ຄະນະຜູ້ແທນ ກະຊວງເຕັກໂນໂລຊີ ແລະ ການສື່ສານ (ກຕສ) ນຳໂດຍ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ໄດ້ນຳພາຄະນະເດີນທາງໄປເຂົ້າຮ່ວມກອງປະຊຸມສາກົນດ້ານການສຳຫຼວດອາວະກາດລວງເລິກ ຄັ້ງທີ 2, ໃນລະຫວ່າງ ວັນທີ 05-06 ກັນຍາ 2024 ທີ່ເມືອງຫວງຊານ, ແຂວງອັນຮຸຍ, ສປ ຈີນ ຕາມຄຳເຊີນຂອງອົງການອາວະກາດແຫ່ງຊາດຈີນ. ກອງປະຊຸມດັ່ງກ່າວ ໄດ້ຈັດໂດຍຫ້ອງທົດລອງສຳຫຼວດອາວະກາດລວງເລິກ (Deep Space Exploration Laboratory, DSEL) ​ພາຍໃຕ້ຄຳຂວັນ “ສະ​ຖາ​ນີ​ຄົ້ນ​ຄ​ວ້າ​ດວງ​ຈັນ​ສາ​ກົນ - ປຶກ​ສາ​ຫາ​ລື, ​ສ້າງ ແລະ ແບ່ງ​ປັນ” ສຸມ​ໃສ່​ການ​ຮ່ວມ​ມື​ເພື່ອ​ການ​ກໍ່​ສ້າງ​ ແລະ ​ຄວາມ​ກ້າວ​ໜ້າ​ຂອງ​ສະ​ຖາ​ນີ​ຄົ້ນ​ຄວ້າ​ດວງ​ຈັນ, ໂດຍມີບັນດາການນຳ ແລະ ແຂກຮັບເຊີນຈາກພາຍໃນ ສປ ຈີນ ເປັນຕົ້ນແມ່ນ ທ່ານ Fei Gaoyun ຮອງເຈົ້າແຂວງໆ ອັນຮຸຍ, ທ່ານ Li Guoping ວິສະວະກອນອາວຸໂສ ອົງການອາວະກາດແຫ່ງຊາດຈີນ (CNSA), ທ່ານ ສຈ. Wu Weiren ຫົວໜ້າຫ້ອງທົດລອງສໍາຫຼວດອາວະກາດລວງເລິກ (DSEL), ທ່ານ Zhai Zhigang ນັກບິນອາວະກາດຄົນທຳອິດຂອງ ສປ ຈີນ ແລະ ຍັງມີບັນດາຜູ້ແທນ ແລະ ອົງການຈັດຕັ້ງສາກົນຕ່າງໆ ຈາກ 40 ກວ່າ ປະເທດເຂົ້າຮ່ວມເຊັ່ນ: ທ່ານ Christian Feichtinger ຜູ້ອຳນວນການໃຫຍ່ ສະຫະພັນອາວະກາດສາກົນ (IAF), ທ່ານ Arnaldo Tamayo Mendez ອະດີດນັກບິນອາວະກາດ ສ. ກຸຍບາ ແລະ ທ່ານອື່ນໆ ເຂົ້າຮ່ວມ.

ຈຸດປະສົງຂອງກອງປະຊຸມ ແມ່ນເພື່ອປຶກສາຫາລືການຮ່ວມມື ດ້ານການຄົ້ນຄວ້າດ້ານອາວະກາດລວງເລິກ ທີ່ສຳຄັນເຊັ່ນ: ການຄົ້ນຄວ້າດ້ານເຕັກໂນໂລຊີວິສະວະກຳອາວະກາດ, ການຄົ້ນຄວ້າ ແລະ ພັດທະນາວິທະຍາສາດອາວະກາດລວງເລິກ, ການນຳໃຊ້ຊັບພະຍາກອນອາວະກາດ ແລະ ການຮ່ວມມືສຳລັບໂຄງການຄົ້ນຄວ້າວິທະຍາສາດຂະໜາດໃຫຍ່ເຊັ່ນ: ສະຖານີການຄົ້ນຄວ້າດວງຈັນສາກົນ ແນໃສ່ສ້າງແນວຄິດເປີດກວ້າງ ທີ່ເປັນເອກະພາບກັນ ເພື່ອລົງເລິກການແລກປ່ຽນ ແລະ ຮ່ວມມືຢ່າງເລິກເຊິ່ງໃນການສຳຫຼວດອາວະກາດ, ສ້າງຄວາມເຫັນດີເຫັນພ້ອມຮ່ວມມືກັນເພື່ອດຳເນີນການສຳຫຼວດດວງຈັນ ແລະ ດາວເຄາະດວງໃໝ່ເທື່ອລະກ້າວ, ປະກອບສ່ວນເຂົ້າໃນການເປີດເຜີຍຄວາມລີ້ລັບຂອງຈັກກະວານ, ນຳເອົາຜົນສຳເລັດທີ່ເປັນປະໂຫຍດສູງສຸດມາສູ່ມວນມະນຸດ ແລະ ສ້າງອານາຄົດໃໝ່ຮ່ວມກັນ.

ໃນພິທີເປີດກອງປະຊຸມດັ່ງກ່າວ, ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີ ກຕສ, ຫົວໜ້າຄະນະຜູ້ແທນ ສປປ ລາວ ກໍໄດ້ຮັບກຽດຂຶ້ນມີຄຳເຫັນ ເຊິ່ງມີຕອນໜຶ່ງທ່ານໄດ້ເນັ້ນໃຫ້ເຫັນເຖິງຄວາມສຳຄັນໃນວຽກງານເຕັກໂນໂລຊີອາວະກາດ ເພື່ອການພັດທະນາເສດຖະກິດ-ສັງຄົມ ໃນການຫັນເປັນດິຈິຕອນ ດ້ວຍການຮ່ວມມືກັບ ສປ ຈີນ, ໂດຍສະເພາະແມ່ນການຜັນຂະຫຍາຍສັນຍາວ່າດ້ວຍການຮ່ວມມື ກ່ຽວກັບການນຳໃຊ້ຊັ້ນອາວະກາດ ຮ່ວມກັນຢ່າງສັນຕິ ທີ່ໄດ້ເຊັນກັນໃນເດືອນ ຕຸລາ ປີ 2023 ລະຫວ່າງກະຊວງເຕັກໂນໂລຊີ ແລະ ການສື່ສານ, ສປປ ລາວ ແລະ ອົງການອາວະກາດແຫ່ງຊາດ ສປ ຈີນ, ເຊິ່ງມີເປົ້າໝາຍຫຼັກໃນການພັດທະນາດາວທຽມສື່ສານ ແລະ ດາວທຽມສືບຢັ່ງທາງໄກ, ນໍາໃຊ້ດາວທຽມສືບຢັ່ງທາງໄກຢ່າງມີປະສິດທິຜົນສູງເຂົົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ແລະ ສາມາດເຊື່ອມໂຍງຂໍ້ມູນກັບສາກົນໄດ້, ການພັດທະນາ ແລະ ຮ່ວມມືໃນການນຳໃຊ້ດາວທຽມນຳທາງ, ການຮ່ວມກັນສ້າງສູນຂໍ້ມູນດາວທຽມສືບຢັ່ງທາງໄກ, ຮ່ວມກັນສ້າງສະຖານນີຮັບສັນຍານອ້າງອີງພາກພຶ້ນດິນ, ການໃຫ້ການສະໜັບສະໜູນໂຄງການສຳຫຼວດດວງຈັນຂອງ ສປ ຈີນ ແລະ ວຽກງານອາວະກາດ ຂອງທັງສອງປະເທດ ໂດຍຄຳນຶງເຖິງ ແນວທາງການຮ່ວມມືຮອບດ້ານທີ່ໝັ້ນຄົງຍາວນານ, ເປັນບ້ານໃກ້ເຮືອນຄຽງທີ່ດີ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ລະຫວ່າງ ສປປ ລາວ ແລະ ສປ ຈີນ ແລະ ນໍ້າໃຈເພື່ອນບ້ານທີ່ດີ, ເພື່ອນທີ່ດີ, ສະຫາຍທີ່ດີ, ຄູ່ຮ່ວມທີ່ດີ.

ຫຼັງຈາກນັ້ນ, ທ່ານ ປອ. ສັນຕິສຸກ ສິມມາລາວົງ ຍັງໄດ້ຂຶ້ນເວທີສົນທະນາແລກປ່ຽນວິໄສທັດ ກັບບັນດາຜູ້ຊ່ຽວຊານ ກ່ຽວກັບທິດທາງຂອງການສຳຫຼວດອາວະກາດ, ການມີສ່ວນຮ່ວມຂອງບັນດາປະເທດໃນທົ່ວໂລກໃນການສຳຫຼວດອາວະກາດ ແລະ ຜົນປະໂຫຍດໃນການສຳຫຼວດອາວະກາດທີ່ຈະສົ່ງຜົນຕໍ່ການດຳລົງຊີວິດຂອງມວນມະນຸດໃນອະນາຄົດ.

ໃນໂອກາດດັ່ງກ່າວ, ຄະນະຜູ້ແທນລາວ ຍັງໄດ້ມີການພົບປະກັບ ທ່ານ Li Guoping ວິສະວະກອນ ອາວຸໂສ ຂອງອົງການອາວະກາດແຫ່ງຊາດຈີນ (CNSA), ໄດ້ມີການລາຍງານ ສະພາບການເຄື່ອນໄຫວ ຂອງການໃຫ້ບໍລິການດາວທຽມລາວ ດວງທີ 1 (Lao Sat 01), ແຜນການໃນອະນາຄົດຂອງໂຄງການສ້າງ ແລະ ສົ່ງດາວທຽມລາວ ດວງທີ 2 (Lao Sat 02), ຄວາມຄືບໜ້າຂອງຮ່າງຂໍ້ຕົກລົງວ່າດ້ວຍການຮ່ວມມືໃນສະຖານີສຳຫຼວດດວງຈັນລະຫວ່າງປະເທດ, ການພັດທະນາດ້ານຊັບພະນາກອນມະນຸດທາງດ້ານວຽກງານດາວທຽມ ແລະ ອາວະກາດ, ເຊິ່ງ ສປ ຈີນຍິນດີໃຫ້ການຊ່ວຍເຫຼືອແກ່ ສປປ ລາວ.

ພາບ ແລະ ຂ່າວ: ພະແນກເລຂານຸການ ແລະ ພິທີການ, ຫ້ອງການ