ໃນຕອນເຊົ້າຂອງວັນທີ 13 ພະຈິກ 2024, ທີ່ຫ້ອງຮັບແຂກຂອງ ກະຊວງເຕັກໂນໂລຊີ ແລະ ການສື່ສານ (ກຕສ), ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ຈັງເຈິຢົງ (Zhang ZhiYong), ປະທານບໍລິສັດ ຊາຍນາທາວເວີ (ChinaTower) ສປ ຈີນ ພ້ອມດ້ວຍຄະນະ.

ໂອກາດນີ້, ທ່ານ ປະທານບໍລິສັດ ຊາຍນາທາວເວີ ສປ ຈີນ ໄດ້ກ່າວສະແດງຄວາມຂອບໃຈຕໍ່ທ່ານລັດຖະມົນຕີ ທີ່ໄດ້ເສຍສະຫຼະເວລາອັນມີຄ່າຕ້ອນຮັບທ່ານ ພ້ອມດ້ວຍຄະນະຢ່າງອົບອຸ່ນ ແລະ ເປັນກັນເອງ. ພ້ອມທັງສະເໜີລາຍງານຈຸດປະສົງຂອງການເຂົ້າຢ້ຽມຂໍ່ານັບ ແລະ ຂໍການຊີ້ນໍາສະໜັບສະໜູນແກ່ບໍລິສັດ ກ່ຽວກັບຂົງເຂດວຽກງານເຕັກໂນໂລຊີ ແລະ ການສື່ສານ ກໍຄື ວຽກງານພັດທະນາລະບົບໂຄງລ່າງພື້ນຖານດ້ານໂທລະຄົມມະນາຄົມ ຂອງ ສປປ ລາວ.

ພ້ອມດຽວກັນ, ທ່ານ ລັດຖະມົນຕີ ກໍໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ຂໍ້ສະເໜີລາຍງານຂອງທາງບໍລິສັດ ແລະ ແຈ້ງໃຫ້ຊາບບັນດານິຕິກໍາກ່ຽວກັບຂົງເຂດວຽກງານໂທລະຄົມມະນາຄົມ, ແຜນການຂະຫຍາຍພື້ນຖານໂຄງລ່າງດ້ານໂທລະຄົມມະນາຄົມ, ອິນເຕີເນັດ, ຖານຂໍ້ມູນ ແລະ ບັນດາພລັດຟອມ ຂອງ ສປປ ລາວ. ພ້ອມນັ້ນ, ທ່ານຍັງໄດ້ເຫັນດີສະໜັບສະໜູນ ບໍລິສັດ ຊາຍນາທາວເວີ ໃນການລົງທຶນໃນຂົງເຂດວຽກງານດັ່ງກ່າວຢູ່ ສປປ ລາວ ຊຶ່ງເປັນໜຶ່ງໃນການຜັນຂະຫຍາຍເສັ້ນທາງສາຍໄໝດິຈິຕອນ ລະຫວ່າງ ລາວ-ຈີນ.