສ້າງເສດຖະກິດດິຈິຕອນ ຂອງ ສປປ ລາວ ໃຫ້ກວ້າງຂວາງໃນທົ່ວສັງຄົມ ສປປ ລາວ ຊຶ່ງສອດຄ່ອງກັບແຜນຍຸດທະສາດຂອງຂະແໜງເຕັກໂນໂລຊີ ແລະ ການສື່ສານ,​ ແຜນພັດທະນາເສດຖະກິດດິຈິຕອນແຫ່ງຊາດ ແລະ ແຜນພັດທະນາເສດຖະກິດສັງຄົມຂອງ ສປປ ລາວ ໃຫ້ປະສົບຜົນສໍາເລັດຕາມລະດັບຄາດໝາຍ.

ທ່ານ ບຸນທັນ ນັນທະວົງ, ຮອງຫົວໜ້າພະແນກຫັນເປັນດິຈິຕອນ, ກົມເຕັກໂນໂລຊີດິຈິຕອນ ກ່າວວ່າ:  ໃນປັດຈຸບັນ, ສະພາບການພັດທະນາ ແລະ ນໍາໃຊ້ເຕັກໂນໂລຊີດິຈິຕອນ ແມ່ນມີຄວາມສະດວກສະບາຍ, ທັນສະໄໝແບບກ້າວກະໂດດ ບໍ່ວ່າຈະເປັນການເຜີຍແຜ່ຂໍ້ມູນຂ່າວສານ, ການສະໜອງຂໍ້ມູນ, ການຄົ້ນຫາຂໍ້ມູນການບໍລິການຕ່າງໆທັງພາກລັດ, ເອກະຊົນ, ອົງການຈັດຕັ້ງສາກົນ ທັງພາຍໃນ ແລະ ຕ່າງປະເທດ ແມ່ນນັບມື້ນັບມີຄວາມສະດວກສະບາຍ, ວ່ອງໄວ ແລະ ທັນສະໄໝ. ແຕ່ຜ່ານການຈັດຕັ້ງປະຕິບັດເຄື່ອນໄຫວຕົວຈິງຍັງເຫັນວ່າ ການເຜີຍແຜ່ຂໍ້ມູນຂ່າວສານຂອງພາກລັດ ກໍຄືຂະແໜງການເຕັກໂນໂລຊີ ແລະ ການສື່ສານ ໂດຍສະເພາະແມ່ນການຜັນຂະຫຍາຍວຽກງານການຫັນເປັນດິຈິຕອນ ຂອງ ສປປ ລາວ ຍັງບໍ່ທັນກວ້າງຂວາງເທົ່າທີ່ຄວນ ເຮັດໃຫ້ສັງຄົມ ກໍຄືພໍ່ແມ່ປະຊາຊົນຕະຫຼອດຮອດພາກສ່ວນຕ່າງໆໃນສັງຄົມຍັງບໍ່ທັນໄດ້ຮັບຂໍ້ມູນຂ່າວສານທີ່ຊັດເຈນ, ໜ້າເຊື່ອຖື ແລະ ທັນຕໍ່ສະພາບການ. 

ສະນັ້ນ, ບໍລິສັດ ສະມາດເທັກໂນໂລຢີ ຈຳກັດ ຈຶ່ງໄດ້ມີເຈດຈໍານົງຂໍຮ່ວມມືກັບກົມເຕັກໂນໂລຊີດິຈິຕອນ ເພື່ອສຶກສາຄວາມເປັນໄປໄດ້ ໃນການພັດທະນາລະບົບໂຄສະນາເຜີຍແຜ່ວຽກງານເຕັກໂນໂລຊີດິຈິຕອນ ຢູ່ ສປປ ລາວ ພ້ອມນັ້ນ, ຈະໄດ້ຜັນຂະຫຍາຍນໍາໃຊ້ລະບົບ Star Phone App ທີ່ບໍລິສັດໄດ້ພັດທະນາຂຶ້ນມານັ້ນໃຫ້ເກີດປະໂຫຍດສູງສຸດ ເພື່ອເພີ່ມພັດທະນາຂີດຄວາມສາມາດໃນການຫັນເປັນດິຈິຕອນທາງດ້ານຂໍ້ມູນຂ່າວສານ, ການຄຸ້ມຄອງ, ບໍລິຫານ, ບໍລິການ, ໂຄສະນາເຜີຍແຜ່, ເຊື່ອມໂຍງຊ່ອງທາງເຂົ້າເຖິງຂໍ້ມູນຂ່າວສານໄດ້ຢ່າງວ່ອງໄວ, ທັນສະໄໝ ແລະ ມີຄວາມປອດໄພ ສາມາດຕອບສະໜອງຂໍ້ມູນຂ່າວສານໃຫ້ແກ່ສັງຄົມຢ່າງກວ້າງຂວາງ ແລະ ເລິກເຊິ່ງ. 

ພິທີລົງນາມເຊັນບົດບັນທຶກຄວາມເຂົ້າໃຈດັ່ງກ່າວໄດ້ຈັດຂຶ້ນໃນວັນທີ 26 ກໍລະກົດ 2024, ໂດຍການລົງນາມຂອງ ທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕອນ ແລະ ທ່ານ ພູທອງ ພົນວິໄຊ, ຜູ້ອໍານວຍການ ບໍລິສັດ ສະມາດເທັກໂນໂລຢີ ຈໍາກັດ ຊຶ່ງມີບັນດາຄະນະພະແນກ, ສູນ ແລະ ພະນັກງານທັງສອງພາກສ່ວນທີ່ກ່ຽວຂ້ອງເຂົ້າຮ່ວມ.

ພາບ ແລະ ຂ່າວ: ກົມເຕັກໂນໂລຊີດິຈິຕອນ