ໃນຕອນບ່າຍຂອງ ວັນທີ 04 ​ຕຸ​ລາ 2024 ຜ່ານມາ, ທີ່ຫ້ອງປະຊຸມທາງໄກ ຊັ້ນ 03 ຂອງ ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມປຶກສາຫາລືທາງ​ດ້ານ​ວິ​ຊາ​ການ ລະຫວ່າງ​​ ຫ້ອງ​ການ ກະຊວງເຕັກ​ໂນ​ໂລ​ຊີ ແລະ ການ​ສື່​ສານ ແລະ ຫ້ອງ​ການ ກະຊວງອຸດສາຫະກຳ ແລະ ການຄ້າ, ໂດຍພາຍໃຕ້ການເປັນປະທານຮ່ວມ ຂອງ ທ່ານ ປອ. ບົວ​ວັນ ວິ​ລະ​ວົງ, ຫົວ​ໜ້າ​ຫ້ອງ​ການ ກະຊວງອຸດສາຫະກໍາ ແລະ ການຄ້າ ແລະ ທ່ານ ​ພວງ​ປະ​ເສີ​ດ ແກ້ວ​ສຸ​ວັນ, ຮັກ​ສາ​ການ​ຫົວ​ໜ້າ​ຫ້ອງ​ການ ກະຊວງເຕັກໂນໂລຊີ ແລະ ການສື່ສານ, ມີ​ຮອງຫົວໜ້າຫ້ອງການ, ຫົວ​ໜ້າ​ພະ​ແນກ ແລະ ຮອງຫົວໜ້າພະ​ແນກ ຂອງສອງກະຊວງ ເຂົ້າຮ່ວມທັງໝົດ 26 ທ່ານ.

ຈຸດປະສົງຂອງກອງປະຊຸມ ກໍເພື່ອແລກປ່ຽນບົດຮຽນດ້ານວິຊາການ, ສ້າງຄວາມຮັບຮູ້ ແລະ ຄວາມເຂົ້າໃຈ ກ່ຽວກັບຂອດການເຮັດວຽກ, ການປະສານງານ, ການຊຸກຍູ້ສົ່ງເສີມວຽກງານການຫັນເປັນດິຈິຕອນ ຂອງ ຂະແໜງອຸດສາຫະກໍາ ແລະ ການຄ້າ, ການສ້າງແຜນເຮັດວຽກຮ່ວມກັນ ລະຫວ່າງ ສອງຫ້ອງການ ກໍຄື ສອງກະຊວງ ເປັນຕົ້ນແມ່ນ ວຽກງານຄຸ້ມຄອງການຄ້າທາງເອເລັກໂຕຣນິກ, ການ​ໂຄ​ສະ​ນາ​ປະ​ສາ​ຊຳ​ພັນ​ທາງ​ສື່ສັງຄົມອອນລາຍ, ການ​ເພີ່ມ​ບັນ​ຊີ​ ລະບົບແບ່ງປັນຂໍ້ມູນພາກລັດ (G-Drive), ປຶກ​ສາ​ຫາ​ລື​ແລກ​ປ່ຽນກ່ຽວ​ກັບການ​ຈໍ​ລະ​ຈອນ​ເອ​ກະ​ສານ​ຜ່ານ​ລະ​ບົບ E-Office ແລະ ກ້າວໄປສູ່ການກະກຽມເນື້ອໃນໃຫ້ແກ່ຄະນະນໍາຂອງສອງກະຊວງ ໃນການເຮັດວຽກຮ່ວມກັນໃນຕໍ່ໜ້າ.