ຊຸດຝຶກອົົບຮົມ ການສ້າງຄູຝຶກ (Training of  Trainer) ໃນຫົວຂໍ້ “ຄວາມຮູ້ພື້ນຖານການຫັນເປັນດິຈິຕອນ” ທັງໝົດ 03 ຊຸດ ຊຶ່ງເລີ່ມຕັ້ງແຕ່ວັນທີ 17 ກໍລະກົດ ເຖີງ 02 ສິງຫາ 2024 ລວມທັງໝົດ 11 ວັນ ຊຶ່ງຈັດໂດຍ ສູນສົ່ງເສີມ ແລະ ຖ່າຍທອດເຕັກໂນໂລຊີ,​ ກະຊວງເຕັກໂນໂລຊີ ແລະ ການສື່ສານ ໄດ້ສໍາເລັດລົງ ແລະ ປິດຢ່າງເປັນທາງການໃນຕອນບ່າຍຂອງວັນທີ 02 ສິງຫາ 2024, ທີ່ ຫ້ອງປະຊຸມຊັ້ນ 05 ຕຶກສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ໂດຍໃຫ້ກຽດເປັນປະທານ ແລະ ມອບໃບຢັ້ງຢືນຂອງ ທ່ານ ປອ. ສັນຕິສຸກ ສິມມະລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຊຶ່ງມີຄູຝຶກ ແລະ ນັກສຳມະນາກອນ ອ້ອມຂ້າງກະຊວງເຂົ້າຮ່ວມ ຈຳນວນ 60 ກ່ວາຄົນ.

ໃນຊຸດຝຶກອົບຮົມຄັ້ງນີ້, ບັນດານັກສໍາມະນາກອນທີ່ຕາງໜ້າຈາກຫ້ອງການ, ກົມ, ສູນ, ສະຖາບັນ ແລະ ອົງການ ພາຍໃນກະຊວງເຕັກໂນໂລຊີ ແລະ ການສື່ສານ ຈຳນວນ 45 ທ່ານ ແມ່ນໄດ້ຜ່ານການຝຶກອົບຮົມຮຽນຮູ້ຄວາມຮູ້ພື້ນຖານການຫັນເປັນດິຈິຕອນ ຈຳນວນ 15 ບົດ ຂອງຂະແໜງການເຕັກໂນໂລຊີ ແລະ ການສື່ສານ ເຊັ່ນ: ເນື້ອໃນການປະຕິວັດອຸດສະຫະກຳ 4.0, ເຕັກໂນໂລຊີ ແລະ ນະວັດຕະກຳ, ເຕັກໂນໂລຊີຂໍ້ມູນຂ່າວສານ ແລະ ການສື່ສານ, ເຕັກໂນໂລຊີດິຈິຕອນ ແລະ ເຕັກໂນໂລຊີ ອັດສະລິຍະ, ເຕັກໂນໂລຊີໂລຈິສຕິກ ແລະ ການໄປສະນີ, ອິນເຕີເນັດ ແລະ ສື່ສັງຄົມອອນລາຍ, ເຕັກໂນໂລຊີຖານຂໍ້ມູນ ແລະ ເຕັກໂນໂລຊີກຸ່ມຂໍ້ມູນຜູກພັນ, ຄວາມປອດໄພໄຊເບີ, ຄວາມຮູ້ພື້ນຖານການບໍລິຫານລັດດິຈິຕອນ, ເສດຖະກິດດິຈິຕອນ ແລະ ທຸລະກຳຊັບສິນດິຈິຕອນ, ສັງຄົມດິຈິຕອນ, ຍຸດທະສາດການຫັນເປັນດິຈິຕອນ ຂອງ ສປປ ລາວ, ການພັດທະນາຊັບພະຍາກອນມະນຸດດ້ານດິຈິຕອນ, ບັນດານິຕິກຳກ່ຽວກັບການຫັນເປັນດິຈິຕອນ ຂອງ ສປປ ລາວ ແລະ ວຽກງານກວດກາການຫັນເປັນດິຈິຕອນ. ພ້ອມກັນນັ້ນ, ຍັງໄດ້ຮຽນຮູ້ທັກສະການເປັນຄູຝຶກທີ່ດີ ແລະ ທັກສະການນຳສະເໜີເທິງເວທີແບບມືອາຊີບ ອີກດ້ວຍ. ພາຍຫຼັງສຳເລັດການຝຶກອົບຮົມ, ບັນດານັກສຳມະນາກອນ ແມ່ນຕ້ອງໄດ້ເປັນຄູຝຶກທີ່ຈະໄດ້ເຄື່ອນໄຫວໃນການໄປຖ່າຍທອດຄວາມຮູ້ ແລະ ບົດຮຽນໃຫ້ພາກສ່ວນຕ່າງໆ ທັງພາຍໃນ ແລະ ພາຍນອກ ຕາມແຜນການຈັດຝຶກອົບຮົມ ຂອງ ສູນສົ່ງເສີມ ແລະ ຖ່າຍທອດເຕັກໂນໂລຊີ ຈັດຂຶ້ນ ຫຼື ພາກສ່ວນຕ່າງໆພາຍໃນກະຊວງເຕັກໂນໂລຊີ ແລະ ການສື່ສານ ຈັດຂຶ້ນ.

ເພື່ອເສີມຂະຫຍາຍຜົນສຳເລັດຂອງການຫັນເປັນດິຈິຕອນ ໃນເບຶ້ອງຕົ້ນນີ້ໃຫ້ສາມາດເຕີບໃຫຍ່ຂະຫຍາຍຕົວໜັກແໜ້ນ ໃນຂອບເຂດທົ່ວປະເທດ. ກະຊວງເຕັກໂນໂລຊີ ແລະ ການສື່ສານ ໃນນາມເປັນກະຊວງຫຼັກ ໃນການຂັບເຄື່ຶອນວຽກງານການຫັນເປັນດິຈິຕອນທົ່ວສັງຄົມ ໄດ້ຖືເອົາວຽກງານການກໍ່ສ້າງ ແລະ ພັດທະນາບຸກຄະລາກອນ ເປັນໜຶ່ງໃນບຸລິມະສິດໃນການຂັບເຄື່ອນວຽກງານການຫັນເປັນດິຈິຕອນທົ່ວສັງຄົມ ໂດຍເນັ້ນໃສ່ການພັດທະນາບຸກຄະລາກອນດ້ານດິຈິຕອນໃຫ້ເປັນລະບົບ, ມີຄຸນະພາບ ແລະ ປະລິມານ; ເລັ່ງປັບປຸງພື້ນຖານໂຄງລ່າງທີ່ຈຳເປັນໃຫ້ຂະແໜງເຕັກໂນໂລຊີ ແລະ ການສື່ສານ ມີຫຼັກສູດ ແລະ ມີສິ່ງອຳນວຍຄວາມສະດວກ ໃຫ້ແກ່ການຮຽນ-ການສອນ ເພື່ອເຮັດໃຫ້ສະຖາບັນເຕັກໂນໂລຊີການສື່ສານຂໍ້ມູນຂ່າວສານນີ້ ເປັນບ່ອນຝຶກ ແລະ ສ້າງວິຊາການ ດິຈິຕອນ ໃນລະດັບຕ່າງໆ ໃຫ້ທຸກຂະແໜງການ ແລະ ສັງຄົມ ແລະ ຊຸດຝຶກອົບຮົມຄັ້ງນີ້ກໍແມ່ນໜຶ່ງໃນການກໍ່ສ້າງບຸກຄະລາກອນທາງດ້ານດິຈິຕອນ ຂອງກະຊວງ ເຕັກໂນໂລຊີ ແລະ ການສື່ສານ.

ບົດຂ່າວ: ສູນສົ່ງເສີມ ແລະ ຖ່າຍທອດເຕັກໂນໂລຊີ