ໃນຕອນເຊົ້າຂອງວັນທີ 14 ສິງຫາ 2024 ຜ່ານມາ, ທີ່ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດຝືກອົບຮົມ ວຽກງານ ລາຍເຊັນດິຈິຕອນ ແລະ ການຢັ້ງຢືນເອເລັກໂຕຣນິກ ລາວ-ຫວຽດນາມ ໃນຫົວຂໍ້: “ການນຳໃຊ້ໃບຮັບຮອງລາຍເຊັນເອເລັກໂຕຣນິກ ໃນການເຮັດທຸລະກຳທາງເອເລັກໂຕຣນິກ” (Deployment of Certificate Authentication in e-Transactions), ຮ່ວມເປັນປະທານກ່າວເປີດໂດຍ ທ່ານ ມີນາໄຊ ພິລາວົງ, ຫົວໜ້າສູນອິນເຕີເນັດ ແຫ່ງຊາດ (LANIC), ກະຊວງເຕັກໂນໂລຊີ ແລະ ການສື່ສານ ແລະ ທ່ານ ດັງ ດິນ ເຈືອງ (Mr. Dang Dinh Truong), ຮອງຫົວໜ້າ ສູນຮັບຮອງເອເລັກໂຕຣນິກ ແຫ່ງຊາດ (NEAC), ສສ ຫວຽດນາມ, ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ, ມີບັນດາທ່ານຄະນະພະແນກ ແລະ ຊ່ຽວຊານຂອງທັງສອງສູນ, ບັນດານັກສໍາມະນາກອນຕາງໜ້າຈາກບັນດາກົມພາຍໃນ ກຕສ, ກະຊວງອ້ອມຂ້າງ, ຜູ້ໃຫ້ບໍລິການອອກໃບຮັບຮອງລາຍເຊັນເອເລັກໂຕຣນິກ ແລະ ພາກສ່ວນກ່ຽວຂ້ອງເຂົ້າຮ່ວມເກືອບ 60 ທ່ານ.

ການຈັດຝຶກອົບຮົມໃນຄັ້ງນີ້ ຖືເປັນໝາກຜົນຂອງການຮ່ວມມືພາຍໃຕ້ບົດບັນທຶກຄວາມເຂົ້າໃຈ ແລະ ແຜນການຮ່ວມມື ລະຫວ່າງ ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ, ການຮ່ວມມືໃນກອບວຽກງານສະເພາະ ຊຶ່ງກໍແມ່ນວຽກງານລາຍເຊັນດິຈິຕອນ ແລະ ການຮັບຮອງທາງເອເລັກໂຕຣນິກ ລະຫວ່າງ LANIC ແລະ NEAC. ສອງສູນດັ່ງກ່າວ ໄດ້ມີບົດບັນທຶກຄວາມເຂົ້າໃຈ ຫຼື MoU ນັບແຕ່ປີ 2016 ເປັນຕົ້ນມາ, ໃນແຕ່ລະປີ ສູນ NEAC ແມ່ນໄດ້ເດີນທາງມາຈັດຝຶກອົບຮົມ ແລະ ແລກປ່ຽນບົດຮຽນກ່ຽວກັບວຽກງານການນຳໃຊ້ໃບຮັບຮອງລາຍເຊັນເອເລັກໂຕຣນິກ ໃນ ສສ ຫວຽດນາມ ໃຫ້ແກ່ ກະຊວງເຕັກໂນໂລຊີ ແລະ ການສື່ສານ ແລະ ພາກສ່ວນທີ່ກ່ຽວຂ້ອງອ້ອມຂ້າງ. ນອກຈາກນັ້ນ, ຄະນະຈາກທາງ ສູນອິນເຕີເນັດ ແຫ່ງຊາດ ກໍໄດ້ເດີນທາງໄປ ສສ ຫວຽດນາມ ເພື່ອໄປສຶກສາ ແລະ ແລກປ່ຽນບົດຮຽນນຳບັນດາອົງການລັດ ແລະ ບໍລິສັດ ທີ່ເຮັດວຽກໃຫ້ບໍລິການວຽກງານລາຍເຊັນເອເລັກໂຕຣນິກ ເພື່ອຖອດຖອນເອົາແນວທາງ ແລະ ບົດຮຽນ ທີ່ ສສ ຫວຽດນາມ ປະສົບຜົນສຳເລັດແລ້ວນັ້ນ ມາປັບປ່ຽນນຳໃຊ້ກັບ ສປປ ລາວ.

ຊຸດຝຶກອົບຮົມໃນມື້ນີ້ ຖືເປັນຂີດໝາຍອັນສຳຄັນ ໃນການສ້າງຈິດສຳນຶກ ແລະ ຄວາມຮັບຮູ້ໃນສັງຄົມລາວ ກ່ຽວກັບການນຳໃຊ້ ໃບຮັບຮອງລາຍເຊັນເອເລັກໂຕຣນິກ ເຂົ້າໃນການເຮັດທຸລະກຳທາງເອເລັກໂຕຣນິກ ທັງໃນຂົງເຂດເຕັກໂນໂລຊີ ແລະ ໃນຂົງເຂດຕ່າງໆປີ່ນອ້ອມ, ການນຳໃຊ້ໃບຮັບຮອງລາຍເຊັນເອເລັກໂຕຣນິກ ເຂົ້າໃນການເຮັດທຸລະກຳທາງເອເລັກໂຕຣນິກນີ້ ແມ່ນມີຄວາມຈຳເປັນ ແລະ ສຳຄັນຫຼາຍໃນໂລກອິນເຕີເນັດ ເພາະມັນຈະເປັນການຢັ້ງຢືນຕົວຕົນຂອງຜູ້ໃຊ້, ປ້ອງກັນການປອມແປງ-ການແອບອ້າງ ແລະ ມີຄວາມປອດໄພ ເຮັດໃຫ້ຜູ້ໃຊ້ລະບົບ ແລະ ເຈົ້າຂອງລະບົບມີຄວາມໝັ້ນໃຈໃນການເຮັດທຸລະກຳຕ່າງໆ ຜ່ານທາງເອເລັກໂຕຣນິກ. ພ້ອມກັນນັ້ນ, ຜູ້ເຂົ້າຮ່ວມຍັງໄດ້ແລກປ່ຽນບົດຮຽນນຳ ຄະນະຊ່ຽວຊານ ຈາກສູນ NEAC ສສ ຫວຽດນາມ ຊຶ່ງເປັນຜູ້ທີ່ປະສົບຜົນສຳເລັດ ແລະ ໃຫ້ບໍລິການໃນສັງຄົມ ຂອງ ສສ ຫວຽດນາມ ຢ່າງກວ້າງຂວາງ. ຊຶ່ງບົດຮຽນທີ່ຖອດຖອນໄດ້ຈາກຊຸດຝຶກອົບຮົມໃນຄັ້ງນີ້, ສູນອິນເຕີເນັດ ແຫ່ງຊາດ ຈະໄດ້ນໍາໄປຜັນຂະຫຍາຍເຂົ້າໃນການພັດທະນາ ເພື່ອຍົກລະດັບລະບົບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ, ສ້າງ ແລະ ປັບປຸງຄືນບັນດາລະບຽບການ, ນິຕິກໍາ ແລະ ການຈັດຕັ້ງປະຕິບັດ ໃຫ້ແທດເໝາະກັບໜ້າວຽກຕົວຈິງໃນປັດຈຸບັນ ເພື່ອກະກຽມຄວາມພ້ອມ ໃນການຫັນເປັນດິຈິຕອນ (Digital Transformation) ແລະ ການພັດທະນາເສດຖະກິດດິຈິຕອນ (Digital Economy) ໃຫ້ສອດຄ່ອງກັບແນວທາງແຜນພັດທະນາເສດຖະກິດຂອງ ສປປ ລາວ.

ພາບ ແລະ ຂ່າວ: ສູນອິນເຕີເນັດ ແຫ່ງຊາດ