ໃນຕອນເຊົ້າຂອງວັນທີ 23 ຕຸລາ 2024, ທີ່ໂຮງແຮມລາວພລາຊາ, ນະຄອນຫລວງວຽງຈັນ  ໄດ້ຈັດກອງປະຊຸມສະພາດັດສົມໂທລະຄົມມະນາຄົມ ອາຊຽນ ຄັ້ງທີ 30  (The 30th ASEAN Telecommunication Regulatory' Council leaders ' Retreat  Meeting : ATRC), ໂດຍການເປັນປະທານໝູນວຽນຂອງ ສປປ ລາວ ໂດຍ ທ່ານ ນາງ ພາວັນນາ ດວງບຸບຜາ, ຮອງຫົວໜ້າອົງການດັດສົມໂທລະຄົມມະນາຄົມ, ເຈົ້າໜ້າທີ່ດັດສົມໂທລະຄົມມະນາຄົມ ຂອງ ສປປ ລາວ ຄັ້ງທີ 30. ກອງປະຊຸມໃຫ້ກຽດກ່າວເປີດກອງປະຊຸມໂດຍ ທ່ານ ພູຂົງ ຈິດຮູບໂລກ, ຫົວໜ້າຫ້ອງການກອງເລຂາ ກອງທຶນພັດທະນາໂທລະຄົມມະນາຄົມ ແລະ ການຫັນເປັນດິຈິຕອນ, ເຈົ້າໜ້າທີອາວຸໂສດິຈິຕອນ ຂອງ ສປປ ລາວ, ມີເຈົ້າໜ້າອາວຸໂສຕາງໜ້າ 10 ປະເທດອາຊຽນ ແລະ ຄະນະຮັບຜິດຊອບ ເຂົ້າຮ່ວມຫຼາຍກວ່າ 70 ທ່ານ, ຊຶ່ງຫົວໜ້າຄະນະຜູ້ແທນກອງປະຊຸມດັ່ງກ່າວຂອງ ສປປ ລາວ ນໍາພາໂດຍ ທ່ານ ສຸດໃຈ ລໍລອນສີ, ຫົວໜ້າອົງການດັດສົມໂທລະຄົມມະນາຄົມ ພ້ອມດ້ວຍຄະນະຜູ້ແທ່ນ ຈຳນວນ 10 ທ່ານ.

  ກອງປະຊຸມຄັ້ງນີ້ ແມ່ນໜຶ່ງໃນກອງປະຊຸມຍ່ອຍ ຂອງກອງປະຊຸມເຈົ້າໜ້າທີ່ອາວຸໂສດິຈິຕອນອາຊຽນ (ADGSOM) ທີ່ຈະຈັດຂຶ້ນຢູ່ນະຄອນຫຼວງວຽງຈັນ ໃນລະຫວ່າງ ວັນທີ 24-25 ຕຸລາ 2024 ຊຶ່ງກອງປະຊຸມໄດ້ດຳເນີນເປັນເວລາສອງມື້, ມື້ທໍາອິດແມ່ນຈະປຶກສາຫາລື ກ່ຽວກັບວຽກໂທລະຄົມມະນາຄົມ, ລະບຽບການ ແລະ ນະໂຍບາຍ ການຫັນເປັນດິຈິຕອນ ຂອງບັນດາປະເທດສະມາຊິກ ອາຊຽນ ແລະ ມື້ທີສອງແມ່ນກອງປະຊຸມຈະໄດ້ປຶກສາຫາລາລືກັບຄູ່ຮ່ວມເຈລະຈາ ສປ ຈີນ, ຍີ່ປຸ່ນ, ສະຫະພັນ ຣັດເຊຍ ແລະ ອົງການໂທລະຄົມມະນາຄົມ ອາຊີ-ປາຊິຟິກ (Asia-Pacific Telecommunication-APT).