ໃນຕອນບ່າຍຂອງວັນທີ 29 ຕຸລາ 2024 ນີ້, ທີ່ຫ້ອງປະຊຸມ ຂອງ ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ (ກຕສ), ໄດ້ມີພິທີເລື່ອນສະມາຊິກພັກສໍາຮອງ ຂຶ້ນເປັນສະມາຊິກພັກສົມບູນຂອງພັກປະຊາຊົນປະຕິວັດລາວ ຂອງ 04 ໜ່ວຍພັກພາຍໃນ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ ປະກອບມີ: ໜ່ວຍພັກສູນອິນເຕີເນັດແຫ່ງຊາດ, ໜ່ວຍພັກສູນບໍລິຫານລັດດິຈິຕອນ, ໜ່ວຍພັກກົມໄປສະນີ ແລະ ໜ່ວຍພັກ ກົມຄື້ນຄວາມຖີ່ວິທະຍຸສື່ສານ, ໃຫ້ກຽດເປັນປະທານໂດຍ ສະຫາຍ ແກ້ວວິສຸກ ໂສລະພົມ, ຄະນະປະຈໍາພັກກະຊວງ, ຮອງລັດຖະມົນຕີ ກຕສ, ມີບັນດາຕາງໜ້າສະຫາຍເລຂາ, ຮອງເລຂາ ຂອງໜ່ວຍພັກກົມ/ທຽບເທົ່າ ພາຍໃນ ກຕສ, ຕາງໜ້າ 03 ອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກຂອງ 04 ໜ່ວຍພັກ ເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວ, ບັນດາສະຫາຍເລຂາໜ່ວຍພັກ, ຮອງເລຂາໜ່ວຍພັກ ທັງ 04 ໜ່ວຍພັກ ໄດ້ພັດປ່ຽນກັນຂຶ້ນຜ່ານມະຕິຕົກລົງ ວ່າດ້ວຍການອະນຸມັດເລື່ອນສະມາຊິກພັກສໍາຮອງ ຂຶ້ນເປັນສະມາຊິກພັກສົມບູນ ຈໍານວນ 07 ສະຫາຍ, ຍິງ 02 ສະຫາຍ, ໃນນັ້ນປະກອບມີ ໜ່ວຍພັກສູນອິນເຕີເນັດແຫ່ງຊາດ ຈໍານວນ 01 ສະຫາຍ, ໜ່ວຍພັກສູນບໍລິຫານລັດດິຈິຕອນ ຈໍານວນ 01 ສະຫາຍ, ໜ່ວຍພັກກົມໄປສະນີ ຈໍານວນ 01 ສະຫາຍ, ໜ່ວຍພັກກົມຄື້ນຄວາມຖີ່ວິທະຍຸສື່ສານ ຈຳນວນ 04 ສະຫາຍ, ຍິງ 02 ສະຫາຍ.

ໂອກາດດຽວກັນນີ້, ສະຫາຍປະທານ ກໍໄດ້ໃຫ້ກຽດມອບມະຕິຕົກລົງ ພ້ອມທັງໄດ້ໂອ້ລົມ ແລະ ກ່າວສະແດງຄວາມຍິນດີ, ຍ້ອງຍໍຊົມເຊີຍຕໍ່ສະມາຊິກພັກສົມບູນໃໝ່.  ພ້ອມນີ້, ສະຫາຍ ຍັງໄດ້ເນັ້ນໜັກໃຫ້ບັນດາສະມາຊິກພັກສົມບູນໃໝ່ ເອົາໃຈໃສ່ຝຶກຝົນຫຼໍ່ຫຼອມຕົນເອງທາງດ້ານຄວາມຮູ້, ຄວາມສາມາດ ແລະ ສືບຕໍ່ຈັດຕັ້ງປະຕິບັດບັນດາກົດລະບຽບຂອງພັກປະຊາຊົນປະຕິວັດລາວ ວາງອອກຢ່າງເຂັ້ມງວດ, ເປັນແບບຢ່າງນຳໜ້າໃນທຸກຂະບວນການ, ຕັ້ງໜ້າຝຶກຝົນຫຼໍ່ຫຼ້ອມຕົນເອງໃຫ້ກາຍເປັນສະມາຊິກພັກທີ່ມີຄຸນທາດການເມືອງ, ມີຄຸນສົມບັດສິນທໍາປະຕິວັດທີ່ໜັກແໜ້ນ, ຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະ, ທິດສະດີການເມືອງ ເພື່ອສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ແລະ ພ້ອມດຽວກັນນີ້ ສະມາຊິກພັກສົມບູນໃໝ່ກໍໄດ້ຂື້ນຮັບຄຳໂອວາດ ແລະ ກ່າວປະຕິຍານຕົນ.