ກົມແຜນການ ແລະ ການເງິນ, ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມເຜີຍແຜ່ຂໍ້ຕົກລົງວ່າດ້ວຍ ການສະສາງລົດຂອງລັດ ສະບັບເລກທີ 169/ນຍ, ລົງວັນທີ 28 ທັນວາ 2023 ຂຶ້ນໃນຕອນບ່າຍຂອງວັນທີ 22 ຕຸລາ 2024, ທີ່ຫ້ອງປະຊຸມ ຂອງ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ຊັ້ນ 01 ຕຶກ F), ໂດຍພາຍໃຕ້ການເປັນປະທານກ່າວເປີດພິທີ ຂອງ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ,   ມີອະດີດລັດຖະມົນຕີ ແລະ ພະນັກງານບໍານານ ພ້ອມດ້ວຍຄະນະກົມ, ຄະນະພະແນກ ແລະ ວິຊາການ ຈາກບັນດາກົມ/ທຽບເທົ່າ ອ້ອມຂ້າງກະຊວງເຕັກໂນໂລຊີ ແລະ ການສື່ສານ ເຂົ້າຮ່ວມທັງໝົດ 50 ທ່ານ, ຊຶ່ງເຜີຍແຜ່ເອກະສານໂດຍ ທ່ານ ສົມບູນ ແກ່ນປະເສີດ, ຮອງຫົວໜ້າກົມຄຸ້ມຄອງຊັບສິນຂອງລັດ, ກະຊວງການເງິນ.

ຈຸດປະສົງຂອງການປະຊຸມໃນຄັ້ງນີ້ ກໍເພື່ອເຜີຍແຜ່ຂໍ້ຕົກລົງ ວ່າດ້ວຍ ການສະສາງລົດຂອງລັດ ສະບັບເລກທີ 169/ນຍ, ລົງວັນທີ 28 ທັນວາ 2023 ໃຫ້ແກ່ພະນັກງານບໍານານ ແລະ ພະນັກງານທີ່ນຳໃຊ້ລົດຂອງລັດ ໃນນຳໃຊ້, ການຄຸ້ມຄອງ ແລະ ການສະສາງລົດຂອງລັດ ເພື່ອໃຫ້ຖືກຕ້ອງຕາມລະບຽບການ, ເພື່ອເປັນການຍົກສູງຄວາມຮັບຜິດຊອບ ແລະ ເປັນເຈົ້າໃນການຈັດຕັ້ງປະຕິບັດໃຫ້ເກີດປະສິດທິພາບ ແລະ ປະສິດທິຜົນສູງສຸດ ສຳລັບນິຕິກຳກ່ຽວກັບການສະສາງລົດຂອງລັດໃຫ້ຖືກເປົ້າໝາຍ ແລະ ມີປະໂຫຍດສູງສຸດ. ກອງປະຊຸມດັ່ງກ່າວໄດ້ດຳເນີນເປັນເວລາເຄິ່ງວັນຈຶ່ງໄດ້ປິດລົງ.

ຂ່າວ: ກົມແຜນການ ແລະ ການເງິນ