ມະຫາວິທະຍາໄລແຫ່ງຊາດ, ຄະນະວິສະວະກໍາສາດ (ຄວສ) ຮ່ວມກັບ ອົງການ JICA ສປປ ລາວ ແລະ ສະຖາບັນວິທະຍາສາດໂຕກຽວ ໄດ້ຈັດກອງປະຊຸມລະດັບສາກົນ ກ່ຽວກັບວິທະຍາສາດທໍາມະຊາດ ແລະ ນະວັດຕະກໍາ ເພື່ອການພັດທະນາແບບຍືນຍົງ ໃນ ສປປ ລາວ, ພາກພື້ນ ແລະ ສາກົນ ປະຈໍາປີ 2024 (International Conference on Natural Science, Technology and Innovation for Sustainable Development in Lao PDR and Beyond (ICNSE 2024)). ກອງປະຊຸມດັ່ງກ່າວໄດ້ຈັດຂຶ້ນໃນຕອນບ່າຍຂອງວັນທີ 05 ພະຈິກ 2024, ທີ່ຫ້ອງປະຊຸມຕຶກພາກວິຊາເອເລັກໂຕຣນິກ ແລະ ໂທລະຄົມ, ຄະນະວິສະກໍາສາດ, ໂດຍໃຫ້ກຽດເປັນປະທານຂອງ ທ່ານ ຮສ.ປອ. ເດຊານຸລາດ ແສນດວງເດດ, ຮັກສາການອະທິການບໍດີ ມະຫາວິທະຍາໄລແຫ່ງຊາດ, ຊຶ່ງມີຜູ້ເຂົ້າຮ່ວມຈາກບັນດາຄະນະຄູ-ອາຈານ, ພາກວິຊາ ຈາກມະຫາໄລແຫ່ງຊາດ, ພາກລັດ, ເອກະຊົນ, ນັກຄົ້ນຄວ້າ, ນັກສຶກສາ ແລະ ແຂກຮັບເຊີນຈາກ ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ ເຂົ້າຮ່ວມຈໍານວນຫຼາຍກວ່າ 150 ທ່ານ.

ກອງປະຊຸມສໍາມະນາໃນຄັ້ງນີ້ ແມ່ນເພື່ອເຜີຍແຜ່ຜົນງານບົດຄົ້ນຄວ້າວິໄຈ, ພົບປະບັນດານັກຄົ້ນຄວ້າວິທະຍາສາດ, ຜູ້ກໍານົດນະໂຍບາຍໃນການຫັນເປັນດິຈິຕອນ ແລະ ຜູ້ຊ່ຽວຊານໃນຂະແໜງອຸດສາຫະກໍາ ເພື່ອປຶກສາຫາລື ແລະ ແບ່ງປັນຂໍ້ມູນຢ່າງເລິກເຊິ່ງ ກ່ຽວກັບບົດບາດສໍາຄັນຂອງວິທະຍາສາດເຕັກໂນໂລຊີ ໃນການຂັບເຄື່ອນການຫັນເປັນດິຈິຕອນ ທີ່ສອດຄ່ອງກັບການພັດທະນາແບບຍືນຍົງທັງໃນ ສປປ ລາວ ແລະ ສະພາບໃນທົ່ວໂລກ. ຊຶ່ງໃນງານຄັ້ງນີ້ ຕາງໜ້າຈາກ ກະຊວງເຕັກໂນໂລຊີ ແລະ ການສື່ສານ ໂດຍ ທ່ານ ນາງ ວັນນະພາ ພົມມະທັນສີ, ຮອງຫົວໜ້າສູນບໍລິຫານລັດດິຈິຕອນ ໄດ້ຮັບເຊີນເປັນນັກວິທະຍາກອນເພື່ອປະກອບສ່ວນຂຶ້ນນໍາສະເໜີສະພາບລວມ ແຜນຍຸດທະສາດ ແລະ ແຜນການໃນອະນາຄົດໃນການຫັນເປັນດິຈິຕອນ ຂອງ ສປປ ລາວ, ແນວໂນ້ມການພັດທະນາ ແລະ ການນໍາໃຊ້ເຕັກໂນໂລຊີ ວິສະວະກໍາ ແລະ ການຄົ້ນຄວ້າວິໄຈ ໃນການພັດທະນາບັນດາລະບົບ ເພື່ອການຄຸ້ມຄອງທີ່ມີປະສິດທິພາບ, ປະສິດທິຜົນສູງສຸດ ແລະ ສາມາດສົ່ງມອບຄວາມຮູ້ໃຫ້ແກ່ຜູ້ເຂົ້າຮ່ວມງານ ໂດຍສະເພາະແມ່ນຄູ-ອາຈານ ແລະ ນັກສຶກສາ ຄວສ ເພື່ອເປັນແນວທາງໃນການຄົ້ນຄວ້າ ແລະ ການກະກຽມໃນການນໍາໃຊ້ເຕັກໂນໂລຊີດິຈິຕອນ ໃນການແກ້ໄຂບັນຫາໃນໂລກປັດຈຸບັນ.

ທ່ານ ນາງ ວັນນະພາ ພົມມະທັນສີ ຮອງຫົວໜ້າສູນບໍລິຫານລັດດິຈິຕອນ ຍັງໄດ້ຂຶ້ນພົບປະໃນເວທີເສວະນາ, ປຶກສາຫາລື ແລະ ພ້ອມທັງໃຫ້ຄໍາເຫັນກ່ຽວກັບຄວາມສໍາຄັນຂອງສະຖາບັນການສຶກສາຄົ້ນຄວ້າທີ່ເປັນທ່າແຮງຫຼັກໃນການສ້າງບຸກຄະລາກອນ ແລະ ວຽກງານວິທະຍາສາດ (Science), ເຕັກໂນໂລຊີ (Technology), ວິສະວະກໍາສາດ (Engineering) ແລະ ຄະນິດສາດ (Mathematics) ຫຼື STEM ແມ່ນມີຄວາມຈໍາເປັນຢ່າງຍິ່ງທີ່ເປັນປັດໄຈພື້ນຖານໃນການສ້າງສາ ແລະ ພັດທະນາໃນຍຸກດິຈິຕອນ. ພ້ອມກັນນັ້ນ, ຍັງໄດ້ແລກປ່ຽນ ແລະ ສະເໜີທິດທາງວິທີການຮ່ວມມືທັງພາກລັດ, ເອກະຊົນ ແລະ ສະຖາບັນການສຶກສາໃຫ້ມີຄວາມກົມກຽວ, ສອດຄ່ອງ ແລະ ກ້າວໄປພ້ອມໆກັນໃນການຫັນເປັນດິຈິຕອນ.