ໃນຕອນບ່າຍຂອງວັນທີ 13 ພະຈິກ 2024, ທີ່ຫ້ອງຮັບແຂກ ຂອງ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ວາລາດີເມຍ ປັນເຊີນີ, ຜູ້ບໍລິຫານ ບໍລິສັດ ອິນນີຊາຕິບລົງທຶນ (Initiative investment company) ຈາກຣັດເຊຍ.

ໂອກາດນີ້, ທ່ານ ວາລາດີເມຍ ປັນເຊີນີ ໄດ້ກ່າວສະແດງຄວາມຂອບໃຈຕໍ່ທ່ານລັດຖະມົນຕີ ທີ່ໄດ້ເສຍສະຫຼະເວລາອັນມີຄ່າຕ້ອນຮັບຢ່າງອົບອຸ່ນ ພ້ອມທັງແຈ້ງຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ເພື່ອລາຍງານ ແລະ ຂໍທິດຊີ້ນໍາໃນການສະເໜີຄວາມເປັນໄປໄດ້ໃນການຮ່ວມມືທາງດ້ານເຕັກໂນໂລຊີ ເປັນຕົ້ນແມ່ນ ການສ້າງບັນດາໂປຼແກຼມລະບົບຄອມພິວເຕີ, ລະບົບການບໍລິຫານຄຸ້ມຄອງ ທັງພາກລັດ ແລະ ເອກະຊົນ ຊຶ່ງທາງບໍລິສັດແມ່ນມີປະສົບການສູງໃນການສ້າງລະບົບດັ່ງກ່າວ. ພ້ອມນັ້ນ, ທ່ານຍັງໄດ້ເຊືື້ອເຊີນ ທ່ານ ລັດຖະມົນຕີ ໄປຢ້ຽມຢາມບັນດາບໍລິສັດທີ່ມີຊື່ສຽງທີ່ປະເທດຣັດເຊຍ ເພື່ອເພີ່ມທະວີການຂະຫຍາຍການຮ່ວມມືລະຫວ່າງ ສອງປະເທດ.

ພ້ອມດຽວກັນ, ທ່ານ ລັດຖະມົນຕີ ກໍໄດ້ກ່າວສະແດງຄວາມຕ້ອນຮັບ ແລະ ຂອບໃຈຕໍ່ທ່ານ ຜູ້ບໍລິຫານ ບໍລິສັດ ອິນນີຊາຕິບລົງທຶນ ພ້ອມທັງແຈ້ງໃຫ້ຊາບ ການພົວພັນລະຫວ່າງສອງປະເທດ ລາວ-ຣັດເຊຍ ນັບມື້ນັບມີການຂະຍຫາຍຕົວຂຶ້ນເລື້ອຍໆ, ໃນຂົງເຂດວຽກງານເຕັກໂນໂລຊີ ແລະ ການສື່ສານ ກໍມີຄວາມຍິນດີຮ່ວມມືກັບ ບໍລິສັດຂອງ ຣັດເຊຍ ເພື່ອເພີ່ມທະວີການຮ່ວມມືໃນຂົງເຂດວຽກງານດັ່ງກ່າວ. ທ່ານກ່າວວ່າ: ກະຊວງເຕັກໂນໂລຊີ ແລະ ການສື່ສານ ສປປ ລາວ ແມ່ນມີຄວາມຕັ້ງໃຈຢາກຮ່ວມມືກັບ ກະຊວງດິຈິຕອນ ແລະ ບັນດາບໍລິສັດ ຂອງ ຣັດເຊຍ, ພ້ອມທັງຮັບຮູ້ວ່າລະດັບຄວາມສາມາດຂອງຣັດເຊຍແມ່ນສູງຫຼາຍ ເປັນຕົ້ນແມ່ນ ຂົງເຂດຄວາມປອດໄພໄຊເບີ, ປັນຍາປະດິດ ແລະ ບລັອກເຊນ... ພ້ອມທັງມີຄວາມຍິນດີຊຸກຍູ້ສົ່ງເສີມບັນດາບໍລິສັດໃນ ສປປ ລາວ ມີຄວາມຮ່ວມມືກັບ ບໍລິສັດຂອງຣັດເຊຍ.

ພາບ ແລະ ຂ່າວ: ພຸດດາວອນ ພາສຸວັນ