ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ສຕສ), ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ 07 ຕຸລາ ຄົບຮອບ 30 ປີ ຂຶ້ນໃນຕອນເຊົ້າຂອງວັນທີ 29 ຕຸລາ 2024, ທີ່ຫ້ອງປະຊຸມໃຫຍ່ ຊັ້ນ 05 ຂອງ ສູນເຕັກໂນໂລຊີການສື່ສານຂໍ້ມູນຂ່າວສານ. ໃຫ້ກຽດເປັນປະທານຂອງ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຫົວໜ້າສະຖາບັນ, ຫົວໜ້າຫ້ອງການ, ກົມ/ທຽບເທົ່າ ພາຍໃນ ກຕສ, ມີບັນດາຄູ-ອາຈານ ພາຍໃນ ສຕສ, ບັນດາບໍລິສັດໂທລະຄົມ ແລະ ນັກສຶກສາ ຈໍານວນ 100 ກວ່າທ່ານເຂົ້າຮ່ວມ. 

ກ່ອນເລີ່ມພິທີ, ນັກສຶກສາພາຍໃນສະຖາບັນ ໄດ້ສະແດງສິລະປະເພື່ອອວຍພອນໃຫ້ແກ່ຄູ-ອາຈານ ແລະ ແຂກທີ່ເຂົ້າຮ່ວມ ດ້ວຍບົດເພງຮ້ອງ ແລະ ການຟ້ອນເປັນໝູ່ຄະນະ ອັນເຮັດໃຫ້ບັນຍາກາດພາຍໃນພິທີເຕັມໄປດ້ວຍບັນຍາກາດຟົດຟື້ນມ່ວນຊື່ນ. ໃນວາລະພິທີ, ທ່ານ ປອ. ປະດັບໄຊ ໄຊຍະໂຄດ, ຫົວໜ້າ ສຕສ ກໍໄດ້ຂຶ້ນກ່າວເປີດພິທີ ແລະ ສະເໜີຈຸດປະສົງ ຄວາມສໍາຄັນຂອງການສະເຫຼີມສະຫຼອງວັນຄູແຫ່ງຊາດ 07 ຕຸລາ ໃນທຸກໆປີ ແມ່ນສະແດງອອກເຖິງການຈາລຶກບຸນຄຸນຂອງຄູ-ອາຈານ ຜູ້ໃຫ້ກໍາເນີດຄວາມຮູ້, ຄວາມສາມາດ ແລະ ທັກສະ ແກ່ລູກຫຼານຂອງພວກເຮົາໃຫ້ຄົງໄວ້ໃນຄວາມຮູ້ສຶກ ແລະ ຈິດໃຈຂອງພວກເຮົາຕະຫຼອດໄປ. ຊຶ່ງບົດບາດອັນສໍາຄັນຂອງຄູ-ອາຈານ ແມ່ນມີໜ້າທີ່ປຸກສ້າງຈິດສໍານຶກອັນດີງາມ, ສ້າງຄວາມຮູ້ທີ່ເປັນລັກສະນະວິທະຍາສາດ, ລັກສະນະຊາດ, ລັກສະນະມະຫາຊົນໃຫ້ແກ່ພົນລະເມືອງລາວທຸກເຜົ່າ, ທຸກຊັ້ນຄົນ ໃນວົງຄະນະຍາດແຫ່ງຊາດລາວ ໃຫ້ກາຍເປັນກ້ອນກໍາລັງ ດ້ານສະຕິປັນຍາ ແລະ ເຄື່ອງມືໃນການຂັບເຄື່ອນບັນດາກົນໄກການພັດທະນາ ແລະ ສ້າງສາປະເທດຊາດຢ່າງເຂັ້ມແຮງຮອບດ້ານ. ທ່ານກ່າວວ່າ: “ວັນຄູແຫ່ງຊາດ” ເປັນວັນໜຶ່ງທີ່ສໍາຄັນໃນປະຫວັດສາດຂອງຊາດລາວເຮົາ ເພາະວ່າ “ຄູ” ບໍ່ພຽງແຕ່ໄດ້ປະກອບສ່ວນເຂົ້າໃນວຽກງານສຶກສາເທົ່ານັ້ນ, ແຕ່ຫາກຍັງໄດ້ປະກອບສ່ວນຢ່າງຕັ້ງໜ້າທີ່ສຸດເຂົ້າໃນພາລະກິດແຫ່ງການຕໍ່ສູ້ເພື່ອຄວາມເປັນເອກະລາດ ແລະ ຄວາມວັດທະນະຖາວອນຂອງປະເທດຊາດ.

ໃນພິທີດັ່ງກ່າວ ຍັງໄດ້ຮັບຊົມວີດີໂອປະຫວັດການເປັນມາຂອງ ສຕສ, ປະຫວັດນາຍຄູຄຳ ແລະ ນ້ອງນັກສຶກສາ ພາຍໃນ ສຕສ ກໍໄດ້ຂຶ້ນອວຍພອນເນື່ອງໃນໂອກາດວັນຄູແຫ່ງຊາດ ຕໍ່ຄູ-ອາຈານ ພາຍໃນ ສຕສ. ພ້ອມນັ້ນ, ກໍໄດ້ມີພິທີ່ມອບ-ຮັບໃບຍ້ອງຍໍຂັ້ນກະຊວງ ແລະ ຂັ້ນສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໃຫ້ແກ່ຄູ-ອາຈານ.

ຕອນທ້າຍຂອງພິທີ ຍັງເປັນກຽດຮັບຟັງຄໍາເຫັນໂອ້ລົມຂອງທ່ານປະທານ ຊຶ່ງໄດ້ກ່າວບາງຕອນວ່າ: ເນື່ອງໃນໂອກາດ ພິທີສະເຫຼີມສະຫຼອງວັນຄູແຫ່ງຊາດ ທີ່ໜູນວຽນມາຄົບຮອບ 30 ປີ ວັນທີ 7 ຕຸລາ ເປັນວັນທີ່ມີຄວາມໝາຍຄວາມສໍາຄັນປະຫວັດສາດແຫ່ງການຈາລຶກບຸນຄຸນຕໍ່ຄູ-ອາຈານ ຜູ້ທີ່ປຽບເໝືອນດັ່ງແສງທຽນໃຫ້ຄວາມສະຫວ່າງດ້ານຄວາມຮູ້, ພໍ່ພິມແມ່ພິມຂອງຊາດ ແລະ ເປັນບຸກຄົນສໍາຄັນຂອງພັກ ຜູ້ມີຈິດໃຈແຫ່ງຄວາມເປັນຜູ້ໃຫ້, ເສຍສະຫຼະ, ມີຈັນຍາບັນ ແລະ ກໍ່ສ້າງບຸກຄົນແຕ່ລະຮຸ່ນຄົນໃຫ້ເຕີບໃຫຍ່ທາງດ້ານສະຕິປັນຍາ, ຄວາມຮູ້, ຄວາມສາມາດ ແລະ ຄວາມສົມບູນທາງດ້ານຈິດໃຈ ໃຫ້ກາຍເປັນບຸກຄະລະກອນທີ່ຢູ່ໃນທ່າກຽມພ້ອມປະກອບສ່ວນເຂົ້າໃນການພັດທະນາ ແລະ ສ້າງສາປະເທດລາວ ໃຫ້ມີຄວາມຈະເລີນກ້າວໜ້າ ແລະ ພັດທະນາຢ່າງຕໍ່ເນື່ອງ ທຽບທັນກັບການພັດທະນາຂອງໂລກ ກໍຄື ສະພາບການຫັນເປັນທັນສະໄໝ ໂດຍນໍາໃຊ້ເຕັກໂນໂລຊີອັນຈໍາເປັນໃນຂັບເຄື່ອນເສດຖະກິດ-ສັງຄົມ ໃນຍຸກແຫ່ງການຫັນປ່ຽນສູ່ດິຈິຕອນ ເວົ້າລວມ, ເວົ້າສະເພາະ ການສະເຫຼີມສະຫຼອງວັນສໍາຄັນຄັ້ງນີ້ ເປັນການຈາລຶກເຖິງບຸນຄູ-ອາຈານຜູ້ປະເສີດ ທີ່ໄດ້ສ້າງລູກຫຼານຂອງພວກເຮົາໃຫ້ເຕີບໃຫຍ່ເປັນຄົນທີ່ດີ, ມີຄວາມຮູ້ ແລະ ຄວາມສາມາດຮອບດ້ານ ສອດຄ່ອງກັບແນວທາງຂອງພັກລັດ.

ຂ່າວ: ສຕສ