ສູນບໍລິຫານລັດດິຈິຕອນ, ກະຊວງເຕັກໂນໂລຊີ ແລະ ການສື່ສານ (ກຕສ) ຮ່ວມກັບ ກະຊວງພາຍໃນ ແລະ ການສື່ສານ ປະເທດຍີ່ປຸ່ນ ໄດ້ຈັດກອງປະຊຸມສໍາມະນາ ແລະ ສາທິດ ການທົດລອງນໍາໃຊ້ ລະບົບຢັ້ງຢືນຕົວຕົນດິຈິຕອນ ເພື່ອເສີມຂະຫຍາຍການບໍລິການພາກລັດ ໂດຍຜ່ານການຢັ້ງຢືນຕົວຕົນດິຈິຕອນ ຂຶ້ນໃນຕອນບ່າຍຂອງວັນທີ 14 ພະຈິກ 2024, ທີ່ໂຮງແຮມລາວພລາຊາ, ນະຄອນຫຼວງວຽງຈັນ. ໃຫ້ກຽດເຂົ້າຮ່ວມ ແລະ ກ່າວເປີດພິທີໂດຍ ທ່ານ ແກ້ວວີສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຜູ້ຕາງໜ້າເຂົ້າຮ່ວມຈາກ ກະຊວງພາຍໃນ ແລະ ການສື່ສານ ປະເທດຍີ່ປຸ່ນ, ສະຖານທູດຍີ່ປຸ່ນ ປະຈຳ ສປປ ລາວ, ບໍລິສັດ Ryobi, ບໍລິສັດ NEC, ບໍລິສັດ xID ຂອງປະເທດຍີ່ປຸ່ນ, ບັນດາກົມທຽບເທົ່າ ແລະ ບັນດາກະຊວງອ້ອມຂ້າງ ຈໍານວນ 50 ທ່ານ ທັງໃນຮູບແບບເຊິ່ງໜ້າ ແລະ ອອນລາຍ.

ຈຸດປະສົງຂອງກອງປະຊຸມສຳມະນາຄັ້ງນີ້ ແມ່ນນຳສະເໜີ ແລະ ແລກປ່ຽນບົດຮຽນກ່ຽວກັບການນຳໃຊ້ລະບົບຢັ້ງຢືນຕົວຕົນດິຈິຕອນ ຂອງແຕ່ລະປະເທດ ແລະ ທິດທາງການນຳໃຊ້ຢູ່ໃນ ສປປ ລາວ. ພ້ອມກັນນັ້ນ ຍັງມີການສາທິດການທົດລອງນຳໃຊ້ການລົງທະບຽນລະບົບຢັ້ງຢືນຕົວຕົນດິຈິຕອນ ໂດຍນຳໃຊ້ເຕັກໂນໂລຊີຈຳລອງຂອງຍີ່ປຸ່ນ.

ກອງປະຊຸມດັ່ງກ່າວ, ທ່ານ ແກ້ວວິສຸກ ໂສລະພົມ ໄດ້ມີຄໍາເຫັນບາງຕອນວ່າ: ການພັດທະນາລະບົບການຢັ້ງຢືນຕົວຕົນດິຈິຕອນ ຫຼື ວ່າ Digital ID ຖືເປັນປັດໄຈສໍາຄັນທີ່ຕ້ອງໄດ້ມີການວາງແຜນ ແລະ ຈັດຕັ້ງປະຕິບັດຢ່າງຮີບດ່ວນ ເພື່ອອໍານວຍຄວາມສະດວກໃຫ້ແກ່ບັນດາບໍລິສັດ, ປະຊາຊົນ ໃນການເຂົ້າເຖິງ ແລະ ນໍາໃຊ້ການບໍລິການຕ່າງໆຂອງພາກລັດ ແລະ ຂອງພາກເອກະຊົນ ທີ່ນັບມື້ນັບມີຄວາມຕ້ອງການຫຼາຍຂຶ້ນ. ສຳລັບການຢັ້ງຢືນຕົວຕົນດິຈິຕອນ ຢູ່ໃນ ສປປ ລາວ ກໍມີໜໍ່ແໜງການນຳໃຊ້ມາດົນພໍສົມຄວນ ເຊັ່ນ: ນຳໃຊ້ບັນຊີຈົດໝາຍເອເລັກໂຕຣນິກ (e-mail) ຫຼື ສື່ສັງຄົມອອນລາຍ ເພື່ອສະໝັກນໍາໃຊ້ບໍລິການ ຫຼື ແອັບພລີເຄເຊິນຕ່າງໆຜ່ານອິນເຕີເນັດ ຫຼື ຢັ້ງຢືນຕົວຕົນ ໃນເວລາໃຊ້ແອັບຂອງທະນາຄານ ແຕ່ທັງໝົດນີ້ ແມ່ນການຢັ້ງຢືນຕົວຕົນແບບພື້ນຖານ ຫຼື ບໍ່ມີການພິສູດຂໍ້ມູນຕົວຕົນຈາກເຈົ້າໜ້າທີ່ເທື່ອ. ໃນອະນາຄົດ ການບໍລິການອອນລາຍເພີ່ມຂຶ້ນ ແນ່ນອນວ່າຈຳເປັນຕ້ອງມີການບໍລິການຢ້ັງຢືນຕົວຕົນທີ່ປອດໄພ ແລະ ເຊື່ອຖືໄດ້. ສະນັ້ນ, ການຮ່ວມມືໃນໂຄງການນີ້ ຈຶ່ງຈຳເປັນຫຼາຍ ແລະ ສອດຄ່ອງກັບແນວທາງຂອງພັກ-ລັດ ໃນການຫັນເປັນດິຈິຕອນ ທັງ 3 ເສົາຄຳ້.

ໃນກອງປະຊຸມສຳມະນາ ໄດ້ມີການນຳສະເໜີໃນຫຼາຍຫົວຂໍ້ກ່ຽວກັບການຢັ້ງຢືນຕົວຕົນແບບດິຈິຕອນ ເປັນຕົ້ນແມ່ນ ຄວາມຈຳເປັນ ການຢັ້ງຢືນຕົວຕົນດິຈິຕອນສຳລັບການບໍລິການພາກລັດຂອງ ສປປ ລາວ, ການນຳໃຊ້ລະບົບຢັ້ງຢືນຕົວຕົນດິຈິຕອນ ຂອງປະເທດຍີ່ປຸ່ນ ແລະ ບົດຮຽນຈາກປະເທດຕ່າງໆ, ການສາທິດການລົງທະບຽນໃນລະບົບຈຳລອງ. ນອກຈາກນັ້ນ, ກອງປະຊຸມຍັງໄດ້ແລກປ່ຽນສົນທະນາແຜນພັດທະນາການບໍລິການຂອງແຕ່ລະຂະແໜງການ ທີ່ຈະມີການນຳໃຊ້ລະບົບຢັ້ງຢືນຕົວຕົນດິຈິຕອນ. ກິດຈະກຳການສາທິດ ກ່ຽວກັບລະບົບຢັ້ງຢືນຕົວຕົນດິຈິຕອນໃນຄັ້ງນີ້ ແມ່ນການຮ່ວມມືໄລຍະທີ 2 ລະຫວ່າງ ກະຊວງເຕັກໂນໂລຊີ ແລະ ການສື່ສານ ກັບ ກະຊວງພາຍໃນ ແລະ ການສື່ສານ ປະເທດຍີ່ປຸ່ນ ໂດຍຜ່ານ ບໍລິສັດຄູ່ຮ່ວມຈາກປະເທດຍີ່ປຸ່ນ (ບໍລິສັດ Ryobi System, NEC, J&C, Ryobi Lao) ເພື່ອສຶກສາແຜນພັດທະນາລະບົບຢັ້ງຢືນຕົວຕົນດິຈິຕອນ ສຳລັບ ສປປ ລາວ ແລະ ຈະຈັດຕັ້ງປະຕິບັດໃນຮູບແບບລົງໄປສະຖານທີ່ຕ່າງໆໃນຂອບເຂດນະຄອນຫຼວງວຽງຈັນ ເພື່ອໃຫ້ປະຊາຊົນ ທົດລອງ ລົງທະບຽນເຂົ້າໃນລະບົບຕົວຈິງ ຊຶ່ງຄາດຄະເນຈະໃຊ້ເວລາຮອດເດືອນ ທັນວາ 2024.