13/08/2024
ວັນທີ 07-09 ສິງຫາ 2024 ກົມເຕັກໂນໂລຊີດິຈິຕ໋ອນ, ກະຊວງເຕັກໂນໂລຊີ ແລະ ການສື່ສານ ຮ່ວມກັບ ພະແນກເຕັກໂນໂລຊີ ແລະ ການສື່ສານ ແຂວງ ບໍລິຄຳໄຊ ຈັດຝຶກອົບຮົມສ້າງຄວາມເຂັ້ມແຂງໃຫ້ແກ່ພະນັກງານ ກ່ຽວກັບການຄຸ້ມຄອງວຽກງານເຕັກໂນໂລຊີດິຈິຕ໋ອນ ແລະ ການສ້າງແຜນການ ພາຍໃຕ້ການເປັນປະທານຂອງທ່ານ ລັງສີ ແກ້ວວິເສດ ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງບໍລິຄຳໄຊ, ມີນັກວິທະຍາກອນຈາກກົມເຕັກໂນໂລຊີດິຈິຕ໋ອນ, ກົມແຜນການ ແລະ ການເງິນ, ມີຜູ້ເຂົ້າຮ່ວມຈາກພະແນກເຕັກໂນໂລຊີ ແລະ ການສື່ສານ ແຂວງ, ຫ້ອງການເຕັກໂນໂລຊີ ແລະ ການສື່ສານ ເມືອງຂອງແຂວງບໍລິຄຳໄຊ ແລະ ບັນດາພະແນກການອ້ອມຂ້າງໃນແຂວງ ບໍລິຄຳໄຊ ທັງໝົດ 35 ທ່ານ
ຈຸດປະສົງຂອງການຈັດຝຶກອົບຮົມໃນຄັ້ງນີ້ກໍເພື່ອເປັນການຍົກລະດັບສ້າງຄວາມເຂັ້ມແຂງໃຫ້ແກ່ພະນັກ ງານຂັ້ນທ້ອງຖິ່ນ ໃນການຈັດຕັ້ງຜັນຂະຫຍາຍວຽກງານສົ່ງເສີມການພັດທະນາ ແລະ ການນຳໃຊ້ເຕັກໂນໂລຊີດິຈິຕ໋ອນເຂົ້າຊ່ວຍໃນການເຮັດວຽກໃນແຕ່ລະຂະແໜງການ ຊຶ່ງຈະຊ່ວຍໃຫ້ບັນດາບຸກຄະລາກອນໄດ້ຮັບການພັດທະ ນາຢ່າງເປັນລະບົບ, ຕໍ່ເນື່ອງ ແລະ ສາມາດຈັດຕັ້ງປະຕິບັດເຂົ້າໃນວຽກງານຕົວຈິງໄດ້ ທັງເປັນການຍົກລະດັບຄວາມຮູ້ຄວາມສາມາດຂອງພະນັກງານທີ່ເຮັດວຽກດ້ານໄອທີຂອງຂະແໜງການຕ່າງໆໃຫ້ມີຄວາມເຂັ້ມແຂງ, ມີຄວາມຮູ້, ຄວາມສາມາດໃນການນຳໃຊ້ເຕັກໂນໂລຊີໃໝ່ໆຢູ່ຕະຫຼອດເວລາ ແລະ ເປັນໂອກາດດີເພື່ອໃຫ້ບັນດາຜູ້ເຂົ້າຮ່ວມຈາກພາກສ່ວນຕ່າງໆໄດ້ເຂົ້າໃຈຕື່ມອີກກ່ຽວກັບການຫັນເປັນລັດຖະບານດິຈິຕ໋ອນ, ເສດຖະກິດດິຈິຕ໋ອນ, ບັນດານິຕິກຳທີ່ກ່ຽວກັບການຄຸ້ມຄອງ ແລະ ສົ່ງເສີມວຽກງານເຕັກໂນໂລຊີດິຈິຕ໋ອນ ຢູ່ ສປປ ລາວ.
ໃນຊຸດຝຶກອົບຮົມດັ່ງກ່າວ ນັກສຳມະນາກອນ ແມ່ນໄດ້ຮັບຮູ້ກ່ຽວກັບການຫັນເປັນດິຈິຕ໋ອນ, ເສດຖະກິດດິຈິຕ໋ອນ, ເຕັກໂນໂລຊີດິຈິຕ໋ອນໃນຍຸກອຸດສະຫະກຳ 4.0, ການຄຸ້ມຄອງເຕັກໂນໂລຊີດິຈິຕ໋ອນ (ການອອກອະນຸຍາດດຳເນີນກິດຈະການທາງດ້ານດິຈິຕ໋ອນ), ການຄຸ້ມຄອງວຽກງານທຸລະກຳທາງເອເລັກໂຕຣນິກ, ລະບົບໂປຣແກຣມນັບຄະແນນສຽງເລືອກຕັ້ງ, ລະບົບໂປຣແກຣມຄຸ້ມຄອງພະນັກງານ, ລະບົບໂປຣແກຣມຄຸ້ມຄອງຊັບສິນ ແລະ ການສ້າງແຜນໂຄງການ, ແຜນການ-ແຜນງານ. ພ້ອມກັນນັ້ນ, ຍັງໄດ້ມີການສົນທະນາແລກປ່ຽນ, ປະກອບຄຳຄິດຄຳເຫັນ ແລະ ຕັ້ງຄຳຖາມຢ່າງກົງໄປກົງມາ ຊຶ່ງຜົນໄດ້ຮັບຈາກການປະເມີນຊຸດຝຶກອົບຮົມຄັ້ງນີ້ໂດຍລວມແມ່ນຈັດຢູ່ໃນລະດັບດີ, ບັນດາຫົວຂໍ້ການຝຶກອົບຮົມມີປະໂຫຍດຫຼາຍ ແລະ ຄາດວ່າຈະສາມາດນໍາໃຊ້ເຂົ້າໃນການປະຕິບັດວຽກງານຂອງຜູ້ເຂົ້າຮ່ວມໄດ້ຫຼາຍພໍສົມຄວນ. ພ້ອມນັ້ນ, ຍັງໄດ້ສະເໜີໃຫ້ມີການຈັດຝຶກອົບຮົມຢ່າງກວ້າງຂວາງ ແລະ ຕໍ່ເນື່ອງໃນແຕ່ລະໄລຍະ ເພື່ອສ້າງຄວາມເຂັ້ມແຂງ ແລະ ຍົກລະດັບຄວາມຮູ້, ຄວາມເຂົ້າໃຈໃຫ້ແກ່ພະນັກງານທ້ອງຖິ່ນ ແລະ ສັງຄົມ ໄດ້ຮັບຮູ້ບົດຮຽນຄວາມຮູ້ທີ່ທັນສະໄໝ ແທດເໝາະກັບສະພາບການພັດທະນາໃນປັດຈຸບັນ.
ຂ່າວໂດຍ: ກົມເຕັກໂນໂລຊີດິຈິຕ໋ອນ
