ໃນພິທີ, ທ່ານ ບຸນຍະເດດ ໄຊຍະວົງ, ຫົວໜ້າຫ້ອງການ ຄະນະພົວພັນຕ່າງປະເທດສູນກາງພັກ ໄດ້ລາຍງານສະພາບການນໍາໃຊ້ ແລະ ການພັດທະນາວຽກງານໄອຊີທີ ຂອງຄະນະພົວພັນຕ່າງປະເທດສູນກາງພັກ ໂດຍໄດ້ຍົກໃຫ້ເຫັນເຖິງສະພາບແວດລ້ອມ ແຫ່ງຍຸກສະໄໝໃນຍຸກອຸດສາຫະກໍາໃໝ່ (4.0), ການຂະຫຍາຍຕົວຢ່າງໄວວາ ຂອງເຕັກໂນໂລຊີດິຈິຕອນ ແລະ ນະວັດຕະກໍາ ມີບົດບາດສໍາຄັນທີ່ສຸດໃນທຸກຂົງເຂດວຽກງານ ເປັນຕົ້ນແມ່ນ: ດ້ານເສດຖະກິດ, ດ້ານຄວາມໝັ້ນຄົງ, ດ້ານການບໍລິຫານຄຸ້ມຄອງ, ດ້ານວິທະຍາສາດເຕັກນິກ, ດ້ານການພົວພັນການທຸດ ແລະ ອື່ນໆ. ພັກ ແລະ ລັດຖະບານ ຈິ່ງໄດ້ກໍານົດນະໂຍບາຍ ເພື່ອສຸມໃສ່ການພັດທະນາວຽກງານຫັນເປັນດິຈິຕອນ ຢ່າງຈະແຈ້ງ ໃນມະຕິຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດຖະບານ.            

ພ້ອມນັ້ນ, ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ ກໍໄດ້ລາຍງານໃຫ້ຊາບ ສະພາບການທີ່ພົ້ນເດັ່ນໃນການພັດທະນາວຽກງານເພື່ອຫັນເປັນທັນສະໄໝຂອງ ສປປ ລາວ ໂດຍໄດ້ເນັ້ນເຖິງບູລິມະສິດສຳຄັນຂອງລັດຖະບານກັບການຫັນເປັນດິຈິຕອນ ແລະ ຍົກໃຫ້ເຫັນບາງຄຳເຫັນຂອງພະນະທ່ານ ປະທານປະເທດ ທອງລຸນ ສີສຸລິດ ທີ່ໄດ້ກ່າວມີຄໍາເຫັນໃນງານ Digital Week 2022 ວ່າ: “ການຫັນເປັນດິຈິຕອນ ແມ່ນຄວາມຕ້ອງການຈຳເປັນຢ່າງພາວະວິໄສ ໃນການພັດທະນາປະເທດເຮົາ, ທັງເປັນວຽກສຳຄັນ ແລະ ຮີບດ່ວນ. ການຫັນເປັນດິຈິຕອນ ຈະຕ້ອງດຳເນີນໄປ 3 ດ້ານພ້ອມກັນ ຈຶ່ງກາຍເປັນ 3 ເສົາຄ້ຳ ດິຈິຕອນ ຄື: 1) ລັດຖະບານດິຈິຕອນ; 2) ເສດຖະກິດດິຈິຕອນ; ແລະ 3) ສັງຄົມດິຈິຕອນ”.

ຈຸດປະສົງຂອງການລົງນາມບົດບັນທຶກຄວາມເຂົ້າໃຈຮ່ວມກັນໃນຄັ້ງນີ້ ກໍເພື່ອເປັນບ່ອນອີງໃນການຮ່ວມມື ຄົ້ນຄວ້າ,​ ແລກປ່ຽນບົດຮຽນ, ພັດທະນາ ແລະ ນໍາໃຊ້ເຄື່ອງມືດິຈິຕອນ ຫັນວຽກງານຂອງຄະນະພົວພັນຕ່າງປະເທດສູນກາງພັກເປັນທັນສະໄໝ. ຊຶ່ງຂອບເຂດການຮ່ວມມື ປະກອບມີ: 1) ຄົ້ນຄວ້າ ແລະ ສະໜັບສະໜູນການຫັນເປັນດີຈິຕອນໃນວຽກງານຄຸ້ມຄອງ ແລະ ບໍລິຫານລັດໃຫ້ແກ່ ຄະນະພົວພັນຕ່າງປະເທດສູນກາງພັກໂດຍສອດຄ່ອງກັບຍຸດທະສາດລວມແຫ່ງຊາດກ່ຽວກັບວຽກງານເຕັກໂນໂລຊີ ແລະ ການສື່ສານ ເປັນຕົ້ນແມ່ນ ລະບົບຈໍລະຈອນເອກະສານແບບທັນສະໄໝ (E-Office) ຮອງຮັບເອກະສານທົ່ວໄປ ແລະ ວຽກທີ່ບໍ່ແມ່ນວຽກພິເສດສະເພາະກິດຕ່າງໆ, ລະບົບຈົດໝາຍເອເລັກໂຕຣນິກ (E-mail), ລະບົບເວັບໄຊ (G-Web), ລະບົບສື່ສານພາກລັດ (G-Chat), ລະບົບແບ່ງປັນເອກະສານພາກລັດ (G-Share), ລະບົບຄຸ້ມຄອງບຸກຄະລາກອນ (HR) ແລະ ອື່ນໆ; 2) ຊ່ວຍສ້າງຖານຂໍ້ມູນພະນັກງານຂອງຄະນະພົວພັນຕ່າງປະເທດສູນກາງພັກໃຫ້ເປັນລະບົບດີຈິຕອນທີ່ສາມາດເຂົ້າເບິ່ງຜ່ານແອັບພລິເຄເຊິນ (Application) ໃນໂທລະສັບມືຖື ແລະ ຄອມພິວເຕີ. ໂດຍມີການກໍານົດສິດໃນການເຂົ້າເຖິງ, ດັດແກ້ປັບປຸງຖານຂໍ້ມູນບຸກຄົນ ຕາມລໍາດັບຄວາມສໍາຄັນຂອງຜູ້ນໍາໃຊ້ (User), ເຂົ້າເຖິງຖານຂໍ້ມູນໄດ້ທຸກສະຖານທີ່, ໄດ້ທຸກເວລາ, ປ້ອງກັນການຖືກໂຈມຕີ (Cyberattack), ຮັບປະກັນຄວາມລັບ; 3) ໃຫ້ຄໍາປຶກສາ ແລະ ສະໜັບສະໜູນການປັບປຸງພື້ນຖານໂຄງລ່າງດິຈິຕອນ ແລະ ບັນດາອຸປະກອນ ICT ທີ່ ທັນສະໄໝ ເປັນຕົ້ນແມ່ນ ລະບົບເຄືອຂ່າຍອິນເຕີເນັດ, ລະບົບເກັບກໍາຂໍ້ມູນຂ່າວສານ, ການສ້າງຖານຂໍ້ມູນວິຊາສະເພາະຂອງບັນດາກົມຂອງຄະນະພົວພັນຕ່າງປະເທດສູນກາງພັກໂດຍນໍາໃຊ້ເປັນຄັງຂໍ້ມູນແບບ Cloud; 4) ພັດທະນາເວັບໄຊ ແລະ ແພລັດຟອມ (Platform) ຕ່າງໆຂອງຄະນະພົວພັນຕ່າງປະເທດສູນກາງພັກ ທີ່ສາມາດເຜີຍແຜ່ໂຄສະນາວຽກງານການຕ່າງປະເທດຂອງພັກ ແລະ ການທູດປະຊາຊົນ, ປ້ອງກັນການຖືກໂຈມຕີ (Cyberattack); 5) ຮ່ວມກັນບຳລຸງກໍ່ສ້າງພະນັກງານຂອງຄະນະພົວພັນຕ່າງປະເທດສູນກາງພັກໃຫ້ສາມາດນຳໃຊ້ເຕັກໂນໂລຊີ ເຂົ້າໃນການບໍລິຫານ, ວຽກງານການບໍລິການ ແລະ ການພັດທະນາລະບົບດິຈີຕອນ; ແລະ 6) ຮ່ວມມືກັນໃນວຽກງານອື່ນໆຕາມການຕົກລົງເຫັນດີທີ່ບໍ່ຂັດກັບລະບຽບ ແລະ ກົດໝາຍຂອງ ສປປ ລາວ.

ໂອກາດດຽວກັນນີ້, ຄະນະປະທານທັງສອງທ່ານ ຍັງໄດ້ໃຫ້ກຽດມີຄໍາເຫັນ ແລະ ສະແດງຄວາມຍ້ອງຍໍຊົມເຊີຍ ພ້ອມທັງເນັ້ນເຖິງຄວາມສໍາຄັນຂອງວຽກງານຫັນເປັນດິຈິຕອນ ທີ່ເປັນວຽກງານບູລິມະສິດຂອງລັດບານ  ເວົ້າລວມ, ເວົ້າສະເພາະ ກໍຄື ການຫັນວຽກງານຂອງຄະນະພົວພັນຕ່າງປະເທດສູນກາງພັກເປັນດິຈິຕອນ.