ກົມເຕັກໂນໂລຊີດິຈິຕອນ, ກະຊວງເຕັກໂນໂລຊີ ແລະ ການສື່ສານ(ກຕສ) ໄດ້ຮ່ວມກັບ ສະມາຄົມສວນອຸທິຍານເຕັກໂນໂລຊີ, ສ. ເກົາຫຼີ ຈັດຝຶກອົບຮົມໃຫ້ແກ່ຜູ້ປະກອບການ, ນັກສຶກສາ ແລະ ບຸກຄົນທົ່ວໄປທີ່ສົນໃຈດ້ານໄອທີ (IT Entrepreneur ship course) ໃນລະຫວ່າງວັນທີ 14-16 ສິງຫາ 2024, ທີ່ສູນຊອບແວ໌ຣ ຂອງກົມເຕັກໂນໂລຊີດິຈິຕ໋ອນ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕອນ, ມີບັນດາຫົວໜ້າພະແນກ, ຮອງພະແນກ, ພະນັກງານວິຊາການພາຍໃນກົມ, ຊ່ຽວຊານຈາກສະມາຄົມສວນອຸທິຍານເຕັກໂນໂລຊີ ສ.ເກົາຫຼີ, ຜູ້ປະກອບການ ແລະ ນັກສຶກສາ ເຂົ້າຮ່ວມຈຳນວນ 40 ກວ່າທ່ານ.

ຈຸດປະສົງຂອງການຝຶກອົບຮົມກໍເພື່ອສ້າງຄວາມເຂັ້ມແຂງໃຫ້ແກ່ບັນດາຫົວໜ່ວຍທຸລະກິດ, ຜູ້ປະກອບການ ແລະ ນັກສຶກສາ ລວມເຖິງບັນດາຜູ້ທີ່ສົນໃຈເຂົ້າຮ່ວມ ຮຽນຮູ້ເຕັກໂນໂລຊີປັນຍາປະດິດ (AI) ແລະ ໂປຣແກຣມແຊັດຈີພີທີ(Chat GPT) ເພື່ອເປັນເຄື່ອງມືເຂົ້າໃນການຈັດຕັ້ງປະຕິບັດວຽກງານ ແລະ ນໍາໃຊ້ເຂົ້າໃນວຽກງານການຕະຫຼາດ ຊ່ວຍໃຫ້ການຈັດຕັ້ງປະຕິບັດວຽກງານ, ທຸລະກິດ ແລະ ການສຶກສາຮໍ່າຮຽນສະດວກສະບາຍວ່ອງໄວຂຶ້ນ.

ຊຸດຝຶກອົບຮົມໃນຄັ້ງນີ້, ຈະໄດ້ຮຽນຮູ້ການນໍາໃຊ້ປັນຍາປະດິດ (Basic Concepts AI) ແລະ ໂປຣແກຣມແຊັດຈີພີທີ (Chat GPT) ຂັ້ນພື້ນຖານ ແລະ ໄດ້ຮຽນຮູ້ວິທີການນໍາໃຊ້ປັນຍາປະດິດ (AI & Chat GPT) ເຂົ້າຊ່ວຍໃນການຈັດຕັ້ງປະຕິບັດວຽກງານ, ທຸລະກິດ, ການຕະຫຼາດ ແລະ ການສຶກສາ. ພ້ອມດຽວກັນນັ້ນ, ພາຍຫຼັງຈາກສໍາເລັດການຝຶກອົບຮົມແລ້ວຍັງຈະມີການແຂ່ງຂັນການນໍາໃຊ້ປັນຍາປະດິດເພື່ອຮັບທຶນການສຶກສາ ຈຳນວນ 5 ລາງວັນຄື: ອັນດັບ 1 ໄດ້ຮັບເງິນລາງວັນຈຳນວນ 5,000,000 ກີບ; ອັນດັບ 2 ໄດ້ຮັບເງິນລາງວັນຈຳນວນ 3,000,000 ກີບ ແລະ ອັນດັບ 3 ໄດ້ຮັບເງິນລາງວັນຈຳນວນ 1,000,000 ກີບ ຈຳນວນ 3 ລາງວັນ.

ພາບ ແລະ ຂ່າວ: ກົມເຕັກໂນໂລຊີດິຈິຕ໋ອນ