ໃນຕອນເຊົ້າຂອງວັນທີ 9 ສິງຫາ 2024 ນີ້, ທີ່ສະຖາບັນເຕັກໂນໂລຊີສື່ສານຂໍ້ມູນຂ່າວສານ (ສຕສ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິທີເປີດງານເປີດໂຕສະຖາບັນເຕັກໂນໂລຊີການສື່ສານຂໍ້ມູນຂ່າວສານ (Open House) ປະຈຳສົກສຶກສາ 2024-2025 ຂຶ້ນພາຍໃຕ້ຄຳຂວັນ: “ຍົກລະດັບການສຶກສາດ້ານເຕັກໂນໂລຊີການສື່ສານຂໍ້ມູນຂ່າວສານ ໃນຍຸກດິຈິຕອນ”. ໃຫ້ກຽດເຂົ້າຮ່ວມ ແລະ ກ່າວເປີດງານ ໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ຊຶ່ງມີ ທ່ານ ປອ. ປະດັບໄຊ ໄຊຍະໂຄດ, ຄະນະບໍລິຫານງານພັກ ກຕສ, ຫົວໜ້າ ສຕສ, ມີພະນັກງານ-ວິຊາການອ້ອມຂ້າງກະຊວງ ແລະ ອ້າຍນ້ອງນັກສຶກສາພາຍໃນ ສຕສ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.

ໃນພິທີ, ທ່ານລັດຖະມົນຕີ ໄດ້ກ່າວວ່າ: ການເປີດເຮືອນຂອງຕົນເອງໃຫ້ນັກສຶກສາມາຢ້ຽມຊົມ ເປັນປາກົດການທີ່ສໍາຄັນ ເພື່ອກະຕຸກຊຸກຍູ້, ດຶງດູດ ແລະ ສ້າງມະໂນພາບ ກ່ຽວກັບການສຶກສາດ້ານເຕັກໂນໂລຊີ ແລະ ການສື່ສານ ແມ່ນລະບົບການສື່ສານທີ່ສໍາຄັນ ປັດໄຈຕັດສິນການພັດທະນາເສດຖະກິດ ແລະ ສັງຄົມ ໃຫ້ຮັບຮູ້ຢ່າງທົ່ວເຖີງ ຄຽງຄູ່ກັບທ່າແຮງຂອງການໄດ້ຮັບໂອກາດອັນສໍາຄັນ ໃນການຈະມີວຽກເຮັດງານທໍາໃນອາຊີບທີ່ໄດ້ຄ່າຕອບແທນສູງ ເພາະຄວາມຮູ້ດ້ານດັ່ງກ່າວເປັນທີ່ຮຽກຮ້ອງຕ້ອງການໃນຕະຫຼາດແຮງງານໃນລະດັບສູງ ໃນຍຸກການຫັນເປັນດິຈິຕອນ. ສະນັ້ນ, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໄດ້ມີຄວາມພະຍາຍາມສູງໃນການສືບຕໍ່ປັບປຸງ ແລະ ພັດທະນາຫຼັກສູດໃຫ້ສອດຄ່ອງກັບສະພາບຕົວຈິງ ແລະ ສູ້ຊົນຂົນຂວາຍສ້າງຄູ່ຮ່ວມມືໃນການພັດທະນາ ເພື່ອເປົ້າໝາຍກໍ່ສ້າງບຸກຄະລາກອນທີ່ມີຄຸນນະພາບອອກຮັບໃຊ້ສັງຄົມຢ່າງກວ້າງຂວາງ ແລະ ຮັບປະກັນຫຼຸດຜ່ອນບັນຫາຂາດເຂີນຝີມືແຮງງານທີ່ເປັນຄົນລາວໃນຂະແໜງເຕັກໂນໂລຊີ ແລະ ການສື່ສານ ມີລັກສະນະເຂັ້ມແຂງ ແລະ ຕໍ່ເນື່ອງ.

ນອກຈາກນີ້, ໃນງານຍັງມີຫຼາຍກິດຈະກໍາປິ່ນອ້ອມທີ່ມີຄວາມໜ້າສົນໃຈ ເຊັ່ນ: ການວາງສະແດງກ່ຽວກັບບັນດາຫຼັກສູດຊັ້ນປະລິຍາຕີ ແລະ ຊັ້ນສູງ ທີ່ຕິດພັນກັບຂະແໜງເຕັກໂນໂລຊີ ແລະ ການສື່ສານ, ບັນດາຜະລິດຕະພັນທີ່ໜ້າສົນໃຈຂອງບັນດາຄູ່ຮ່ວມມືທັງພາຍໃນ ແລະ ສາກົນ ຂອງບັນດາບໍລິສັດຊັ້ນນໍາແຖວໜ້າຂອງ ສປປ ລາວ. ພ້ອມນີ້, ຍັງມີການຈັດສໍາມະນາໃຫ້ຄວາມຮູ້ດ້ານວິຊາການ ແລະ ເສີມທັກສະອັນຈໍາເປັນໃນຍຸກດິຈິຕອນ, ບັນດາຜົນງານອັນປະຈັກຕາຂອງມະຫາວິທະຍາໄລທີ່ເປັນຄູ່ຮ່ວມມືຍຸດທະສາດຈາກ ສສ ຫວຽດນາມ, ສປ ຈີນ ແລະ ປະເທດໄທ. ພ້ອມທັງ ເປີດສະແດງໃຫ້ເຫັນຄວາມພ້ອມຂອງສິ່ງອໍານວຍຄວາມສະດວກຮອບດ້ານ ບໍ່ວ່າຈະເປັນຕຶກອາຄານໃໝ່ທັນສະໄໝ, ຫໍສະໝຸດ, ຫ້ອງທົດລອງ ແລະ ລະບົບນໍາໃຊ້ຄອມພິວເຕີທີ່ພຽງພໍເຂົ້າໃນການດໍາເນີນການສິດສອນຂອງຄູອາຈານ ແລະ ການສຶກສາຮໍ່າຮຽນຂອງນັກສຶກສາທຸກຊັ້ນໄດ້ຢ່າງຄົບຖ້ວນ, ມີປະສິດທິພາບ ແລະ ປະສິດທິພົນ.