ໃນຕອນເຊົ້າຂອງວັນທີ 06 ກັນຍາ 2024 ຜ່ານມາ, ທີ່ຫ້ອງຮັບແຂກ ຂອງ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຄອຍຊູມິ ຊູໂທມຸ (H.E. Mr. Koizumi Tsutomu), ເອກອັກຄະລັດຖະທູດ ຍີ່ປຸ່ນ ປະຈຳ ສປປ ລາວ ເນື່ອງໃນໂອກາດມາຮັບໜ້າທີ່ໃໝ່.

ໂອກາດດັ່ງກ່າວ, ທ່ານ ເອກອັກຄະລັດຖະທູດ ຍີ່ປຸ່ນ ໄດ້ກ່າວສະແດງຄວາມຂອບໃຈ ຕໍ່ທ່ານລັດຖະມົນຕີ ທີ່ໄດ້ເສຍສະຫຼະເວລາອັນມີຄ່າຕ້ອນຮັບການເຂົ້າຢ້ຽມຂໍ່ານັບໃນຄັ້ງນີ້ດ້ວຍບັນຍາກາດອັນອົບອຸ່ນ. ທ່ານກ່າວວ່າ: ໃນປີນີ້ ສປປ ລາວ ໄດ້ຮັບໜ້າທີ່ທີ່ສໍາຄັນເປັນປະທານອາຊຽນ ແລະ ປີໜ້າກໍຄົບຮອບ 70 ປີ ສາຍພົວພັນທາງການທູດ ລະຫວ່າງ ລາວ-ຍີ່ປຸ່ນ ກໍຄື ຄົບຮອບ 10 ປີ ໃນການສ້າງຕັ້ງຄູ່ຮ່ວມຍຸດທະສາດລະຫວ່າງສອງປະເທດ ແລະ ສະແດງຄວາມຮູ້ສຶກຕື້ນຕັນໃຈຫຼາຍທີ່ໄດ້ຮັບໜ້າທີ່ອັນສໍາຄັນ ເປັນເອກອັກຄະລັດຖະທູດ ຍີ່ປຸ່ນ ປະຈໍາ ສປປ ລາວ. ພ້ອມນັ້ນ, ທ່ານຍັງໄດ້ລາຍງານໃຫ້ຊາບວ່າ ການພົວພັນຮ່ວມມືກັບ ກະຊວງເຕັກໂນໂລຊີ ແລະ ການສື່ສານ ໃນໄລຍະຜ່ານມາ ແລະ ການຮ່ວມມືໃນອະນາຄົດໃນດ້ານຕ່າງໆ. ພ້ອມນັ້ນ, ກໍໄດ້ແຈ້ງໃຫ້ຊາບ ການພົວພັນຮ່ວມມືກັບ ໄປສະນີລາວ ໃນການກະກຽມເຮັດສະແຕມໄປສະນີ ເນື່ອງໃນໂອກາດ ຄົບຮອບ 70 ປີ ສາຍພົວພັນທາງການທູດ ລາວ-ຍີ່ປຸ່ນ.

ພ້ອມດຽວກັນນີ້, ທ່ານ ລັດຖະມົນຕີ ກໍໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານເອກອັກຄະລັດຖະທູດ ໃນໂອກາດມາຮັບໜ້າທີ່ໃໝ່ໃນຄັ້ງນີ້. ພ້ອມນັ້ນ ກໍໄດ້ສະເໜີການຮ່ວມມືໃນຫຼາຍກິດຈະກໍາ ຮ່ວມກັບສະຖານທູດ ກໍຄື ຄູ່ຮ່ວມມືໃນປະເທດຍີ່ປຸ່ນ ເພື່ອສະເຫຼີມສະຫຼອງເຫດການທີ່ສໍາຄັນຂອງສອງປະເທດທີ່ຈະມາເຖິງໃນປີໜ້ານີ້ ແລະ ສະໜັບສະໜູນການເຮັດສະແຕມໄປສະນີ ເພື່ອເປັນສັນຍາລັກການຮ່ວມມືລະຫວ່າງສອງປະເທດ. ທ່ານຍັງໄດ້ສະແດງຄວາມຂອບໃຈ ຕໍ່ການຊ່ວຍເຫຼືອຂອງປະເທດຍີ່ປຸ່ນໃນໄລຍະຜ່ານມາ ເປັນຕົ້ນແມ່ນ ການຊ່ວຍເຫຼືອສ້າງສູນຂໍ້ມູນທີ່ນໍາໃຊ້ພະລັງງານຢ່າງມີປະສິດທິພາບ ຂອງ ສປປ ລາວ (Data center) ຊຶ່ງປັດຈຸບັນກໍຍັງໄດ້ມີການນໍາໃຊ້ຢູ່ ແລະ ການຊ່ວຍເຫຼືອດ້ານຕ່າງໆເພື່ອກະກຽມຮັບໃຊ້ໃນກອງປະຊຸມສຸດຍອດອາຊຽນ ທີ່ ສປປ ລາວ ຈະຮັບກຽດເປັນເຈົ້າພາບໃນທ້າຍປີນີ້ ໂດຍສະເພາະທາງດ້ານວຽກງານການສື່ສານ ຊຶ່ງກະຊວງເຕັກໂນໂລຊີ ແລະ ການສື່ສານ ເປັນຜູ້ຮັບຜິດຊອບ. ຕອນທ້າຍ ທ່ານໄດ້ສະເໜີການຮ່ວມມື ໃນວຽກງານພັດທະນາບຸກຄະລາກອນ ທາງດ້ານເຕັກໂນໂລຊີການສື່ສານຂໍ້ມູນຂ່າວສານ ຂອງ ສປປ ລາວ ຮ່ວມກັບ ມະຫາວິທະຍາໄລ ໃດໜຶ່ງຂອງ ປະເທດຍີ່ປຸ່ນ ອີກດ້ວຍ.

ພາບ ແລະ ຂ່າວ: ພຸດດວອນ ພາສຸວັນ