ສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ (ກຕສ) ຮ່ວມກັບ ບໍລິສັດ ວັນມີຣາໂຄ ບໍລິການສິນຄ້າ ດິຈິຕອນ ໄອຊີທີ ແບບມີສ່ວນຮ່ວມ ໄດ້ຈັດຝຶກອົບຮົມ ໃນຫົວຂໍ້: ສ້າງຄວາມເຂັ້ມແຂງທາງດ້ານທັກສະການນຳໃຊ້ Generative AI ຂັ້ນພື້ນຖານໃຫ້ແກ່ພະນັກງານພາກລັດ ຂຶ້ນໃນວັນທີ 31 ຕຸລາ 2024 ຜ່ານມາ, ທີ່ ກະຊວງເຕັກໂນໂລຊີ ແລະ ການສື່ສານ (ເຂດດອນຕິ້ວ), ໂດຍການເປັນປະທານກ່າວເປິດຊຸດຝຶກອົບຮົມ ຂອງ ທ່ານ ນາງ ເກສອນ ສຸລິວົງ, ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ຊຶ່ງມີຄູຝຶກ ແລະ ຜູ້ເຂົ້າຮ່ວມຝຶກອົບຮົມພາຍໃນສູນສົ່ງເສີມ ແລະ ຖ່າຍທອດເຕັກໂນໂລຊີ ຈໍານວນ 25 ທ່ານ.

ໃນໂອກາດກ່າວເປີດພິທີ, ທ່ານ ນາງ ເກສອນ ສຸລິວົງ, ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ ໄດ້ກ່າວເຖິງການນໍາໃຊ້ລະບົບປັນຍາປະດິດ (Generative AI ຫຼື Artificial Intelligence) ທີ່ຊ່ວຍເພີ່ມປະສິດທິພາບການເຮັດວຽກໃຫ້ແກ່ພະນັກງານພາຍໃນສູນ ໃຫ້ມີຄວາມເຂົ້າໃຈ ແລະ ສາມາດນໍາໃຊ້ເຕັກໂນໂລຊີປັນຍາປະດິດ (AI) ໄດ້ຢ່າງມີປະສິດທິພາບ, ຊຶ່ງສາມາດນຳໃຊ້ເຂົ້າໃນການສ້າງສັນງານຕ່າງໆບໍ່ວ່າຈະເປັນການສ້າງຂໍ້ຄວາມ, ບົດລາຍງານ, ຮູບພາບ, ສຽງ, ວີດີໂອ ຫຼື ການຂຽນໂຄງການຜ່ານ AI ເພື່ອເປັນການເພີ່ມປະສິດຕິພາບ ແລະ ເປັນປະໂຫຍດຢ່າງສູງສຸດໃຫ້ແກ່ພະນັກງານພາຍໃນສູນ ເພື່ອນໍາເອົາຄວາມຮູ້ດັ່ງກ່າວໝູນໃຊ້ເຂົ້າໃນວຽກງານຕົວຈິງທີ່ຕົນຮັບຜິດຊອບ. ການຝຶກອົບຮົມຄັ້ງນີ້ ຜູ້ເຂົ້າຮ່ວມໄດ້ຮຽນຮູ້ທັງພາກທິດສະດີ ແລະ ທົດລອງຕົວຈິງ ພ້ອມທັງໄດ້ເປີດໂອກາດໃຫ້ມີການຖາມ-ຕອບ, ເເລກປ່ຽນຄວາມຮູ້ ເຊິ່ງກັນ ແລະ ກັນ ຊຶ່ງເຕັມໄປດ້ວຍບັນຍາກາດຟົດຟື້ນ.

ບົດຂ່າວ: ສູນສົ່ງເສີມ ແລະ ຖ່າຍທອດເຕັກໂນໂລຊີ