ໃນຕອນແລງຂອງວັນທີ 05 ສິງຫາ 2024 ນີ້, ທີ່ ໂຮງແຮມ ລາວພລາຊາ, ນະຄອນຫຼວງວຽງຈັນ ໄດ້ມີພິທີມອບນາມມະຍົດ ສາດສະດາຈານ ກິດຕິມະສັກ ຂອງ ສະຖາບັນວິທະຍາສາດ ແລະ ເຕັກໂນໂລຊີ ຂອງ ສສ ຫວຽດນາມ ໃຫ້ແກ່ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ທີ່ໄດ້ອຸທິດເຫື່ອແຮງ ແລະ ສະຕິປັນຍາ ໃນການຄົ້ນຄວ້າ ແລະ ພັດທະນາວຽກງານ ວິທະຍາສາດ ແລະ ເຕັກໂນໂລຊີ, ມີສ່ວນສໍາຄັນໃນການກໍານົດ ແລະ ຜັນຂະຫຍາຍນະໂຍບາຍ, ຍຸດທະສາດ ແລະ ແຜນພັດທະນາ ທາງດ້ານວິທະຍາສາດ ແລະ ເຕັກໂນໂລຊີ ຂອງ ສປປ ລາວ ໂດຍສະເພາະແມ່ນການຈັດຕັ້ງປະຕິບັດໂຄງການ ນ້ອງຢາກເປັນວິທະຍາສາດ ທີ່ໄດ້ມີການຈັດຕັ້ງປະຕິບັດ ແລະ ປະສົບຜົນສຳເລັດໃນໄລຍະທີ່ຜ່ານມາ ຊຶ່ງເປັນກິດຈະກຳທີ່ເຜີຍແຜ່ຄວາມຮູ້ໃຫ້ແກ່ນັກຮຽນ-ນັກສຶກສາຕະຫຼອດຮອດສັງຄົມໃນວຽກງານວິທະຍາສາດ, ເຕັກໂນໂລຊີ ແລະ ນະວັດຕະກໍາ ທັງເປັນຜູ້ທີ່ມີຜົນງານໂດດເດັ່ນໃນການສ້າງສາຍພົວພັນຮ່ວມມືທາງດ້ານ ວິທະຍາສາດ ແລະ ເຕັກໂນໂລຊີ ທັງພາຍໃນ ແລະ ຕ່າງປະເທດ ພິເສດ ກັບ ສສ ຫວຽດນາມ ກໍຄື ສະພາບັນດິດ ວິທະຍາສາດ ແລະ ເຕັກໂນໂລຊີ ຂອງ ສສ ຫວຽດນາມ.

ໃນພິທີ ທ່ານຫົວໜ້າກົມຮ່ວມມືສາກົນ, ສະພາບັນດິດ ວິທະຍາສາດ ແລະ ເຕັກໂນໂລຊີ ຂອງ ສສ ຫວຽດນາມ ຂຶ້ນຜ່ານຂໍ້ຕົກລົງກ່ຽວກັບ ການຕົກລົງມອບນາມມະຍົດ ສາດສະດາຈານ ກິດຕິມະສັກ ສະບັບເລກທີ 888/QĐ-HVKHCN. ຫຼັງຈາກນັ້ນ, ທ່ານ ບັນດິດ ສຈ. ເຈົາ ວັນ ມິງ, ກຳມະການສູນກາງພັກ, ປະທານສະພາບັນດິດວິທະຍາສາດ ແລະ ເຕັກໂນໂລຊີ ສສ ຫວຽດນາມ ໄດ້ໃຫ້ກຽດມອບນາມມະຍົດ ສາດສະດາຈານ ກິດຕິມະສັກ ໃຫ້ແກ່ ທ່ານ ບັນດິດ ສຈ. ບໍ່ວຽງຄຳ ວົງດາລາ.

ໃນໂອກາດນີ້, ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ກ່າວສະແດງຄວາມປິຕິຍິນດີເປັນຢ່າງຍິ່ງ ທີ່ໄດ້ຮັບນາມມະຍົດ ສາດສະດາຈານ ກິດຕະມະສັກ ຈາກ ສະຖາບັນ ວິທະຍາສາດ ແລະ ເຕັກໂນໂລຊີ, ສະພາບັນດິດ ວິທະຍາສາດ ແລະ ເຕັກໂນໂລຊີ ຂອງ ສສ ຫວຽດນາມ ຊຶ່ງເປັນນາມມະຍົດທີ່ຊົງຄຸນຄ່າສໍາຄັນ ຂອງສະຖາບັນທີ່ມີຊື່ສຽງໃນການຄົ້ນຄວ້າ ແລະ ພັດທະນາວິທະຍາສາດ ແລະ ເຕັກໂນໂລຊີ ຢູ່ ສສ ຫວຽດນາມ ກໍຄື ຢູໃນພາກພື້ນ ແລະ ສາກົນ. ນາມມະຍົດດັ່ງກ່າວ ເປັນນາມມະຍົດວິທະຍາສາດທີ່ມີຄຸນຄ່າສໍາຄັນຂອງສະຖາບັນທີ່ມີຊື່ສຽງໃນການຄົ້ນຄວ້າ ແລະ ພັດທະນາວິທະຍາສາດ ແລະ ເຕັກໂນໂລຊີ ສສ ຫວຽດນາມ ກໍຄື ພາກພື້ນ ແລະ ສາກົນ, ແລະ ຍັງເປັນກຽດຢ່າງຍິ່ງ ທີ່ຂ້າພະເຈົ້າເປັນນັກວິທະຍາສາດຄົນທໍາອິດທີ່ໄດ້ຮັບນາມມະຍົດດັ່ງກ່າວ ຊຶ່ງເປັນຄົນທໍາອິດ ຂອງ ສະຖາບັນ ວິທະຍາສາດ ແລະ ເຕັກໂນໂລຊີ, ສະພາບັນດິດ ວິທະຍາສາດ ແລະ ເຕັກໂນໂລຊີ ຂອງ ສສ ຫວຽດນາມ. ສະນັ້ນ, ການໄດ້ຮັບນາມມະຍົດກິດຕິມະສັກໃນຄັ້ງນີ້, ເປັນການຕີລາຄາສູງຕໍ່ການປະກອບສ່ວນຂອງຂ້າພະເຈົ້າໃນຊຸມປີຜ່ານມາໃນການເຄື່ອນໄຫວຄົ້ນຄວ້າ, ພັດທະນາ ແລະ ຊີ້ນໍາ-ນຳພາວຽກງານວິທະຍາສາດ ແລະ ເຕັກໂນໂລຊີ ຂອງ ສປປ ລາວ ແລະ ສາກົນ. ຄົນລາວມີສຸພາສິດເວົ້າວ່າ “ໄດ້ກິນເຂົ້າກໍຍ້ອນບຸນຄຸນນາ, ໄດ້ກິນປາກໍຍ້ອນບຸນຄຸນນໍ້າ,” ສະນັ້ນ, ຜົນສໍາເລັດທີ່ຂ້າພະເຈົ້າສ້າງຂຶ້ນມາໄດ້ນີ້ກໍຍ້ອນມີການຊີ້ນໍາ-ນໍາພາ ຂອງພັກ ແລະ ລັດຖະບານ ແຫ່ງ ສປປ ລາວ ກໍຄື ຂອງ ພັກ ແລະ ລັດຖະບານ ສສ ຫວຽດນາມ. ຍ້ອນການຊຸກຍູ້ສົ່ງເສີມ ແລະ ສະໜັບສະໜຸນຊ່ວຍເຫຼືອຂອງບັນດານັກວິທະຍາສາດ ທັງພາຍໃນ ແລະ ຕ່າງປະເທດ ແລະ ພິເສດແມ່ນກໍາລັງໃຈທີ່ເຂັ້ມແຂງຈາກຄອບຄົວ, ຍາດຕິພີ່ນ້ອງ ແລະ ເພື່ອນມິດສະຫາຍ ທຸກຄົນທີ່ມີໜ້າ ແລະ ບໍ່ມີໜ້າຢູ່ທີ່ນີ້. ຂ້າພະເຈົ້າຂໍຖືວ່ານາມມະຍົດວິທະຍາທີ່ມີຄຸນຄ່ານີ້ເປັນລາງວັນໃຫ້ແກ່ໝົດທຸກຄົນທີ່ໄດ້ມີສ່ວນຮ່ວມຊ່ວຍເຫຼືອ ຂ້າພະເຈົ້າໃນການພັດທະນາວຽກງານ ວິທະຍາສາດ ແລະ ເຕັກໂນໂລຊີ ຂອງປະເທດເຮົາ. ພ້ອມນີ້, ຂ້າພະເຈົ້າກໍຈະສືບຕໍ່ ທຸ່ມເທເຫື່ອແຮງ ແລະ ສະຕິປັນຍາຢ່າງເຕັມທີ່ເພື່ອ ຊີ້ນໍາ-ນໍາພາ ແລະ ຊຸກຍູ້ຂະບວນການເຄື່ອນໄຫວວຽກງານວິທະຍາສາດ ແລະ ເຕັກໂນໂລຊີ ຂອງ ສປປ ລາວ ໃຫ້ມີບາດກ້າວຂະຫຍາຍຕົວຫຼາຍກວ່າເກົ່າ ພ້ອມນີ້ກໍຂໍຮຽກຮ້ອງມາຍັງອ້າຍເອື້ອຍນ້ອງພະນັກງານທົ່ວຂະແໜງການເຕັກໂນໂລຊີ ແລະ ການສື່ສານ ຈົ່ງສືບຕໍ່ບຸກໜ້າບືນຕົວຫຼາຍກວ່າເກົ່າ, ຕັ້ງໜ້າເສີມຂະຫຍາຍການຮ່ວມມືກັບບັນດານັກວິທະສາດພາຍໃນ ແລະ ສາກົນ. ໂດຍສະເພາະ, ກັບບັນດານັກວິທະຍາສາດຂອງ ສສ ຫວຽດນາມ ກໍຄື ສະພາບັນດິດວິທະຍາສາດ ແລະ ເຕັກໂລໂລຊີ ຂອງ ສສ ຫວຽດນາມ ຊຶ່ງເປັນເພື່ອນມິດຍຸດທະສາດ ທີ່ມີມູນເຊື້ອມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຂອງພວກເຮົາໃຫ້ນັບມື້ນັບເລິກເຊິ່ງຂຶ້ນກວ່າເກົ່າ.

ຮູບພາບ ແລະ ບົດຂ່າວ: ພະແນກປະຊາສໍາພັນ