ໃນຕອນເຊົ້າຂອງວັນທີ 08 ພະຈິກ 2024, ທີ່ຫ້ອງຮັບແຂກຂອງ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Zhijian Dai, ປະທານບໍລິສັດ Tianyu Hangtong ສປ ຈີນ ພ້ອມດ້ວຍຄະນະ. 

ໂອກາດນີ້, ທ່ານ Zhijian Dai ໄດ້ກ່າວສະແດງຄວາມຂອບໃຈຕໍ່ທ່ານລັດຖະມົນຕີ ທີ່ໄດ້ເສຍສະຫຼະເວລາອັນມີຄ່າຕ້ອນຮັບຢ່າງອົບອຸ່ນ. ຊຶ່ງການເຂົ້າຢ້ຽມຂໍ່ານັບຄັ້ງນີ້, ກໍເພື່ອຄົ້ນຄວ້າ ແລະ ປຶກສາຫາລືການຮ່ວມມືກັນທາງດ້ານການພັດທະນາ ເຮືອບິນບໍ່ມີຄົນຂັບ (ໂດຣນ) ເປັນຕົ້ນແມ່ນ ດ້ານການພັດທະນາບຸກຄະລາກອນໃຫ້ຮຽນຮູ້ວິທີການນໍາໃຊ້, ວິທີການປະກອບ ແລະ ອື່ນໆ ເພື່ອອໍານວຍຄວາມສະດວກໃນການນໍາໃຊ້ໂດຣນ ເຂົ້າໃນວຽກງານຊີວິດປະຈໍາວັນ ເຊັ່ນ: ວຽກງານກະສິກໍາ, ການຂົນສົ່ງສິນຄ້າ ແລະ ວຽກງານທີ່ກ່ຽວຂ້ອງ.

ໃນໂອກາດດັ່ງກ່າວ, ທ່ານ ບັນດິດ ສຈ. ບໍ່ວຽງຄໍາ ວົງດາລາ ໄດ້ກ່າວສະແດງຄວາມຍິນດີຕ້ອນຮັບ ທ່ານ Zhijian Dai ພ້ອມດ້ວຍຄະນະ ທີ່ໄດ້ມາຢ້ຽມຂ່ຳນັບໃນຄັ້ງນີ້. ພ້ອມທັງສະແດງຄວາມຂອບໃຈຕໍ່ການລາຍງານຂອງ ທ່ານ Zhijian Dai ແລະ  ເຫັນດີໃຫ້ການສະໜັບສະໜູນການຮ່ວມໃນຂົງເຂດວຽກງານການນໍາໃຊ້ ໂດຣນ ຊຶ່ງເປັນວຽກງານທີ່ທັນສະໄໝ ແລະ ສໍາຄັນ. ພ້ອມນັ້ນ, ກໍຈະຮ່ວມມືສົ່ງເສີມບັນດາທ່າແຮງຕ່າງໆ ແລະ ປະສານກັບພາກສ່ວນທີ່ກ່ຽວຂ້ອງເພື່ອດໍາເນີນການຕາມຂັ້ນຕອນ ເພື່ອເຮັດໃຫ້ວຽກງານດັ່ງກ່າວໄດ້ສໍາເລັດຕາມຄາດໝາຍ ແລະ ໃຫ້ເກີດຜົນປະໂຫຍດສູງສຸດ.

ພາບ ແລະ ຂ່າວ: ເລັກເຊ່ຍ ສຸດທິວົງ