ພິທີມອບ-ຮັບໜ້າທີ່ ລະຫວ່າງ ທ່ານ ພູຂົງ ຈິດຮູບໂລກ, ຫົວໜ້າຫ້ອງການ ກະຊວງເຕັກໂນໂລຊີ ແລະ ການສື່ສານ (ຜູ້ເກົ່າ) ແລະ ທ່ານ ພວງປະເສີດ ແກ້ວສຸວັນ, ຮັກສາການຫົວໜ້າຫ້ອງການ ກະຊວງເຕັກໂນໂລຊີ ແລະ ການສື່ສານ (ຜູ້ໃໝ່) ໄດ້ຈັດຂຶ້ນໃນຕອນບ່າຍຂອງວັນທີ 06 ກັນຍາ 2024, ທີ່ຫ້ອງປະຊຸມ ຂອງ ສູນອິນເຕີເນັດແຫ່ງຊາດ, ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຮອງລັດຖະມົນຕີ, ບັນດາຫົວໜ້າ, ຮອງຫົວໜ້າ ກົມ/ທຽບເທົ່າ ພາຍໃນກະຊວງ, ບັນດາຫົວໜ້າ, ຮອງຫົວໜ້າພະແນກ ພ້ອມດ້ວຍພະນັກງານວິຊາການພາຍໃນຫ້ອງການເຂົ້າຮ່ວມ 50 ກວ່າທ່ານ.

            ການມອບ-ຮັບ ໜ້າທີ່ຄັ້ງນີ້, ໂດຍປະຕິບັດຕາມຂໍ້ຕົກລົງ ສະບັບເລກທີ 2964/ກຕສ, ລົງວັນທີ 11 ກໍລະກົດ 2024 ວ່າດ້ວຍການຍົກຍ້າຍ ທ່ານ ພູຂົງ ຈິດຮູບໂລກ ຄະນະປະຈໍາພັກກະຊວງ, ຫົວໜ້າຫ້ອງການກະຊວງ ໄປເປັນ ຫົວໜ້າຫ້ອງການກອງເລຂາ ກອງທຶນພັດທະນາໂທລະຄົມມະນາ ແລະ ການຫັນເປັນດິຈິຕອນ ແລະ ຂໍ້ຕົກລົງ ສະບັບເລກທີ 2961/ກຕສ, ລົງວັນທີ 11 ກໍລະກົດ 2024 ວ່າດ້ວຍ ການແຕ່ງຕັ້ງ ທ່ານ ພວງປະເສີດ ແກ້ວສຸວັນ, ກຳມະການຄະນະບໍລິຫານງານພັກກະຊວງ, ຮອງຫົວໜ້າອົງການດັດສົມໂທລະຄົມມະນາຄົມ ເປັນຜູ້ຮັກສາການ ຫົວໜ້າຫ້ອງການ ກະຊວງເຕັກໂນໂລຊີ ແລະ ການສື່ສານ.

            ໂອກາດນີ້, ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ມີຄໍາເຫັນເນັ້ນໜັກໃຫ້ຜູ້ທີ່ຮັບໜ້າທີ່ໃໝ່ຄັ້ງນີ້ເອົາໃຈໃສ່ປັບປຸງບັນດາວຽກງານທີ່ຍັງຄົງຄ້າງ ແລະ ສືບຕໍ່ເສີມຂະຫຍາຍດ້ານດີ, ປະຕິບັດວຽກງານຕາມທິດຊີ້ນຳຂອງພັກ, ເຕົ້າໂຮມຄວາມສາມັກຄີພາຍໃນ ແລະ ພັດທະນາຄວາມຮູ້ຄວາມສາມາດຂອງຕົນ ຕະຫຼອດເຖິງອ້າຍນ້ອງພະນັກງານ. ພ້ອມນັ້ນ, ທ່ານຍັງຍົກໃຫ້ເຫັນເຖິງພາລະບົດບາດຄວາມສຳຄັນດ້ານວຽກງານຕ່າງໆພາຍໃນຫ້ອງການ ຊຶ່ງເຮັດໜ້າທີ່ເປັນເສນາທິການຫຼັກໃຫ້ແກ່ຄະນະພັກ-ຄະນະນຳ ກໍຄື ກະຊວງ.