ໃນວັນທີ 18 ກັນຍາ 2024, ສູນສົ່ງເສີມ ແລະ ຖ່າຍທອດເຕັກໂນໂລຊີ ແລະ ກົມຄວາມປອດໄພທາງໄຊເບີ, ກະຊວງເຕັກໂນໂລຊີ ແລະ ການສື່ສານ (ກຕສ) ຮ່ວມກັບ ອົງການ Asia – Pacific Network Information Center (APNIC) ໄດ້ເປີດຊຸດຝຶກອົບຮົມໃນຫົວຂໍ້: ຄວາມຮູ້ກ່ຽວກັບຄວາມປອດໄພ ທາງໄຊເບີ “Cyber Security Awareness” ຂຶ້ນທີ່ ກະຊວງ ເຕັກໂນໂລຊີ ແລະ ການສື່ສານ (ເຂດບ້ານດອນຕິ້ວ). ໃຫ້ກຽດເປັນປະທານກ່າວເປິດຊຸດຝຶກອົບຮົມຄັ້ງນີ້ໂດຍ ທ່ານ ນາງ ເກສອນ ສຸລິວົງ, ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ມີນັກວິທະຍາກອນ ແລະ ນັກສຳມະນາກອນ ຈາກບັນດາກົມ/ທຽບເທົ່າ ພາຍໃນກະຊວງ, ບັນດາກະຊວງອ້ອມຂ້າງ ເຂົ້າຮ່ວມ ຈຳນວນ 40 ກວ່າທ່ານ.

ຈຸດປະສົງຂອງການຈັດຝຶກອົບຮົມໃນຄັ້ງນີ້ ແມ່ນເພື່ອຍົກລະດັບຄວາມຮັບຮູ້ ແລະ ຄວາມເຂົ້າໃຈກ່ຽວກັບວຽກງານຄວາມປອດໄພທາງໄຊເບີ ໃຫ້ແກ່ພະນັກງານພາຍໃນ ກະຊວງເຕັກໂນໂລຊີ ແລະ ການສື່ສານ ແລະ ບັນດາກະຊວງອ້ອມຂ້າງ. ໃນປັດຈຸບັນ, ເນື່ອງຈາກວຽກງານຄວາມປອດໄພໄຊເບີເປັນວຽກບູລິມະສິດໃນການຂັບເຄື່ອນການຫັນເປັນດິຈິຕອນໃນທຸກຂະແໜງການ  ຊຶ່ງເນື້ອໃນຂອງການຝຶກອົບຮົມໃນຄັ້ງນີ້ ອົງການ APNIC ໄດ້ສະໜອງນັກວິທະຍາກອນຈາກພາຍໃນ ແລະ ຕ່າງປະເທດຜູ້ທີ່ມີບົດຮຽນ ແລະ ປະສົບການ ດ້ານສະພາບລວມຂອງຂໍ້ມູນຂ່າວສານເຄືອຂ່າຍ, ພື້ນຖານຄວາມປອດໄພຂອງເຄືອຂ່າຍ, ການຄວບຄຸມລະຫັດຜ່ານ ແລະ ປະຕິບັດຕົວຈິງ ໃນ PGP ເພື່ອມາຖ່າຍທອດຄວາມຮູ້ ຄວາມເຂົ້າໃຈກ່ຽວກັບວຽກງານຄວາມປອດໄພທາງໄຊເບີ ໃຫ້ແກ່ນັກສຳມະນາກອນ. ໃນການຝຶກອົບຮົມ ຜູ້ເຂົ້າຮ່ວມໄດ້ເອົາໃຈໃສຮຽນຮູ້ທັງພາກທິດສະດີ ແລະ ທົດລອງຕົວຈິງ ພ້ອມທັງໄດ້ເປີດໂອກາດໃຫ້ມີການ ຖາມ-ຕອບ ເເລກປ່ຽນຄວາມຮູ້ ເຊິ່ງກັນ ແລະ ກັນ ຊຶ່ງເຕັມໄປດ້ວຍບັນຍາກາດຟົດຟື້ນ. 

ບົດຂ່າວ: ສູນສົ່ງເສີມ ແລະ ຖ່າຍທອດເຕັກໂນໂລຊີ