ໃນວັນທີ 28 ຕຸລາ 2024 ທີ່ໂຮງແຮມ ຄລາວພາຊາ, ໄດ້ມີພິທີລົງນາມສັນຍາຮ່ວມມື ລະຫວ່າງ ສະຖາບັນເຕັກໂນໂລຊີ ການສື່ສານຂໍ້ມູນຂ່າວສານ (ສຕສ ຫຼື IICT), ກະຊວງເຕັກໂນໂລຊີ ແລະ ການສື່ສານ (ກຕສ) ແລະ ບໍລິສັດ ຮຸ່ງອາລຸນ ເທັກໂນໂລຊີ ຈຳກັດ (HAL). ໂດຍການເຂົ້າຮ່ວມຂອງ  ທ່ານ ແກ້ວວີສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ສີສະຫວັນ ມາຢົງເຊິນ, ປະທານກຸ່ມບໍລິສັດ ຮຸ່ງອາລຸນ ເທັກໂນໂລຊີ ຈຳກັດ, ມີບັນດາທ່ານຫົວໜ້າຫ້ອງການ, ກົມ, ສູນ, ສະຖາບັນ, ອົງການ ພາຍໃນ ກຕສ ແລະ ບັນດາແຂກທີ່ຖືກເຊີນເຂົ້າຮ່ວມຫຼາຍກວ່າ 80 ທ່ານ.

ໃນພິທີຄັ້ງນີ້, ທ່ານ ປອ. ປະດັບໄຊ ໄຊຍະໂຄດ, ຫົວໜ້າ  ສຕສ ໄດ້ກ່າວວ່າ:  ການຮ່ວມມືໃນຄັ້ງນີ້ ກໍເພື່ອພັດທະນາຊັບພະຍາກອນດ້ານໄອຊີທີ ໃຫ້ກັບພາກລັດ ແລະ ເອກະຊົນ ເປີດກວ້າງໃຫ້ກັບພະນັກງານ, ນັກສຶກສາ ແລະ ບຸກຄົນທົ່ວໄປ ທີ່ມີຄວາມສົນໃຈຢາກຍົກລະດັບຄວາມຮູ້ດ້ານໄອຊີທີ ປະກອບສ່ວນຊຸກຍູ້ແນວທາງການຫັນເປັນດິຈິຕອນຂອງລັດຖະບານ ແລະ ຄວາມຮຽກຮ້ອງຕ້ອງການຂອງຕະຫຼາດແຮງງານທາງດ້ານໄອຊີທີຢູ່ ສປປ ລາວ. ຊຶ່ງໄດ້ມີຫຼັກສູດ ເພື່ອຝຶກອົບຮົມສ້າງບຸກຄະລາກອນທາງດ້ານ ໄອຊີທີ ໃນຂອບເຂດທົ່ວປະເທດ ປະກອບມີຫຼາຍຫົວຂໍ້ ເຊັ່ນ: ຝຶກອົບຮົມຫຼັກສູດການພັດທະນາເວັບໄຊ, ຫຼັກສູດການພັດທະນາແອັບໃນໂທລະສັບມືຖື, ຫຼັກສູດຄວາມປອດໄພທາງດ້ານເຕັກໂນໂລຊີ, ຫຼັກສູດການນຳໃຊ້ປັນຍາປະດິດ (AI), ຫຼັກສູດການວິເຄາະຂໍ້ມູນ, ຫຼັກສູດການບໍລິຫານໂຄງການ, ຫຼັກສູດການອອກແບບ UX & UI ແລະ ຫຼັກສູດການອອກແບບກຣາບຟິກ. 

ຮ່ວມລົງນາມໃນຄັ້ງນີ້ ໂດຍ ທ່ານ ປອ. ປະດັບໄຊ ໄຊຍະໂຄດ, ຫົວໜ້າ  ສຕສ ແລະ ທ່ານ ພຸດ ສີສຸພັນ, ອໍານວຍການ ບໍລິສັດ ຮຸ່ງອາລຸນ ເທັກໂນໂລຊີ ຈຳກັດ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ແກ້ວວິສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ສີສະຫວັນ ມາຢົງເຊິນ, ປະທານກຸ່ມບໍລິສັດ ຮຸ່ງອາລຸນ ເທັກໂນໂລຊີ ຈຳກັດ.

ໃນໂອກາດດຽວກັນນີ້ ກໍໄດ້ມີພິທີເປີດຕົວ ບໍລິສັດ ຮຸ່ງອາລຸນ ເທັກໂນໂລຢີ ຈຳກັດ ເຊິ່ງໃນໄລຍະ 04 ປີຜ່ານມາ ບໍລິສັດໄດ້ມີການເຕີບໃຫຍ່ ຂະຫຍາຍຕົວ ແລະ ການພັດທະນາ ມີວິໄສທັດ ແລະ ຄວາມມຸ້ງຫວັງທີ່ໄດ້ສ້າງນະວັດຕະກຳໃໝ່ໆອອກສູ່ສັງຄົມ ເຊິ່ງການເປີດຕົວບໍລິສັດໃນຄັ້ງນີ້ ບໍ່ພຽງແຕ່ເປັນການສ້າງໂອກາດໃຫ້ກັບບໍລິສັດ ແຕ່ຍັງລວມໄປເຖິງການໄດ້ເປັນສ່ວນໜຶ່ງໃນສ່ວນຮ່ວມໂຄງການພັດທະນາຊັບພະຍາກອນມະນຸດດ້ານໄອຊີທີ ຮ່ວມກັບ ສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ ເພື່ອເປັນອີກແຮງພັກດັນໜຶ່ງໃຫ້ກັບວິໄສທັດໃນການພັດທະນາຂອງຊາດ.

ຕອນທ້າຍຂອງພິທີ, ທ່ານ ແກ້ວວິສຸກ ໂສລະພົມ ໄດ້ກ່າວມີຄໍາເຫັນຕໍ່ພິທີເຊັນສັນຍາຮ່ວມມື ແລະ ເປີດຕົວ ບໍລິສັດ ຮຸ່ງອາລຸນ ເທັກໂນໂລຢີ ຈຳກັດ ຊຶ່ງເປັນງານທີ່ມີຄວາມໝາຍຄວາມສໍາຄັນຫຼາຍ ໃນຂະແໜງການເຕັກໂນໂລຊີ ທີ່ນໍາໃຊ້ເຂົ້າໃນທຸກວຽກງານ ເພື່ອຊຸກຍູ້ການພັດທະນາກົນໄກທາງດ້ານເສດຖະກິດ ໃນຍຸກດິຈິຕອນ ຕາມແຜນຍຸດທະສາດແຫ່ງຊາດ ກໍຄືແຜນພັດທະນາເສດຖະກິດ-ສັງຄົມ ໃນໄລຍະຫັນປ່ຽນເປັນດິຈິຕອນ. ພັດທະນາບຸກຄະລາກອນ ແລະ ການບໍລິການ ໂດຍນໍາໃຊ້ເຄື່ອງມືທັນສະໄໝ ເພື່ອການເຂົ້າເຖິງຜູ້ນໍາໃຊ້, ຜູ້ໃຫ້ບໍລິການ, ນັກລົງທຶນ ແລະ ການຮ່ວມມືໃນຫຼາຍຮູບແບບ ທີ່ສາມາດຂະຫຍາຍຄວາມເຂັ້ມແຂງໄປພ້ອມກັນ. ສະນັ້ນ, ການຮ່ວມມືຄັ້ງນີ້, ຈຶ່ງມີຄວາມສໍາຄັນຫຼາຍ ຖືເປັນໜຶ່ງໃນອຸດສະຫະກຳຫຼັກຂອງການພັດທະນາປະເທດຊາດ ເພື່ອໃຫ້ທັນກັບແນວໂນ້ມຂອງສັງຄົມໂລກ ຊຶ່ງລັດຖະບານຍິ່ງໃຫ້ຄວາມສຳຄັນເຖິງການນຳເອົາເຕັກໂນໂລຊີດິຈິຕອນ ເຂົ້າມານຳໃຊ້ໃນຫຼາຍໆວຽກງານ ໂດຍສະເພາະວຽກງານການພັດທະນາທັກສະດ້ານເຕັກໂນໂລຊີດີຈິຕອນໃຫ້ກັບຊັບພະຍາກອນມະນຸດຂອງຊາດ.