ໃນຕອນເຊົ້າຂອງວັນທີ 13 ພະຈິກ 2024 ຜ່ານມາ, ທີ່ ຫ້ອງການ ຄະນະພົວພັນຕ່າງປະເທດສຸນກາງພັກ ໄດ້ຈັດກອງປະຊຸມຄັ້ງປະຖົມມະລຶກເພື່ອຜັນຂະຫຍາຍເນື້ອໃນຂອບການຮ່ວມມືໃນບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືໃນການຫັນວຽກງານຂອງຄະນະພົວພັນຕ່າງປະເທດສູນກາງພັກເປັນດິຈິຕອນ ລະຫວ່າງ ກະຊວງເຕັກໂນໂລຊີ ແລະ ການສື່ສານ (ກຕສ) ແລະ ຄະນະພົວພັນຕ່າງປະເທດສູນກາງພັກ (ຄຕພ) ຂຶ້ນຢ່າງເປັນທາງການ, ໃຫ້ກຽດເປັນປະທານຮ່ວມກອງປະຊຸມໃນຄັ້ງນີ້ໂດຍແມ່ນ ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ, ກຕສ ແລະ ທ່ານ ບຸນຍະເດດ ໄຊຍະວົງ, ຫົວໜ້າຫ້ອງການ, ຄຕພ, ມີບັນດາຜູ້ຕາງໜ້າຄະນະກົມ, ຫ້ອງການ, ສະຖາບັນ, ສຸນຂອງທັງສອງພາກສ່ວນເຂົ້າຮ່ວມຈໍານວນ 15 ທ່ານ, ຍິງ 01 ທ່ານ.

ໃນກອງປະຊຸມ, ທ່ານ ບຸນຍະເດດ ໄຊຍະວົງ ໃນນາມຕາງໜ້າຄະນະນຳຂອງ ຄຕພ ໄດ້ລາຍງານສະພາບການນໍາໃຊ້ ແລະ ການພັດທະນາໄອຊີທີເຂົ້າໃນວຽກງານ ໂດຍໄດ້ຍົກໃຫ້ເຫັນເຖິງຄວາມສຳຄັນ ແລະ ສະພາບແວດລ້ອມຂອງການຫັນເປັນທັນສະໄໝຂອງຄະນະພົວພັນຕ່າງປະເທດສູນກາງພັກໃນໄລຍະຜ່ານມາ ພ້ອມທັງສະເໜີຄວາມຕ້ອງການຮີບດ່ວນໃນການຫັນເປັນທັນສະໄໝ ໂດຍສະເພາະແມ່ນ ລະບົບຫ້ອງການທັນສະໄໝ, ລະບົບຖານຂໍ້ມູນພະນັກງານ ແລະ ປັບປຸງພັດທະນາເວັບໄຊຂອງ ຄຕພ.

ພ້ອມດຽວກັນ, ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດິຈິຕອນ ໃນນາມຕາງໜ້າຄະນະຫັນເປັນດິຈິຕອນ ກຕສ ໄດ້ລາຍງານ ສະພາບການທີ່ພົ້ນເດັ່ນໃນການພັດທະນາວຽກງານເພື່ອຫັນເປັນທັນສະໄໝຂອງ ສປປ ລາວ  ຊຶ່ງໃນນັ້ນວຽກງານ ການບໍລິຫານ ແລະ ການບໍລິການລັດດິຈິຕອນ ມີທ່າກ້າວການພັດທະນາຢ່າງວ່ອງໄວ ເປັນຕົ້ນແມ່ນ ບັນດາລະບົບທີ່ເປັນພື້ນຖານໂຄງລ່າງໃນການຫັນເປັນທັນສະໄໝທີ່ ກຕສ ໄດ້ພັດທະນາຂຶ້ນ ເຊັ່ນ: ລະບົບກອງປະຊຸມທາງໄກ, ລະບົບຫ້ອງການທັນສະໄໝ (e-Office), ລະບົບເວັບໄຊພາກລັດ (G-Web), ລະບົບສົນທະນາພາກລັດ (G-Chat), ລະບົບແບ່ງປັນຂໍ້ມູນພາກລັດ (G-Share) ແລະ ອື່ນໆ. ໂດຍເລັງເຫັນເຖິງຄວາມສໍາຄັນຢ່າງພາວະວິໃສຄືດັ່ງກ່າວ,  ຄະນະພັກຄະນະນໍາ ກຕສ ໄດ້ສ້າງເອກະສານຝຶກອົບຮົມຄວາມຮູ້ພື້ນຖານກ່ຽວກັບການຫັນເປັນດິຈິຕອນຂຶ້ນ 03 ເຫຼັ້ມ, ປະກອບມີ 15 ບົດ ເພື່ອເປັນການເຜີຍແຜ່ວຽກງານບົດບາດມະຫາພາກຂອງ ກຕສ ແລະ ຄວາມພ້ອມຂອງການຫັນເປັນດິຈິຕອນໃນຕໍ່ໜ້າໃຫ້ແກ່ບັນດາກະຊວງ, ອົງການທຽບເທົ່າ, ບັນດາແຂວງໃນຂອບເຂດທົ່ວປະເທດໄດ້ຮັບຮູ້ ແລະ ເຂົ້າໃຈໄປໃນທິດທາງດຽວກັນ. ໃນກອງປະຊຸມຍັງໄດ້ມີຄໍາເຫັນແລກປ່ຽນກັບຂໍ້ສະເໜີທີ່ ຄຕພ ໄດ້ຍົກຂຶ້ນມາສົນທະນາ ຊຶ່ງທັງ 2 ພາກສ່ວນຈະໄດ້ກະກຽມຄະນະເພື່ອເຮັດວຽກລົງເລິກດ້ານເຕັກນິກຮ່ວມກັນລະອຽດຕື່ມ.

ຕະຫລອດໄລຍະຂອງກອງປະຊຸມ, ບັນດາຜູ້ແທນກອງປະຊຸມທັງ 02 ພາກສ່ວນ ໄດ້ແລກປ່ຽນຄໍາຄິດຄໍາເຫັນກົງໄປກົງມາ ແລະ ມີຄໍາຖາມເຈາະຈີ້ມທີ່ເປັນຂະບວນຟົດຟື້ນ, ມີເນື້ອໃນອັນເປັນປະໂຫຍດຕໍ່ການປັບປຸງ, ພັດທະນາ ພື້ນຖານໂຄງລ່າງ ແລະ ລະບົບບໍລິຫານເພື່ອຫັນເປັນທັນສະໄໝຂອງ ຄຕພ ພາຍໃຕ້ຂອບການຮ່ວມມືໃນບົດບັນທຶກຄວາມເຂົ້າໃຈຮ່ວມກັນ. ກອງປະຊຸມໄດ້ປິດລົງໃນເວລາ 11:30 ຂອງວັນດຽວກັນ.

ພາບ ແລະ ຂ່າວ: ກອງເລຂາ ຄະນະຫັນເປັນດິຈິຕອນ ກຕສ