ໃນຕອນເຊົ້າ ວັນທີ 08 ສິງຫາ 2024 ຜ່ານມາ, ອົງການດັດສົມໂທລະຄົມມະນາຄົມ (ອດທ), ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມສະຫຼຸບຜົນງານ 06 ເດືອນຕົ້ນປີ ແລະ ກຳນົດແຜນການ 06 ເດືອນທ້າຍປີ 2024. ກອງປະຊຸມດັ່ງກ່າວໄດ້ຈັດຂຶ້ນທີ່ ຫ້ອງປະຊຸມຊັ້ນ 01 ຂອງ ອດທ, ພາຍໃຕ້ການເປັນປະທານຂອງ ທ່ານ ສຸດໃຈ ລໍລອນສີ, ກຳມະການຄະນະພັກກະຊວງ, ຫົວໜ້າອົງການດັດສົມໂທລະຄົມມະນາຄົມ; ມີຮອງຫົວໜ້າອົງການ, ບັນທ່ານຫົວໜ້າພະແນກ, ຮອງຫົວໜ້າພະແນກ ແລະ ພະນັກງານລັດຖະກອນພາຍໃນອົງການ ພ້ອມດ້ວຍຕາງໜ້າຈາກບັນດາບໍລິສັດໂທລະຄົມມະນາຄົມ, ອິນເຕີເນັດ ແລະ ບໍລິສັດຄູ່ຮ່ວມມື ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງການຜ່ານບົດສະຫຼຸບ 06 ເດືອນຕົ້ນປີ ແລະ ກຳນົດແຜນການ 06 ເດືອນທ້າຍປີ 2024 ເພື່ອຕີລາຄາຄືນການຈັດຕັ້ງປະຕິບັດວຽກງານດັດສົມໂທລະຄົມມະນາຄົມ ໃນໄລຍະ 06 ເດືອນທີ່ຜ່ານມາເປັນຕົ້ນແມ່ນ ດ້ານນິຕິກໍາ: ສຳເລັດການສ້າງດຳລັດຂອງລັດຖະບານວ່າດ້ວຍ ການສ້າງຕັ້ງກອງທຶນພັດທະນາໂທລະຄົມມະນາຄົມ ແລະ ການຫັນເປັນດິຈິຕອນ ສະບັບເລກທີ 278/ລບ, ລົງວັນທີ 22 ພຶດສະພາ 2024; ຂໍ້ຕົກລົງວ່າດ້ວຍ ໂຄງສ້າງຫົວໜ່ວຍລາຄາ ແລະ ຄ່າຮັກສາຄວາມປອດໄພ ສຳລັບໂທລະຄົມມະນາຄົມ ແລະ ອິນເຕີເນັດຂອງ ສປປ ລາວ ສະບັບເລກທີ 240/ກຕສ, ລົງວັນທີ 30 ມັງກອນ 20240; ສຳເລັດການຕໍ່ໃບອະນຸຍາດກ່ຽວກັບ ການນໍາໃຊ້ເລກໝາຍໂທລະສັບມືຖື, ຕັ້ງໂຕະແບບມີສາຍ, ຕັ້ງໂຕະແບບບໍ່ມີສາຍ, ການດຳເນີນທຸລະກິດດ້ານໂທລະຄົມມະນາຄົມ ແລະ ອິນເຕີເນັດ, ເລກໝາຍໂທລະສັບພິເສດ 4 ຕົວເລກ ແລະ ການອະນຸຍາດນໍາເຂົ້າອຸປະກອນໂທລະຄົມມະນາຄົມຕາມລະບຽບການ ຊຶ່ງສາມາດສ້າງລາຍຮັບ ໃນ 06 ເດືອນຕົ້ນປີ 2024 ໂດຍສາມາດອອກໃບສັ່ງມອບ ເພື່ອມອບເຂົ້າງົບປະມານແຫ່ງລັດ ໄດ້ທັງໝົດ ຈຳນວນ 73.475.082.000 ກີບ ຄິດເປັນ 98,4%; ສຳເລັດ ຕິດຕາມການຈັດຕັ້ງປະຕິບັດການປິດເລກໝາຍໂທລະສັບທີ່ຍັງບໍ່ທັນຂຶ້ນທະບຽນ ໄດ້ 100% ໃນວັນທີ 30 ມັງກອນ 2024, ຮອດປະຈຸບັນສາມາດຂຶ້ນທະບຽນໄດ້ 6.113.455 ເລກໝາຍ; ສຳເລັດການລົງເຄື່ອນໄຫວສໍາຫຼວດ, ກວດກາ ແລະ ເກັບກໍາຂໍ້ມູນຈຸດການເຊື່ອມຕໍ່ລະບົບສາຍສົ່ງໂທລະຄົມມະນາຄົມຢູ່ຕາມຊາຍແດນ ສປປ ລາວ ແລະ ກວດກາການໃຫ້ບໍລິການເຄືອຂ່າຍໂທລະຄົມມະນາຄົມ ແລະ ອິນເຕີເນັດ ຢູ່ 3 ແຂວງພາກເໜືອ ແລະ ພາກກາງ; ສຳເລັດຄຣິບສຽງ ແນະນຳສິດ ແລະ ຊ່ອງທາງໃນການສະເໜີບັນຫາ ກ່ຽວກັບການນຳໃຊ້ບໍລິການໂທລະຄົມມະນາຄົມ ແລະ ອິນເຕີເນັດ; ເຂົ້າຮ່ວມ ຕິດຕາມການແກ້ໄຂຊຸມສາຍ ແລະ ການຕິດຕັ້ງເສົາຮັບສົ່ງສັນຍານໂທລະສັບຈຳນວນ ຫຼາຍກວ່າ 3 ຄັ້ງ. ວຽກຮ່ວມມື ກໍໄດ້ມີການລົງນາມເຊັນບົດບັນທຶກຄວາມເຂົ້້າໃຈ 1 ສະບັບ ກັບສູນອິນເຕີເນັດແຫ່ງຊາດ, ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ; ສາມາດຍາດແຍ່ງທຶນການຊ່ວຍເຫຼືອຈາກ ອົງການ KDDI Foundation ອົງການໂທລະຄົມມະນາຄົມ ອາຊີ ປາຊີຟິກ APT ໃນມູນຄ່າ 178.000 ໂດລາສະຫະລັດ; ສຳເລັດການນຳສົ່ງບົດສະເໜີໂຄງການເຂົ້າແຜນການປະເມີນໂຄງການລົງທຶນຂອງລັດ ປະຈຳປີ 2025 ຈຳນວນ 5 ໂຄງການ ລວມມູນຄ່າ 94.754.608.108 ກີບ ເພື່ອພັດທະນາວຽກງານດັດສົມໂທລະຄົມມະນາຄົມໃຫ້ສາມາດຄຸ້ມຄອງດ້ວຍລະບົບທີ່ທັນສະໄໝ.

ໃນວາລະດຳເນີນກອງປະຊຸມໄດ້ມີພິການຜ່ານຂໍ້ຕົກລົງວ່າດ້ວຍ ການແຕ່ງຕັ້ງ ແລະ ສັບຊ້ອນພະນັກງານ ນໍາພາ-ຄຸ້ມຄອງ ຂັ້ນຮອງຫົວໜ້າອົງການ ທີ່ກະຊວງເຕັກໂນໂລຊີ ແລະ ການສື່ສານ ໄດ້ຈັດພິທີປະກາດຢ່າງເປັນທາງການເມື່ອບໍ່ດົນມານີ້ ຄື: ຂໍ້ຕົກລົງຂອງທ່ານລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ສະບັບເລກທີ 2961/ກຕສ, ວັນທີ 11 ກໍລະກົດ 2024 ວ່າດ້ວຍການແຕ່ງຕັ້ງ ທ່ານ ພວງປະເສີດ ແກ້ວສຸວັນ ຮອງຫົວຫນ້າ ອົງການດັດສົມໂທລະຄົມ ໄປເປັນຮັກສາການຫົວຫນ້າຫ້ອງການ ກະຊວງເຕັກໂນໂລຊີ ແລະ ການສື່ສານ, ຂໍ້ຕົກລົງຂອງທ່ານລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ສະບັບເລກທີ 2963/ກຕສ, ວັນທີ 10 ກໍລະກົດ 2024 ວ່າດ້ວຍ ການຍົກຍ້າຍ ແລະ ສັບຊ້ອນ ທ່ານ ປອ. ນາງ ໃຈມາລີ ພະກະຊຸມ ໄປເປັນຮອງຫົວຫນ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ຍົກຍ້າຍ ແລະ ສັບຊ້ອນ ທ່ານ ພອນສະຫວັດ ຄົງສະຫວັດ, ທ່ານ ວຽງວິໄລ ເສດຖານົນ, ທ່ານ ນາງ ພາວັນນາ ດວງບຸບຜາ ເປັນຮອງຫົວໜ້າ ອົງການດັດສົມໂທລະຄົມມະນາຄົມ; ແລະ ຂໍ້ຕົກລົງຂອງທ່ານລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ສະບັບເລກທີ 2938/ກຕສ, ວັນທີ 11 ກໍລະກົດ 2024 ວ່າດ້ວຍ ການແຕ່ງຕັ້ງ ທ່ານ ນາງ ພາວັນນາ ດວງບຸບຜາ ເປັນເຈົ້າໜ້າທີ່ສະພາດັດສົມໂທລະຄົມອາຊຽນ ຄັ້ງທີ 30.

ໃນຕອນທ້າຍຂອງກອງປະຊຸມ ຍັງໄດ້ຮັບຟັງການປະກອບຄໍາຄິດເຫັນຂອງຜູ້ເຂົ້າຮ່ວມ ຕໍ່ບັນດາໜ້າວຽກຢ່າງກົງໄປກົງມາ ເພື່ອປັບປຸງວິທີເຮັດວຽກ ແລະ ກົນໄກປະສານງານລະຫວ່າງ ມະຫາພາກ ແລະ ຜູ້ດຳເນີນທຸລະກິດໂທລະຄົມມະນາຄົມໃຫ້ດີຂຶ້ນກວ່າເກົ່າ.

ບົດຂ່າວ ແລະ ຮູບພາບ: ພະແນກສັງລວມ, ອົງການດັດສົມໂທລະຄົມມະນາຄົມ.