ໃນລະຫວ່າງວັນທີ 14-19 ຕຸລາ 2024, ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ (ກຕສ), ຊຶ່ງເປັນຜູ້ຄຸ້ມຄອງວຽກງານການຮັບຮອງລາຍເຊັນເອເລັກໂຕຣນິກ ແຫ່ງຊາດ (CA) ໄດ້ເດີນທາງໄປເຮັດວຽກ ທີ່ ສສ ຫວຽດນາມ ເພື່ອແລກປ່ຽນບົດຮຽນການຄຸ້ມຄອງວຽກງານການຢັ້ງຢືນທາງເອເລັກໂຕຣນິກ ກັບບັນດາຄູ່ຮ່ວມມືຈາກ ສສ ຫວຽດນາມ, ຄະນະດັ່ງກ່າວ ແມ່ນນໍາໂດຍ ທ່ານ ໄຊສົມຫວັງ ສຸວັນນະວົງ, ຮອງຫົວໜ້າ ສູນອິນເຕີເນັດ ແຫ່ງຊາດ, ມີ ທ່ານ ນ. ນີລາເພັດ ຄຳມຸງຄຸນ, ຫົວໜ້າພະແນກ ສູນຮັບຮອງລາຍເຊັນເອເລັກໂຕຣນິກ ແຫ່ງຊາດ ພ້ອມດ້ວຍວິຊາການເຕັກນິກທີ່ກ່ຽວຂ້ອງເຂົ້າຮ່ວມ.

ຄະນະຈາກ ສູນອິນເຕີເນັດ ແຫ່ງຊາດ (LANIC) ແມ່ນໄດ້ເດີນທາງເຂົ້າຢ້ຽມຢາມ ເຮັດວຽກ ກັບ ສູນຮັບຮອງລາຍເຊັນເອເລັກໂຕຣນິກ ສສ ຫວຽດນາມ (NEAC) ທີ່ນະຄອນຫຼວງຮ່າໂນ້ຍ ເພື່ອຮ່ວມປະຊຸມປຶກສາຫາລື ແລກບົດຮຽນການຄຸ້ມຄອງວຽກງານການຢັ້ງຢືນທາງເອເລັກໂຕຣນິກ, ທົບທວນຜົນຈັດຕັ້ງປະຕິບັດແຜນການຮ່ວມມືໃນໄລຍະຜ່ານມາ ແລະ ທິດທາງແຜນການຮ່ວມມືໃນປີ 2025 ລະຫວ່າງສອງຝ່າຍ. ຫຼັງຈາກນັ້ນ, ຄະນະໄດ້ເດິນທາງໄປຢ້ຽມຢາມ ແລະ ຮ່ວມປະຊຸມປຶກສາຫາລື ກັບ ບໍລິສັດ VNPT-CA ຊຶ່ງເປັນບໍລິສັດຜູ້ໃຫ້ບໍລິການວຽກງານຮັບຮອງເອເລັກໂຕຣນິກ ລະດັບແຖວໜ້າຂອງ ສສ ຫວຽດນາມ ເພື່ອປຶກສາຫາລື ແຜນການຮ່ວມມືໃນການພັດທະນານຳໃຊ້ໃບຮັບຮອງເອເລັກໂຕຣນິກ ເຂົ້າໃນບັນດາລະບົບທາງບໍລິສັດ VNPT-CA ກະກຽມພັດທະນາໃຫ້ ສປປ ລາວ.

ຈາກນັ້ນ, ຄະນະ ກໍໄດ້ເຂົ້າຮ່ວມເປັນຜູ້ສັງເກດການ ໃນກອງປະຊຸມປະຈຳປີ ຂອງ ສະມາຄົມໂຄງລ່າງພື້ນຖານຄວາມປອດໄພສາທາລະນະອາຊີ (Asia Public Key Infrastructure Consortium​ : APKIC), ກອງປະຊຸມດັ່ງກ່າວ ແມ່ນຈັດຂຶ້ນທີ່ ເມືອງ ຮ່າລອງ, ສສ ຫວຽດນາມ ເພື່ອລາຍງານຄວາມຄືບໜ້າການຄົ້ນຄວ້າສ້າງມາດຕະຖານທັງໃນດ້ານນິຕິກຳ ແລະ ເຕັກນິກ ຂອງບັນດາປະເທດທີ່ເຂົ້າຮ່ວມ, ໃຫ້ຂໍ້ມູນສະພາບການໃຫ້ບໍລິການ ຂອງແຕ່ລະປະເທດທີ່ປະສົບຜົນສຳເລັດ ໃນການໃຫ້ບໍລິການໃບຮັບຮອງເອເລັກໂຕຣນິກ ແລະ ແນວໂນ້ມ ການນຳໃຊ້ໃບຮັບຮອງເອເລັກໂຕຣນິກໃນລະບົບດິຈິຕອນໃນຕໍ່ໜ້າ.

ຂ່າວ: ສູນອິນເຕີເນັດ ແຫ່ງຊາດ